Gjykata ua ndalon hyrjen për tre vjet dy serbëve të arrestuar për organizimin e trazirave në veri

Keystone EPA/GEORGI LICOVSKI

Gjykata Themelore në Prishtinë e ka ndaluar hyrjen në Kosovë për dy serbët të cilët u arrestuan më herët për organizimin e trazirave në veri që ndodhën në fund të majit, për një periudhë 3-vjeçare.

Sinisha Jevtiq dhe Ivan Sekuliq, përveç dëbimit nga Kosova, u dënuan me nga gjashtë muaj burg secili, masë e cila iu zëvendësua me para. Ata u dënuan për veprat penale “pjesëmarrje në turmë” dhe “huliganizëm”, shkruan koha.net.

Jevtiq e Sekuliq e pranuan fajësinë, dhe gjykata vendosi që dënimin me burg ta zëvendësojë me gjobë prej 7 mijë eurosh për secilin.

Sekuliqit iu shtua edhe një gjobë prej 2 mijë eurosh për armëmbajtje pa leje.

Jevtiq e Sekuliq ishin në mesin e emrave të cilët kryeministri Albin Kurti i pati përmendur në një seancë të Kuvendit në fillim të qershorit, duke i akuzuar si organizatorët e trazirave në veri. Sipas Kurtit, Jevtiq e Sekuliq janë pjesë e tifozëve nacionalistë të Crvena Zvezdës, “Delije”, përcjell albinfo.ch.