Zvicra regjistron qershorin e tretë më të nxehtë

Vetëm qershori i vitit 2003 dhe ai i vitit 2019 kanë qenë më të nxehtë se qershori i sivjetshëm

Muaji qershor i vitit 2026 ka hyrë në histori si qershori i tretë më i nxehtë në Zvicër që prej fillimit të matjeve meteorologjike në vitin 1864.

Sipas të dhënave të publikuara nga MeteoSwiss, temperaturat mesatare gjatë muajit ishin dukshëm mbi normat shumëvjeçare, duke konfirmuar edhe një herë ndikimin e ndryshimeve klimatike në vend, shkruan swissinfo.ch, transmeton albinfo.ch.

Vetëm qershori i vitit 2003 dhe ai i vitit 2019 kanë qenë më të nxehtë se qershori i sivjetshëm. Muaji u karakterizua nga temperatura të larta të vazhdueshme, ditë të shumta me vapë ekstreme dhe net tropikale, ndërsa në disa rajone u thyen edhe rekorde historike të temperaturave për muajin qershor.

Sipas MeteoSwiss, vala e të nxehtit në fund të muajit ishte ndër më intensivet e regjistruara ndonjëherë në këtë periudhë të vitit. Temperaturat arritën deri në 39 gradë Celsius në rajonin e Bazelit, duke vendosur rekorde të reja për muajin qershor në disa stacione meteorologjike.

Ekspertët paralajmërojnë se ngjarje të tilla po bëhen gjithnjë e më të shpeshta si pasojë e ngrohjes globale. Zvicra po ngrohet me një ritëm më të shpejtë se mesatarja botërore dhe modelet klimatike tregojnë se verat me temperatura ekstreme do të jenë gjithnjë e më të zakonshme në vitet e ardhshme.

---