Hulumtuesi në Insitutin e Kosovës për Drejtësi, Naim Jakaj, u shpreh se presidentja Vjosa Osmani duhet të reagojë ndaj sulmeve që, sipas tij, po i bëhen sistemit gjyqësor nga politika.

“Në bazë të Kushtetutës së Kosovës, presidentja garanton funksionimin kushtetues të institucioneve kushtetuese, ku hyn Këshilli Prokurorial, Këshilli Gjyqësor, Gjykata dhe Prokuroria. Edhe pse presidentja nuk ka ndonjë mekanizëm që ta zbatojë këtë në praktikë, së paku një adresim ku i bëhet thirrje që të ndalen sulmet dhe ndërhyrjet e papërshtatshme ndaj sistemit të drejtësisë nga ana e udhëheqësve politikë, politikës dhe secili që cenon pavarësinë e pushteteve, do të ishte i mirëseardhur”, ka thënë ai.

Sa i përket opozitës, koordinatori i Departamentit për Drejtësi në kuadër të Kabinetit për Qeverisje të Mirë të PDK, Përparim Gruda, ka thënë se presidentja nuk po i përmbush kompetencat e saj të dala nga Kushtetuta për të garantuar pushtete të ndara institucionale.

“Ka kohë që presidentja Osmani në fushëveprimin e saj ndjek pikë për pikë agjendën politike të Qeverisë, të Lëvizjes Vetëvendosje, në këtë kuptim ajo është jashtë rolit të saj kushtetues”, është shprehur ai.

Në anën tjetër, nënkryetari i Lidhjes Demokratike të Kosovës, Lutfi Haziri, e ka akuzuar presidenten për mosveprim.

“Presidentja duhet të jetë gardiane e Kushtetutës dhe mbrojtësja më e madhe e pushteteve të ndara, duke garantuar mosndërhyrje në pavarësinë e pushteteve. Me vetë faktin që nuk po dekreton formalisht Prokurorin e Shtetit, po shihet që ka humbur në rolin e saj. Sot është vonë mosdalja në mbrojtje të pavarësisë së pushteteve të ndara. Si duket Kushtetuta mbrohet vetëm kur flitet për zbatimin e saj në katër komunat në veri të Mitrovicës, e pjesën tjetër ia ka lënë kryeministrit ta ushtrojë ndikimin dhe administrimin e tërësishëm”, ka deklaruar ai.