Kryetari i Lidhjes Demokratike të Kosovës, Lumir Abdixhiku, ka uruar besimtarët myslimanë me rastin e festës së Kurban Bajramit, duke përcjellë mesazh paqeje, shëndeti dhe harmonie në familje, përcjell albinfo.ch.

Në urimin e tij, Abdixhiku ka theksuar rëndësinë e kësaj feste si kujtesë për vlerat e sakrificës, solidaritetit dhe kujdesit për ata që kanë nevojë.

Ai ka bërë thirrje që në këtë ditë të shenjtë qytetarët të jenë më pranë familjes, miqve dhe fqinjëve, si dhe të ofrojnë mbështetje për ata që kanë nevojë për shpresë dhe mirësi.

“Me fat Kurban Bajramin! Paçi gëzim, qetësi e mbarësi në çdo shtëpi tuajën”, ka shkruar Abdixhiku.

Kryeministri në detyrë i Kosovës, Albin Kurti, ka uruar qytetarët me rastin e festës së Kurban Bajramit, duke iu drejtuar besimtarëve myslimanë dhe shqiptarëve kudo që jetojnë, përcjell albinfo.ch.

Në mesazhin e tij, Kurti ka theksuar rëndësinë e vlerave si dashamirësia, zemërgjerësia dhe solidariteti, duke bërë thirrje që ato të udhëheqin jetën e përditshme dhe marrëdhëniet shoqërore.

“Gëzuar festën e Kurban Bajramit besimtarëve myslimanë, qytetarëve tanë, shqiptarëve kudo! Le të udhëhiqemi çdo ditë nga dashamirësia dhe zemërgjerësia, solidariteti dhe respekti… Paçim gjithmonë mirësi, begati e mbarësi”, ka shkruar Kurti në urimin e tij./Albinfo.ch

Vjosa Osmani ka uruar festën e Kurban Bajrami, duke theksuar rëndësinë e besimit, solidaritetit dhe kujdesit ndaj njëri-tjetrit.

Përmes një postimi në Facebook, Osmani ka deklaruar se kjo festë kujton forcën e besimit në Zot dhe vlerën e solidaritetit njerëzor.

Ajo ka bërë thirrje që në këto ditë të bekuara të hapen zemrat për më shumë dashuri dhe kujdes, veçanërisht për ata që kanë nevojë për mbështetje dhe ngrohtësi.

“Uroj që Kurban Bajrami të sjellë paqe në zemrat tuaja, harmoni në familje, shëndet, begati dhe gëzim në çdo vatër. Qoftë kjo festë një moment bashkimi, faljeje dhe shprese për ditë më të mira për të gjithë. Me fat Kurban Bajrami!”, ka shkruar ajo.

Kongresistë amerikanë takojnë Kurtin në Prishtinë, fokus të drejtat e pakicave në Kosovë dhe Luginë

Dy kongresistë të Shteteve të Bashkuara të Amerikës, Keith Self dhe Suhas Subramanyam, pritet të takohen sot me kryeministrin në detyrë të Kosovës, Albin Kurti, në ndërtesën e Qeverisë së Kosovës në Prishtinë, në orën 11:50.

Sipas Zyrës së Kryeministrit, delegacioni amerikan gjatë vizitës së tij në Kosovë do të zhvillojë takime me përfaqësues të institucioneve qendrore, si dhe me autoritete të sigurisë ndërkombëtare. Gjithashtu janë paraparë takime me shoqërinë civile dhe përfaqësues të mediave.

Gjatë vizitës së tij në Luginën e Preshevës, kongresisti republikan Keith Self deklaroi se ekzistojnë “probleme reale” mes shqiptarëve dhe Serbisë, duke theksuar se qëllimi i vizitës është vlerësimi i gjendjes së pakicave në të dyja vendet.

Ndërkohë, kongresisti demokrat Suhas Subramanyam ngriti shqetësime lidhur me sistemin arsimor dhe zhvillimin e pabarabartë të shqiptarëve në Serbi, duke i cilësuar këto si çështje të rëndësishme të të drejtave të pakicave.

