Forca e Sigurisë së Kosovës ka marshuar nëpër Mitrovicë të Jugut gjatë së premtes. 

“Në vazhdën e kësaj, Regjimenti i Tretë i Forcave Tokësore  (R3KFT) ka realizuar marshimin kondicional, për të cilin kanë qenë të njoftuar Komandanti i Batalionit të KFOR-it dhe stafi i tij të vendosur në bazën e KFOR-it në Maxhunaj. Në kuadër të planit mujor të trajnimeve për muajin qershor 2023, më 23.06.2023, R3K ka realizuar marshimin 12 km në zonën e përgjegjësisë, zona e Mitrovicës. Marshimi është realizuar duke filluar nga ora 0900L nga kazerma “Minatori” në drejtim të fshatrave Bajr, Frashër i Vogël dhe Frashër i Madh. R3K në këtë marshim ka marrë pjesë gjithsej me 215 pjesëtarë. Qëllimi i këtij marshimi ka qenë mbajtja dhe përmirësimi i gatishmërisë fizike të pjesëtarëve të R3K.

Marshimet janë aktivitete të zakonshme të njësive të FSK-së, dhe realizohen disa herë përgjatë vitit kalendarik në pjesë të ndryshme të Kosovës”, thuhet në njoftimin e FSK, përcjell albinfo.ch.

Ndërkohë, ministri i Mbrojtjes, Armend Mehaj, po ashtu ka njoftuar për marshimin, duke bërë të ditur se nuk lidhet me çështjet e sigurisë. 

“Marshimi nuk ka të bëjë asgjë me situatën e sigurisë në veri të Republikës. Përgjegjësinë për sigurinë e qytetarëve tanë e ka Policia e Kosovës, e cila është në krye të detyrës dhe është duke kryer me shumë sukses punën e saj”, thuhet në njoftimin e ministrit, përcjell albinfo.ch.