Vritet një dhe plagoset rëndë një ushtar tjetër shqiptar

Ministria shqiptare e Mbrojtjes, ka thënë se kjo është hera e parë që trupat shqiptare vriten në shtetin afgan

Njerëz të veshur si policë afganë kanë hapur zjarr ndaj ushtarëve shqiptarë dhe të tjerë në jug të Afganistanit, duke vrarë një ushtar të Shqipërisë dhe duke i shkaktuar plagë të rënda një ushtari tjetër. Fjala është për Teki Voglin dhe për Aleksandër Peçin.

Lajmin e ka bërë të ditur Ministria shqiptare e Mbrojtjes, duke thënë se kjo është hera e parë që trupat shqiptare pësojnë për vdekje në shtetin afgan.

I njëjti burim tha se 11 policë afganë janë arrestuar pas të shtënave që kanë ndodhur të hënën pasdite.

Mësohet se incidenti ka ndodhur në një fshat pranë qytetit Kandahar, ku trupat ishin mbledhur në takim për hapjen e dy shkollave dhe një qendre shëndetësore.

Nga sulmi është plagosur edhe një ushtar ndërkombëtar, por nuk ka njoftime për nacionalitetin e tij.