CIA: Kosova, Shqipëria e Maqedonia më të varfrat në rajon

Agjencia Amerikane e Inteligjencës (CIA) ka publikuar të dhënat për kokë banorë për 228 shtete në botë. Kosova, Shqipëria e Maqedonia janë më të varfrat në Evropë

Kosova, Shqipëria dhe Maqedonia janë ndër shtetet më të varfra në Evropë sa i përket të ardhura bruto për kokë banori (BPB). Kështu raportohet në Librin Botërore të fakteve (The World Factbook) të Agjencisë Amerikane të Inteligjencës (CIA) publikuar para disa ditëve.

Sipas këtij raporti, Kosova radhitet në vendin e 131-të nga 228 shtete sa i përket Prodhimit të Brendshëm Bruto për kokë banori me 7200 dollarë. Shqipëri me 8.200 dollarë për kokë banori, radhitet pak më lartë se Kosova në të njëjtin vend me Namibinë dhe Tongon.

Ndërsa edhe vendet e rajoni nuk qëndrojnë edhe aq mirë me MPB. Kështu Mali i Zi renditet i 107-ti me 11.900 dollarë për frymë, Maqedonia 113-ta më 10.800 dollarë, Serbia 111-ta me 11.100 dollarë për kokë banori dhe Kroacia më 17.800 dollarë qëndron dukshëm më lartë.

“Ekonomia shqiptare edhe pse vazhdon të rritet në shifra, renditet ndër më të varfrat në Evropë si pasojë e infrastrukturës të papërshtatshme të transportit dhe energjisë, por gjithashtu edhe ulja e të ardhurave nga emigrantët që jetojnë në Greqi dhe Itali”, citojnë mediet shqiptare raportin e CIA-s.

Kjo mbështetje e rëndësishme e ekonomisë shqiptare ka rënë nga 12-15 për qind të GDP-së përpara krizës ekonomike të vitit 2008 në 7 për qind të GDP-së në vitin 2012.

“Sektori i bujqësisë i cili është përgjegjës thuajse për gjysmën e numrit të të punësuarve, arrijnë të përmbushin vetëm nevojat e familjeve, për shkak të mungesës së pajisjeve moderne, problem me pronësinë dhe dominimit të sipërfaqeve të vogla e joefiçente të tokës”, theksohet në raportin e CIA-s.