Ministri i Punëve të Brendshme në detyrë, Xhelal Sveçla, ka deklaruar në Zveçan se marrja nën kontroll e stacionit hekurudhor nuk ka lidhje me fushatën zgjedhore, por me zbatimin e ligjit dhe vendosjen e rendit në të gjithë territorin e Kosovës, përcjell albinfo.ch.

Me praninë e disa ministrave në detyrë dhe asistimin e Policisë së rajonit të veriut, autoritetet kosovare kanë marrë të enjten nën kontroll objektin e stacionit hekurudhor në Zveçan, pranë kompleksit “Trepça”.

Gjatë aksionit është larguar mbishkrimi në alfabetin cirilik nga objekti dhe është vendosur një tabelë e re në gjuhën shqipe dhe serbe, si dhe flamuri i Kosovës.

I pyetur nga gazetarët nëse ky veprim lidhej me fillimin e fushatës zgjedhore, Sveçla e ka mohuar një gjë të tillë.

“Jo, kjo është pjesë e detyrës sonë për të siguruar që rendi dhe ligji të jenë të pranishëm kudo, përfshirë të gjitha komunat e Republikës së Kosovës. Ky është një nga institucionet e fundit që ende funksiononte nën struktura paralele dhe ilegale të Serbisë”, ka deklaruar Sveçla, sipas transmetimit të “Kossev”.

Ai shtoi se çdo institucion që vlerësohet si “ilegal dhe paralel” do të jetë subjekt i veprimeve të institucioneve kompetente.

Sa i përket të ardhmes së stacionit hekurudhor dhe mundësisë së funksionalizimit të tij, Sveçla tha se objekti është pjesë e rrjetit hekurudhor të Kosovës dhe do të përfshihet në projektet e rindërtimit të infrastrukturës hekurudhore në vend.

Edhe ministri në detyrë i Infrastrukturës, Dimal Basha, bëri të ditur se pas Zveçanit, veprime të ngjashme pritet të ndërmerren edhe në Leposaviq dhe Leshak. /Albinfo.ch

Ministri i Brendshëm në detyrë, Xhelal Sveçla, ka bërë të ditur se qindra shtetas të Serbisë që jetojnë apo punojnë në Kosovë kanë aplikuar për marrjen e nënshtetësisë kosovare, përcjell albinfo.ch.

Në një konferencë për media, Sveçla theksoi se të gjitha aplikimet po trajtohen dhe verifikohen individualisht nga institucionet përkatëse.

“Ka pasur me qindra aplikime të shtetasve të Serbisë të cilët jetojnë apo punojnë përkohësisht në Republikën e Kosovës. Të gjitha janë duke u verifikuar individualisht”, deklaroi ai, duke shtuar se procedurat do të vazhdojnë sipas plotësimit të kushteve ligjore.

Ndërkohë, Ministria e Punëve të Brendshme kishte konfirmuar më herët nisjen e procesit të regjistrimit të fakteve civile të lëshuara nga regjistrat paralelë të Serbisë, përfshirë lindjet, vdekjet dhe martesat.

Sipas kornizës ligjore në Kosovë, certifikatat e lindjes dhe martesës janë dokumente të domosdoshme për procesin e natyralizimit dhe marrjen e shtetësisë, duke e bërë këtë regjistrim një hap të rëndësishëm për banorët serbë që jetojnë në Kosovë por nuk janë ende shtetas.

Këto lehtësime janë mbështetur nga Bashkimi Evropian, Gjermania dhe Franca, ndërsa janë kritikuar nga opozita në Kosovë, e cila i konsideron si njohje të dokumenteve të lëshuara nga Serbia.

Në të njëjtën kohë, Qeveria është zotuar se do të mundësojë edhe dhënien e lejeve të qëndrimit për 12 muaj për punëtorët e institucioneve shëndetësore dhe arsimore që financohen nga Serbia në Kosovë./Albinfo.ch

Kryeministri në detyrë i Kosovës, Albin Kurti, ka deklaruar se themelimi i xhandarmërisë është një domosdoshmëri për vendin, duke përmendur situatën e sigurisë dhe kërcënimet e vazhdueshme nga Serbia, përcjell albinfo.ch. 

