Kryetari i Kuvendit të Kosovës kërkon konsensus për dialogun me Serbinë

Kryetari i Kuvendit, Kadri Veseli, ka thënë se delegacioni shtetëror, i cili përfaqëson Kosovën në takimin e Brukselit, ka mandat të plotë legal dhe legjitim nga Kuvendi. Ai ka thënë se Kosova hyn në dialog për të marrë njohjen nga Serbia dhe për të siguruar anëtarësimin në OKB.

Në një postim në Facebook, Veseli ka shkruar se vendimet që do të merren, do të jenë në koordinim me partnerët ndërkombëtarë. “Refuzimi i dialogut nuk është alternativë. As zgjidhje. Për më tepër, do të ishte një favorizim i Serbisë në arenën ndërkombëtare. E dimë nga e kaluara se sa herë që Serbia ka refuzuar dialogun, po aq herë ka dalë e humbur nga procesetNe nuk guxojmë ta përsërisim këtë leksion të gabuar të Serbisë. Kosova hyn në dialog me qëllime të qarta: njohjen e shtetit të Kosovës nga ana e Serbisë dhe anëtarësimi ynë në OKB. Ne nuk do të lejojmë asnjë rezultat që dobëson integritetin e shtetit të Kosovës. Ne hyjmë në dialog për ta fuqizuar edhe më shumë shtetin e Kosovës dhe do t’ia arrijmë kësaj pa asnjë mëdyshje”, ka shkruar Veseli, përcjell, albinfo.ch

Kryeparlamentari ka kërkuar sërish unitet, duke thënë se nuk ka kohë për të humbur. Po ashtu, ka premtuar transparencë për këtë fazë të dialogut.