Grubi mbështet draft-statutin e propozuar nga kryeministri i Shqipërisë, Edi Rama

Artan Grubi, Facebook

Zëvendëskryeministri i Maqedonisë së Veriut, Artan Grubi, ka thënë që e ka lexuar draft-statutin për Asociacionin e komunave me shumicë serbe që kryeministri i Shqipërisë, Edi Rama, ua ka dërguar ndërkombëtarëve.

Për “Euronews Albania”, ai deklaroi se është një ndër personat që e ka parë draft-statutin e hartuar nga Rama, duke zgjedhur të mos japë detaje, por u shpreh që e mbështet.

“E kam lexuar dhe kam komunikuar me autoritetet shqiptare dhe kam përkrahje të plotë për iniciativën e kryeministrit Rama, si një nismë e mirë për të vijuar drejt zgjidhjes së problemit në veri, por edhe përfundimisht mes Kosovës dhe Serbisë me njohjen reciproke”, deklaroi Grubi, përcjell albinfo.ch.

“Çdo iniciativë dhe nismë mbi të cilën mund të ndërtohen marrëveshje të mëtejshme është e mirëpritur. Përgëzoj kryeministrin Rama për gatishmërinë që t’i prijë këtij procesi për të ofruar një zgjidhje të qëndrueshme. Për ne zgjidhja e vetme është njohja reciproke mes dy shteteve dhe këtë e përkrahim dhe ky është qëndrimi ynë shtetëror”, shprehet tutje zëvendëskryeministri i Maqedonisë së Veriut, Artan Grubi, përcjell albinfo.ch.