Kryetarja e Komunës së Preshevës, Ardita Sinani, tha se vizita e kongresistëve amerikanë është sinjal pozitiv se çështjet e shqiptarëve në Luginë po marrin vëmendje ndërkombëtare.

Edhe deputeti i vetëm shqiptar në Parlamentin e Serbisë, Shaip Kamberi, theksoi se ndërsa Serbia kërkon standarde të larta për serbët në Kosovë, të njëjtat standarde nuk po zbatohen për shqiptarët në Luginën e Preshevës.

Sot, besimtarët myslimanë në gjithë botën festojnë Kurban Bajramin, përcjell albinfo.ch.

Manifestimi qendror për territorin e Kosovës, kushtuar festës së Kurban Bajramit, është mbajtur në Xhaminë e Madhe në Prishtinë.

Namazi i Kurban-Bajramit është falur në orën 05:40.

Thirrjet për unitet, dashuri e solidaritet ishin në qendër të mesazhit të myftiut të Kosovës, Naim Tërnava në ligjëratën e mbajtur të mërkurën, gjatë manifestimit qendror të Kurban Bajramit, në Xhaminë e Madhe në Prishtinë.

Në ligjëratën para besimtarëve, Tërnava theksoi se Kosova ka nevojë për stabilitet ekonomik e politik, institucione funksionale dhe përgjegjësi shtetërore, derisa kritikoi përplasjet politike dhe interesat e ngushta partiake.

Ai tha se qytetarët janë lodhur nga konfliktet e vazhdueshme politike dhe zgjedhjet e njëpasnjëshme, të cilat, sipas tij, kanë krijuar pasiguri për të ardhmen.

“Vendi ka nevojë për stabilitetin ekonomik e politik dhe institucione funksionale e përgjegjësi shtetërore. Fatkeqësisht, interesat e ngushta grupore, përplasjet e pafundme të partive tona, kanë lodhur qytetarët tanë dhe kanë krijuar pasiguri për të ardhmen. Mbajtja e zgjedhjeve të njëpasnjëshme, mungesa e unitetit institucional, nuk i shërbejnë Kosovës, por dobësojnë besimin qytetar dhe zbehin shpresën e brezit të rii. Nuk mund të ketë interes më të madh se interesi i atdheut. Nuk mund të ketë armiqësi personale mbi fatin e Kosovës. Stabiliteti i shtetit dhe mirëqenia e qytetarit janë përgjegjësi historike që kërkojnë maturi, urtësi dhe vizion kombëtar”, tha myftiu Tërnava.

Ai bëri thirrje që fushata për zgjedhjet e parakohshme që do të mbahen më 7 qershor të zhvillohen me maturi dhe dinjitet, duke u bazuar në ide dhe vizion. Ndërsa ftoi edhe qytetarët që të ushtrojnë të drejtën e tyre për të votuar lirshëm.

“Në këtë fushatë parazgjedhore le të mos ketë vend për gjuhë të urrejtjes, fyerje, lincim, akuza të pabazuara dhe njollosje të njëri-tjetrit me akuza të pavërteta vetëm për një votë. Një fushatë e ndërtuar me përçarje dhe shpifje nuk i shërben Kosovës dhe as të ardhmes së saj. Le të mbizotërojë dinjiteti dhe kultura demokratike e dialogut. Le të ketë respekt të mendimit ndryshe… Mbesim me shpresë se pas këtyre zgjedhjeve, faktori politik të reflektojë me maturi dhe përgjegjësi shtetërore, që institucionet e vendit të formohen sa më shpejtë dhe të krijohet stabiliteti politik institucional për të punuar bashkërisht për të ardhmen e Kosovës, mirëqenien e qytetarëve dhe të ardhmen e të rinjve… Vetëm të bashkuar mund t’i përballojmë sfidat”, tha ai.