Prokuroria interviston zëvendëskryeministrin, ministrin e deputetët për incidentin në Kuvend

Prokuroria Themelore e Prishtinës, si pjesë e hetimeve për rrahjen në Kuvendin e Kosovës, ka intervistuar zëvendëskryeministrin Besnik Bislimi, ministrin Hekuran Murati dhe deputetët e Partisë Demokratike të Kosovës, Mergim Lushtakun, Hajdar Beqën edhe Bekim Haxhiun.

Siç ka mësuar KOHA, në cilësinë e të dyshuarit është intervistuar zëvendëskryeministri Besnik Bislimi, ndërsa në cilësinë e të dëmtuarit ministri i Financave, Hekuran Murati. Nga deputetët janë intervistuar Hajdar Beqa dhe Mërgim Lushtaku. Lushtaku, sipas avokatit mbrojtës, është intervistuar si i dyshuar, por edhe si viktimë.

Avokati Faton Fetahu ka thënë se Lushtaku ka vepruar në vetëmbrojtje. E deputeti Beqa ka thënë se është intervistuar në cilësinë e të dyshuarit, por ka shtuar se e ndien veten të pafajshëm dhe se “vetëm ka ndërhyrë për të ndalur tensionet”, duke shtuar se gjithçka ka qenë “skenar i Kurtit dhe Bislimit”, përcjell albinfo.ch.

Ndërkaq, Prokuroria Themelore në Prishtinë ka konfirmuar se ka nisur hetimet për veprën penale “Sulmi”.