Haxhiu: Serbia strehë e terroristëve

Ministrja e Drejtësisë në Kosovë, Albulena Haxhiu ka reaguar pas lirimit të organizatorit të sulmit terrorist në Banjskë të Zveçanit, Milan Radojiçiq.

Ajo thotë se Serbia është strehë e terroristëve dhe kriminelëve të luftës.

“Sulmi terrorist në Kosovë është dirigjuar, siç është dëshmuar, nga Serbia dhe në këtë drejtim, çfarëdo veprimi në raport me këtë çështje, me grupin e armatosur, që e bën Serbia nuk na befason aspak. Serbia nuk i ka dorëzuar asnjëherë kriminelët dhe nuk do t’i dorëzojë as terroristët. Thënë qartë, Serbia është strehë e kriminelëve të luftës dhe terroristëve që para 10 dite bën sulm terrorist në territorin e Kosovës”, u shpreh Haxhiu, përcjell albinfo.ch.

Ajo shton se institucionet e Kosovës janë duke punuar me intensitet të shtuar për të vënë para drejtësisë grupin terrorist.

“Përballë një Serbie që nuk distancohet nga e kaluara, dirigjon sulme të armatosura në Kosovë dhe nuk i dorëzon kriminelët dhe terroristët, është vigjilenca, puna e madhe e institucioneve të Kosovës, veçanërisht Policia e Kosovës, njësiteve të hetimeve, njësiteve speciale, Prokurorisë dhe Gjykatës. Institucionet e drejtësisë po e bëjnë punën e tyre. Për shkak të hetimeve, nuk mund të jap detaje çfarë po ndodh. Vetëm desha t’iu siguroj që institucionet po bëjnë punën e tyre”, ka thënë ajo, përcjell albinfo.ch.

Policia e Kosovës, më 24 shtator në fshatin Banjskë të komunës së Zveçanit u sulmua nga grupi terrorist i prirë nga Milan Radojiçiq. Nga ky sulm mbeti i vrarë rreshteri Afrim Bunjaku.