Lunacek: Referendumi në veri provokim kontraproduktiv

Raportuesja e posaçme e Parlamentit të Evropës për Kosovë, Ulrike Lunacek, e ka dënuar referendumi i serbëve në veri të Kosovës.

Lunacek, ka thënë se me këtë referendum plotësisht të panevojshëm, fushata paraelektorale serbe ka mbërritur përfundimisht edhe Kosovën, raporton radio Deutsche Welle.

Votimin në këtë referendum ajo e quan si provokim kontraproduktiv, i cili do të dëmtojë rëndë dialogun mes Prishtinës dhe Beogradit dhe nxitë forcat nacionaliste.

Ndërsa Franziska Brantner, zëdhënëse për politikë të jashtme e grupit parlamentar ekologjist në PE bën të ditur se edhe vet autoritetet serbe, presidenti i Serbisë Boris Tadiq dhe ministri për Kosovën Goran Bogdanoviq e kanë quajtur këtë referendum të dëmshëm dhe të panevojshëm.

“Në vend të provokimeve të hidhura do të ishte mirë që të punohet në implementimin e planit të Ahtisaarit, me qëllim që serbët e veriut më në fund të realizojnë të drejtat e tyre që u takojnë”, pohon ajo.

Referendumi i serbëve në veri ka shkaktuar reagime negative edhe në Berlin. Zëdhënësja për politikë të jashtme e ekologjistëve Marieluise Beck, kumtoi se bashkësia ndërkombëtare e ka shpallur me të drejtë si të pavlefshëm referendumin e serbëve në veri.

“Është shumë e qartë që kemi të bëjmë me një provokim të fushatës parazgjedhore serbe. Referendumi ka për qëllim të minojë gatishmërinë e palës serbe dhe kosovare për bisedime”, pohon Beck.

Në veri, sipas saj, nuk mund të flitet për liri demokratike. Banorët e atjeshëm janë nën presione të vazhdueshme.

Në ditën e parë të referendumit serb në veri të Kosovës kanë votuar, sipas të dhënave të përfaqësuesve të tyre, 48 % e rreth 35 mijë serbëve me të drejtë vote. Referendumi ka për qëllim që të mos pranohen institucionet e Kosovës në këtë pjesë të vendit.

Referendumi i serbëve në veri të Kosovës është dënuar prej autoriteteve të Kosovës. Serbisë dhe bashkësisë ndërkombëtare. Ai quhet i dëmshëm dhe i panevojshëm. /albinfo& dw/