Më 19 maj betohet kryetari i zgjedhur i Mitrovicës së Veriut

FB: Erden Atiq

Kryetari i zgjedhur i Mitrovicës së Veriut, nga radhët e Lëvizjes Vetëvendosje, Erden Atiq, do të bëjë betimin si kryetar komune më 19 maj, shkruajnë mediat në Kosovë.

Ceremonia e betimit do të bëhet në orën 11:00, në sallën e Kuvendit Komunal të Mitrovicës së Veriut.

Më 23 prill u mbajtën zgjedhjet për kryetarë komune në Zveçan, Leposaviq, Zubin Potok dhe Mitrovicë e Veriut. Këto zgjedhje u bojkotuan nga serbët lokalë që në komunat veriore janë shumicë, përcjell albinfo.ch.

Pak më shumë se 3% e qytetarëve me të drejtë vote e ushtruan atë. Prandaj, Lista Serbe që nuk mori pjesë në këto zgjedhje, pas rezultateve, përmes nënkryetarit të saj, Milan Radojqiq, u shpreh se nuk do të pranojnë qeverisjen lokale nga pakica.

Në anën tjetër, në emër të ruajtjes së rendit dhe sigurisë në Veri, Bashkimi Evropian ka kërkuar nga kryetarët e zgjedhur, shqiptarë, të djegin mandatet e tyre, përcjell albinfo.ch.