Bëhet seri televizive ngujimi i futbollistëve në një shpellë në Tajlandë

Tmerri që përjetuan 12 djem në një shpellë në Tajlandë, pritet të ‘shkrihet’ në një mini-seri televizive, transmeton albinfo.ch.

Platforma amerikane Netflix ka siguruar të drejtat për ta krijuar serinë për historinë e ekipit Wild Boars, që u ngujua për dy javë rresht në shpellën e përmbytur nga uji.

Të gjithë lojtarët, së bashku me trajnerin e tyre, u shpëtuan në një operacion në të cilin morën pjesë 90 zhytës profesionistë. Regjisorë të kësaj mini-serie do të jenë Jon Chu dhe Nattawut Ponpiria.

“Rrëfimi i tyre kombinon tema unike që i bëjnë bashkë njerëzit nëpër botë. Tajlanda është një treg i veçantë për Netflixin dhe mezi presim të sjellim në jetë rrëfimin e djelmoshave”, deklaroi Erika North nga Netflix. Ekipi u ngujua më 23 qershor të vitit 2018, gjatë eksplorimit të shpellës gjigante në Chiang Rai.