Archives

Izolimi çon në më shumë mosbesim, thotë një studim zviceran

Posted on by BR

Një studim i udhëhequr nga Universiteti i Bernës ka arritur në përfundimin se izolimi afatgjatë dhe jetesa në kushte ekstreme rrisin ndjenjën e vetmisë, mosbesimin dhe konfliktet mes njerëzve. Hulumtimi u realizua tek një grup prej 12 personash që kaluan dhjetë muaj në stacionin kërkimor Concordia në Antarktidë, shkruan swissinfo.ch, transmeton albinfo.ch.

Sipas studiuesve, pjesëmarrësit raportuan rritje të konflikteve dhe mendimeve paranojake, ndërsa ndjenja e bashkëpunimit dhe performanca e ekipit ranë gradualisht gjatë misionit. Të dhënat treguan se edhe kontakti i vazhdueshëm fizik nuk solli më shumë afërsi, por në shumë raste shtoi tensionet dhe mosbesimin.

Studimi zbuloi gjithashtu se grupi nisi të ndahej sipas kombësive, duke rritur rrezikun e polarizimit social dhe konflikteve të brendshme. Ekspertët paralajmërojnë se këto rezultate janë të rëndësishme për misionet e ardhshme hapësinore, nëndetëset dhe ambientet e tjera ku njerëzit jetojnë për periudha të gjata në izolim.

Hulumtuesit theksojnë nevojën për mbështetje psikologjike dhe monitorim të vazhdueshëm të marrëdhënieve sociale në mjedise të tilla ekstreme, për të shmangur përkeqësimin e gjendjes mendore dhe konfliktet brenda ekipeve.

Mbi 550 mijë vetura pa kontroll teknik në Zvicër

Posted on by BR

Autoritetet kantonale në Zvicër po përballen me vonesa të mëdha në kryerjen e kontrolleve teknike të detyrueshme për automjetet, duke lënë mbi 550 mijë vetura pa inspektim në të gjithë vendin.

Sipas mediave zvicerane, shërbimet përgjegjëse nuk po arrijnë të përballojnë fluksin e automjeteve që duhet të kalojnë kontrollin periodik teknik. Situata ka ngritur shqetësime për sigurinë në trafik dhe gjendjen teknike të makinave që vazhdojnë të qarkullojnë pa verifikim zyrtar, transmeton albinfo.ch.

Ekspertët paralajmërojnë se plakja e flotës së automjeteve dhe rënia e blerjeve të makinave të reja po ndikojnë gjithashtu në rritjen e numrit të automjeteve që kërkojnë kontrolle më të shpeshta.

Në Zvicër, kontrolli teknik i automjeteve është i detyrueshëm dhe kryhet periodikisht nga autoritetet kantonale për të garantuar standardet e sigurisë dhe emetimeve në trafik.

Lufta mund të sjellë rritje të qirave në Zvicër

Posted on by BR

Banka zvicerane Raiffeisen paralajmëron se çmimet e qirave në Zvicër mund të rriten sërish në muajt në vazhdim, si pasojë e tensioneve gjeopolitike dhe luftërave që po ndikojnë ekonominë globale.

Sipas ekspertëve, rritja e çmimeve të energjisë dhe materialeve të ndërtimit, e lidhur me konfliktet ndërkombëtare, po ushtron presion të ri mbi tregun e banesave. Në të njëjtën kohë, mungesa e apartamenteve të lira dhe ndërtimet e ulëta po e përkeqësojnë situatën, transmeton albinfo.ch.

Raiffeisen vlerëson se kërkesa për banesa mbetet shumë më e lartë sesa oferta, ndërsa normat e ulëta të banesave të lira historikisht kanë sjellë rritje më të forta të qirave.

Tema e kostos së jetesës dhe strehimit vazhdon të mbetet ndër shqetësimet kryesore për banorët në Zvicër, sidomos në qytetet e mëdha si Cyrihu dhe Gjeneva.

KQZ sqaron mungesën e shiritit ngjitës në votimin me postë

Posted on by Drin Reçica

Central Election Commission of Kosovo ka dalë me një sqarim zyrtar pas shqetësimeve të ngritura nga disa votues jashtë Kosovës lidhur me mungesën e shiritit ngjitës në pakot e votimit përmes postës, përcjell albinfo.ch

Sipas KQZ-së, procesi i votimit jashtë vendit është i rregulluar dhe i siguruar me mekanizma të tjerë mbrojtës, ndërsa mungesa e shiritit shtesë ngjitës nuk ndikon në vlefshmërinë e fletëvotimit.