Në një konferencë për media, Kurti tha se xhandarmëria do të ketë rol të rëndësishëm në sistemin e sigurisë së Kosovës, duke plotësuar boshllëkun ndërmjet Policisë së Kosovës dhe Forcës së Sigurisë së Kosovës (FSK).

Sipas tij, ky mekanizëm do të ketë mandat të qartë për mbrojtjen dhe kontrollin e vijës kufitare tokësore, ujore dhe ajrore në të gjithë territorin e Kosovës.

“Xhandarmëria do të ketë mandat të qartë: sigurimin e vijës kufitare tokësore, ujore dhe ajrore në tërë Republikën e Kosovës, operacione kundër grupeve terroriste dhe të armatosura, duke përfshirë ato me karakter paraushtarak, parandalimin dhe luftimin e të gjitha llojeve të kontrabandës ndërkufitare, menaxhimin e situatave të rrezikut të lartë, si dhe sigurimin e infrastrukturës kritike”, deklaroi Kurti.

Ai shtoi se modeli i xhandarmërisë nuk është i panjohur në Evropë, duke theksuar se struktura të tilla funksionojnë edhe në shtete të tjera evropiane si pjesë e sistemit të sigurisë kombëtare./Albinfo.ch

Kosova është tronditur nga dy raste të rënda vrasjeje të ndodhura brenda pak orësh në Mitrovicë dhe Prishtinë, përcjell albinfo.ch.

Një ngjarje tragjike ka ndodhur mbrëmjen e së mërkurës në Mitrovicë, ku një 37-vjeçar ka humbur jetën si pasojë e goditjeve me thikë, ndërsa vëllai i tij ka mbetur i plagosur.

Sipas njoftimit të Prokurorisë Themelore në Mitrovicë, rasti ka ndodhur më 27 maj 2026 në Lagjen e Romëve, ku fillimisht kishte shpërthyer një konflikt verbal që më pas eskaloi në përdorimin e një arme të ftohtë.

Viktima ka ndërruar jetë si pasojë e plagëve të marra në pjesën e fytit, ndërsa vëllai i tij është dërguar për trajtim mjekësor.

Policia ka ndërhyrë menjëherë në vendin e ngjarjes dhe ka arrestuar një person të dyshuar për vrasjen. Me urdhër të prokurorit kujdestar për Krime të Rënda, i dyshuari është ndaluar për 48 orë, ndërsa Prokuroria pritet të kërkojë caktimin e paraburgimit.

Ndërkohë, një tjetër vrasje ka ndodhur mbrëmjen e së enjtes në Prishtinë. Një person ka mbetur i vrarë në rrugën “Sali Nivica” pas të shtënave me armë zjarri.

Lajmin e ka konfirmuar zëdhënësi i Policisë së Kosovës, Enis Pllana, i cili bëri të ditur se ekipi mjekësor ka konstatuar vdekjen e viktimës në vendin e ngjarjes.

Policia dhe prokuroria kanë nisur hetimet për zbardhjen e plotë të rrethanave të rastit dhe identifikimin e autorëve. /Albinfo.ch

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, mori pjesë në takimin ministror të CEFTA-s të mbajtur në Bruksel, takim i cili këtë vit u kryesua nga ministrja e Shtetit për Sipërmarrjen dhe Klimën e Biznesit e Shqipërisë, Delina Ibrahimaj, pasi Shqipëria mban kryesimin e CEFTA-s gjatë vitit 2026, përcjell albinfo.ch.