“Ashtu si në zgjedhjet e parakohshme për Kuvendin e Kosovës të mbajtura në dhjetor 2025, edhe në zgjedhjet aktuale nuk është paraparë përdorimi i shiritit ngjitës të KQZ-së”, thuhet në reagim.

Institucioni sqaron se zarfi i fshehtësisë mbyllet me ngjitësin standard të vet zarfit dhe se procesi mbetet plotësisht i sigurt.

KQZ ka bërë të ditur se fletëvotimet përmbajnë elemente të shumta sigurie, përfshirë mikroshtypin, UV printin dhe elementin “anti-copy”, të cilat shërbejnë për të parandaluar kopjimin apo falsifikimin.

Po ashtu, çdo fletëvotim i dërguar jashtë Kosovës është i vulosur në pjesën e pasme me vulë të zezë, për të cilën KQZ thekson se nuk nënkupton se bëhet fjalë për kopje të fletëvotimit.

Institucioni ka rikujtuar edhe procedurën e votimit me postë, duke sqaruar se fletëvotimi duhet të vendoset fillimisht në zarfin e fshehtësisë, më pas në zarfin kthyes së bashku me dëftesën e regjistrimit, dhe të dërgohet përmes postës.

Në fund, KQZ u ka bërë thirrje votuesve jashtë Kosovës që pakot e tyre të votimit të arrijnë në adresën përkatëse më së largu deri më 6 qershor 2026.

https://kqz-ks.org/sqarim-nga-kqz-lidhur-me-votimin-permes-postes/

/Albinfo.ch

Të huajt do të paguajnë dyfish për hyrjen në një pishinë publike në Zvicër

Posted on by Drin Reçica

Komuna e Porrentruy në kantonin Jura ka vendosur që nga vera e vitit 2026 të aplikojë tarifa dyfish më të larta për personat që nuk jetojnë apo nuk punojnë në Zvicër, veçanërisht për vizitorët nga Franca, përcjell albinfo.ch.

Vendimi vjen një vit pasi autoritetet lokale ndaluan përkohësisht hyrjen e qytetarëve nga Franca në pishinën komunale, pas ankesave për sjellje problematike dhe incidente të përsëritura.

Banorët lokalë kishin akuzuar disa të rinj francezë për ngacmim të vajzave të reja, përdorim të gjuhës së papërshtatshme, larje me të brendshme dhe madje sjellje të dhunshme pas vërejtjeve nga stafi i sigurisë.

Sipas rregullave të reja, të rriturit që nuk banojnë apo punojnë në Zvicër do të paguajnë 15 franga për hyrje në pishinë, në vend të 7.50 frangave. Ndërsa për të rinjtë tarifa do të jetë 10 franga në vend të 5 frangave.

Autoritetet lokale argumentojnë se masa synon të garantojë siguri dhe qetësi për vizitorët, ndërsa vendimi ka nxitur reagime dhe debat në opinionin publik./Albinfo.ch

Kamberi në takim me kongresistët amerikanë: Kërkohet barazi dhe respektim i të drejtave të shqiptarëve në Luginë

Posted on by Drin Reçica

Deputeti i vetëm shqiptar në Kuvendin e Serbisë, Shaip Kamberi, së bashku me kryetarin e Këshillit Kombëtar Shqiptar, Enkel Rexhepi, kanë zhvilluar një takim me kongresistët amerikanë Keith Self dhe Suhas Subramanyam, ku është diskutuar për pozitën e shqiptarëve në Luginën e Preshevës, përcjell albinfo.ch.

Kamberi e cilësoi këtë takim si një moment me rëndësi të veçantë për shqiptarët e Luginës dhe për perspektivën demokratike të rajonit, duke theksuar se gjatë bisedimeve kanë ngritur shqetësimet për politikat diskriminuese dhe përjashtuese të Beogradit zyrtar ndaj shqiptarëve.

Sipas tij, Serbia vazhdon të kërkojë standarde të larta për serbët në Kosovë, ndërsa të njëjtat standarde nuk i zbaton për shqiptarët në Preshevë, Bujanoc dhe Medvegjë.

“Regjimi aktual në Beograd vazhdon t’i trajtojë shqiptarët si problem politik dhe jo si qytetarë të barabartë”, ka deklaruar Kamberi, duke kërkuar barazi reale, përfaqësim proporcional dhe respektim të marrëveshjeve të nënshkruara.

Ai ka vlerësuar gjithashtu iniciativën e kongresistit amerikan Keith Self për projektligjin HR 6411, i cili kërkon nga Departamenti Amerikan i Shtetit përgatitjen e një raporti zyrtar mbi trajtimin e shqiptarëve dhe pakicave të tjera etnike në Serbi, me fokus të veçantë në Luginën e Preshevës.

Kamberi paralajmëroi se heshtja ndaj padrejtësive në Luginë rrezikon të nxisë emigrimin, pasigurinë dhe destabilitetin afatgjatë në rajon. Ai theksoi se shqiptarët në Luginën e Preshevës mbeten të përkushtuar ndaj paqes, bashkëjetesës dhe orientimit euro-atlantik, por se pa barazi reale dhe zhvillim ekonomik, rreziku i zbrazjes demografike mbetet serioz. /Albinfo.ch

Ekspertët paralajmërojnë: Kufizimi i emigracionit mund të shkaktojë mungesë të fuqisë punëtore në Zvicër

Posted on by Drin Reçica

Partia zvicerane Swiss People’s Party ka bërë të ditur se, nëse iniciativa e saj “Jo 10 milionëve” miratohet në referendumin e 14 qershorit, rreth 40 mijë qytetarë nga Bashkimi Evropian do të lejohen ende të vijnë për të punuar në Zvicër, përcjell albinfo.ch.

Kjo shifër është afërsisht 20 mijë më e ulët krahasuar me numrin e emigrantëve që kanë hyrë në tregun zviceran të punës gjatë viteve të fundit.

Megjithatë, ekspertët ekonomikë paralajmërojnë se një kufizim i tillë mund të krijojë probleme serioze për tregun e punës në vend. Ekonomisti Hendrik Budliger theksoi se 40 mijë punëtorë në vit “nuk do të ishin të mjaftueshëm për të garantuar stabilitetin e fuqisë punëtore”.

Sipas tij, numri i personave që dalin në pension tashmë është më i madh se numri i të rinjve që hyjnë në tregun e punës. Situata pritet të rëndohet edhe më shumë me pensionimin gradual të gjeneratës së “baby boomers”.

Ekspertët vlerësojnë se pa emigracionin, tregu i punës në Zvicër do të ishte në tkurrje prej vitesh, veçanërisht në sektorë ku mungesa e punëtorëve tashmë është e ndjeshme./Albinfo.ch

Mbi 200 milionë euro në ekonomi, frymëmarrje sociale apo inflacion i ri?

Posted on by BR

Sipas të dhënave të publikuara për inflacionin në Ballkan gjatë prillit 2026, Kosova renditet me normën më të lartë të rritjes së kostos së jetesës, rreth 7.5%.

Kjo do të thotë se qytetarët po paguajnë më shumë për ushqim, energji, qira, transport dhe shërbime bazë krahasuar me një vit më parë.

Në një situatë të tillë ekonomike, paralajmërimi i qeverisë për shpërndarjen e një pakoje sociale prej mbi 200 milionë eurosh hap një debat ekonomik.

Dilema profesionale është nëse do t’i ndihmojë qytetarët, apo do ta shtyjë inflacionin edhe më lart?

Në aspektin social, një pako e tillë mund të jetë lehtësim afatshkurtër për shumë familje, pensionistë, kategori sociale dhe punëtorë me paga të ulëta.

Kur fuqia blerëse bie dhe çmimet rriten vazhdimisht, ndërhyrja e shtetit shihet si mënyrë për të zbutur goditjen ekonomike.

Shumë qytetarë sot mezi arrijnë të përballojnë shportën bazike mujore, prandaj çdo mbështetje financiare krijon frymëmarrje të përkohshme.

Por, nga ana ekonomike e profesionale, ekziston edhe rreziku real që injektimi i mbi 200 milionë eurove në treg të ndikojë në rritjen e mëtejshme të çmimeve, sidomos nëse ekonomia nuk ka rritje të prodhimit vendor, dhe bazuar po ashtu mbi të dhënat, prodhimi vendas nuk është në kohën më të mirë të tij.