Në adresimin e saj para përfaqësuesve të vendeve anëtare të CEFTA-s, Kusari-Lila tha se Kosova e mirëpret mundësinë për të diskutuar hapur për arritjet dhe sfidat e procesit të CEFTA-s, duke theksuar se integrimi gradual në Tregun e Vetëm të Bashkimit Evropian duhet të jetë më shumë sesa vetëm një zotim në dokumente.
Ministrja rikujtoi se edhe para 15 vitesh, gjatë mandatit të saj të parë si ministre e Industrisë dhe Tregtisë, kishte ngritur shqetësime për mangësitë në funksionimin e CEFTA-s, duke shtuar se disa nga ato probleme vazhdojnë të jenë ende të pranishme.
Ajo theksoi se Kosova ka dëshmuar seriozitet dhe qasje konstruktive gjatë kryesimit të CEFTA-s në vitin 2025, duke avancuar Planin e Veprimit për Tregun e Përbashkët Rajonal, nismën Green Lanes, Strategjinë e Menaxhimit të Rrezikut, njohjen e shërbimeve elektronike të besimit dhe Programin e Operatorit Ekonomik të Autorizuar.
Sipas saj, për herë të parë Kosova kryesoi CEFTA-n në emrin e saj dhe jo përmes UNMIK-ut, duke e përdorur këtë mandat për ndërtim bashkëpunimi dhe jo për krijim pengesash politike.
Kusari-Lila bëri të ditur se Kuvendi i Kosovës ka ratifikuar Protokollet Shtesë 5, 6 dhe 7 të CEFTA-s për lehtësimin e tregtisë, tregtinë e shërbimeve dhe zgjidhjen e mosmarrëveshjeve, duke kërkuar që të gjitha palët të tregojnë të njëjtin përkushtim institucional.
Ajo tha se për Kosovën, CEFTA nuk është një koncept abstrakt, pasi vendimet që merren në këtë mekanizëm ndikojnë drejtpërdrejt te bizneset, eksportuesit dhe qytetarët e vendit. Sipas të dhënave të prezantuara nga ministrja, gjatë vitit 2025 tregtia e jashtme totale e Kosovës ka arritur në 7.9 miliardë euro, ndërsa eksportet drejt vendeve të CEFTA-s kanë arritur në 431.5 milionë euro, ose 45.8% të eksporteve totale të vendit.
Në fjalimin e saj, ministrja ngriti shqetësimin për barrierat tregtare dhe politizimin e proceseve brenda CEFTA-s, duke theksuar se marrëveshjet e tregtisë së lirë duhet të shërbejnë për heqjen e pengesave dhe jo për krijimin e tyre. Ajo paralajmëroi se, në mungesë të përgjigjeve konkrete ndaj barrierave të fundit tregtare, Kosova mund të shqyrtojë masa reciproke.
Gjatë takimit, Kusari-Lila prezantoi pesë prioritetet kryesore të Kosovës në kuadër të CEFTA-s.
Prioriteti i parë kishte të bënte me njohjen e vlerësimit të konformitetit dhe infrastrukturën e cilësisë. Ministrja theksoi se Kosova mbështet vetëm mekanizma që janë plotësisht në përputhje me standardet e Bashkimit Evropian, duke kundërshtuar krijimin e sistemeve paralele që devijojnë nga standardet evropiane.
Si prioritet të dytë, ajo përmendi harmonizimin e procedurave kufitare dhe të orarit të punës në pikat kufitare, si dhe avancimin e shkëmbimit elektronik të certifikatave veterinare dhe fitosanitare, me qëllim të lehtësimit të tregtisë rajonale dhe uljes së pritjeve në kufi.
Prioriteti i tretë lidhej me tregtinë e shërbimeve, njohjen e kualifikimeve profesionale dhe harmonizimin e procedurave për lejet e punës. Kusari-Lila tha se tregu i përbashkët rajonal nuk mund të jetë funksional pa lëvizje më të lirë të profesionistëve dhe shërbimeve ndërmjet vendeve të rajonit.
Në kuadër të prioritetit të katërt, ministrja kërkoi hyrjen në fuqi të Protokollit Shtesë 7 për zgjidhjen e mosmarrëveshjeve, duke vlerësuar se mungesa e një mekanizmi funksional po ndikon negativisht në besueshmërinë e CEFTA-s.
Ndërkaq, prioriteti i pestë kishte të bënte me tregtinë digjitale dhe avancimin e njohjes së shërbimeve elektronike të besimit sipas standardeve eIDAS 2.0 të Bashkimit Evropian, si dhe krijimin e mekanizmave të alarmit të shpejtë për produktet jokonforme dhe sigurinë ushqimore.
Ministrja theksoi se Kosova ka ardhur në këtë takim me protokolle të ratifikuara, me rezultate konkrete nga kryesimi i CEFTA-s dhe me infrastrukturë funksionale kufitare, duke kërkuar seriozitet reciprok dhe zbatim të marrëveshjeve nga të gjitha palët.
Ajo tha se Tregu i Përbashkët Rajonal dhe integrimi gradual në Tregun e Vetëm të Bashkimit Evropian ndërtohen përmes vendimeve konkrete, zbatimit të zotimeve dhe vullnetit politik të përbashkët.