Prandaj, kur në treg futen shumë para, ndërsa oferta e mallrave mbetet pothuajse e njëjtë, zakonisht rritet kërkesa dhe bizneset fillojnë të rrisin çmimet.

Kjo është një nga format klasike të presionit inflacionist.

Kosova ka një ekonomi që mbështetet kryesisht në importe.

Kjo do të thotë se një pjesë e madhe e parave të pakos sociale mund të përfundojë duke rritur konsumin e produkteve të importuara, pa krijuar prodhim të ri brenda vendit.

Në këtë rast, efekti mund të jetë më shumë para në qarkullim, por jo më shumë mallra vendore dhe si pasojë, çmime më të larta.

Pra, pakoja sociale mund të ndihmojë qytetarët në afat të shkurtër, por njëkohësisht mund të krijojë presion shtesë mbi inflacionin nëse ekonomia nuk arrin ta absorbojë atë përmes prodhimit dhe ofertës reale në treg.

Sfida kryesore nuk është vetëm shpërndarja e parave, por mënyra se si ato hyjnë në ekonomi dhe çfarë efekti krijojnë më pas.

Nga aspekti profesional, paratë që shpërndahen nga qeveria nën siglën “antiinflacion”, ka efektin bumerang, dhe me të drejtë konsiderohet si veprim me ndikim në zgjedhje!

Ose, po harrojmë se gjendja e jashtëzakonshme covid19 ka përfunduar!

Ftesë për pjesëmarrje në librin “Dritë mbi plagë 2”

Posted on by albinfo.ch

Të nderuar autorë,

Në vazhdën e angazhimeve tona për të sensibilizuar mbi gjenocidin që ka kryer Serbia në Kosovë, ju ftojmë të bëheni pjesë e përmbledhjes së poezive “Dritë mbi plagë 2”, një projekt letrar që synon të ruajë kujtesën kolektive dhe të fuqizojë zërin artistik mbi një nga periudhat më të dhimbshme të historisë sonë.

Ftohen të gjithë autorët të kontribuojnë me krijimet e tyre poetike. Çdo autor mund të dërgojë deri në tri (3) poezi, të cilat duhet të jenë të lidhura tematikisht me krimin e gjenocidit në Kosovë, duke trajtuar përjetimet, kujtesën, dhimbjen, qëndresën dhe shpresën.

Afati i fundit për dorëzim është: 31 korrik 2026

Për më shumë informacione dhe për dorëzimin e punimeve, ju lutemi kontaktoni në:

[email protected]

Me respekt,

Qendra – “Gjenocidi në Kosovë – plagë e hapur”

Në emër të redaksisë,

Isuf Sherifi

Gjenevë, 23 maj 2026

Mentaliteti i shtetndërtimit mes Singaporit dhe Kosovës

Posted on by albinfo.ch

Ka vende me politikanë që ndërtojnë qytetarë optimistë, si Singapori. Dhe ka vende me politikanë që prodhojnë pesimizëm kolektiv, siç është Kosova.

Dallimi nuk fillon te pasuria.As te madhësia e shtetit.Fillon te përgjegjësia kolektive dhe kultura shtetformuese.

Në Kosovë ekziston një figurë interesante sociale: taksisti.

Prej vitesh, gazetarët shqiptarë e kanë përdorur si “barometrin” e realitetit, sepse ai është gjithmonë në rrugë, dëgjon histori, takon njerëz të të gjitha shtresave dhe e sheh përditshmërinë pa syrin e propagandës politike.

Por taksisti shqiptar shpesh të jep ndjesinë e një njeriu të dorëzuar.

Ai flet për jetën si barrë.Për shtetin si mashtrim.Për të ardhmen si për diçka që nuk vjen kurrë.

Ky depresion ka filluar të bëhet kolektiv dhe është shndërruar edhe në pjesë të humorit urban.

Storja e mërgimtarit të moshuar që vdes në motel për shkak të mbidozës së Viagrës ilustron këtë gjendje në mënyrë groteske.

Ironia qëndron në faktin se një mërgimtar i moshuar vjen nga Zvicra për të kaluar disa ditë pasioni me të dashurën që e ka në Kosovë.

Sapo ateron në Kosovë, merr një Viagra që të jetë gati për sfidën që e pret psh. në një nga motelet e Gjilanit.

Por deri sa mbërrin në Gjilan, taksisti ia shuan gjithë entuziazmin me rrëfime për korrupsionin, varfërinë, padrejtësinë dhe mungesën e shpresës.

Kur arrin në motel, ndien nevojën për Viagrën e dytë që ta përfundojë “misionin shpirtëror”, pa e menduar fatalitetin e mbidozës, e cila epshin për dashuri të vonshme, pak a shumë si patriotizmin e vonshëm, e mbyll me fatalitet.

Ky është humor brutal.
Por nuk është krejt i trilluar.

Sepse brenda tij fshihet një e vërtetë e hidhur:depresioni shoqëror ka filluar të kthehet në identitet.

Dhe kur ky mentalitet mbështetet edhe nga diaspora, që jeton në vende shumë më funksionale se Kosova, atëherë kjo bëhet alarm për të ardhmen e vendit.

Sepse i krijon luksin politikanit demagog që të vazhdojë t’i ushqejë qytetarët me emocione momentale, patriotizëm folklorik dhe premtime që zgjasin vetëm deri në zgjedhjet e ardhshme.
Por që janë fatale për të ardhmen e vendit.

Sepse mbidoza nuk mbyt vetëm në dashuri. Mbyt edhe kur shfaqet përmes një patriotizmi që në thelb nuk ekziston.

Sido që të jetë, në Singapor përjetova diçka krejt tjetër.

Përdora disa herë taksinë dhe nga bisedat me shoferët mësova një detaj që më la mbresë: këtë profesion nuk mund ta ushtrojnë të huajt. Taksi mund të drejtojnë vetëm vendasit.

Jo rastësisht.

Shteti e ka kuptuar se taksisti është ambasadori i parë i vendit. Ai është njeriu që turisti takon i pari. Nëse ai mashtron, vjedh apo krijon ndjenjën e kaosit, dëmtohet imazhi i të gjithë shtetit.

Ky është niveli i mendimit shtetëror në Singapor:kujdes deri në detaj.

Singapori nuk kishte pasuri natyrore.Nuk kishte territor të madh.Madje kishte mungesë uji.

Por kishte politikanë vizionarë.

Nën udhëheqjen e Lee Kuan Yew, vendi ndërtoi administratë efikase, luftoi korrupsionin, investoi në arsim dhe krijoi disiplinë shtetërore.

Brenda pak dekadash, Singapori u bë një nga shtetet më të zhvilluara në botë.Sot gjithçka funksionon:pastërtia, siguria, ligji dhe institucionet.

Por, siç thoshte taksisti, të rinjtë nuk e duan atë. Ata e urrejnë, sepse nuk janë të vetëdijshëm për rrugën e vështirë dhe sakrificën që është bërë për të arritur deri këtu.

Dhe pikërisht aty mendova për Kosovën. Edhe Kosova është ndërtuar mbi sakrificë.

Figura si Rugova e Thaçi me UÇK-në në krye mbeten pjesa më lavdishme e shtetformimit të Kosovës. Megjithatë, ata shpesh fyhen, urrehen dhe nuk pëlqehen nga një pjesë e elitës politike dhe votuesve të rinj.

Politika aktuale është mbushur me populizëm, propagandë dhe përçarje, ndërsa ndërtimi i institucioneve ka mbetur në plan të dytë.

Një lider i madh nuk matet me fjalime patriotike. Matet me institucionet që lë pas.

Dallimi mes shteteve të zhvilluara dhe atyre të dobëta nuk është racor. As kulturor.Është institucional.Është politik.

Popujt e zhvilluar nuk kanë ADN më të mirë.Kanë institucione më të mira.Kanë ligje që respektohen, në radhë të parë nga politikanët dhe pastaj nga popullata.

Popujt e zhvilluar kanë politianë që mendojnë për shtetin dhe jo për pushtetin.

Singapori është prova se edhe një vend i vogël mund të bëhet fuqi globale kur ndërtohet mbi meritokraci, disiplinë dhe shtet funksional.

Kosova ende ka mundësi.

Por asnjë shoqëri nuk zhvillohet duke e kthyer pesimizmin në identitet kombëtar.

Sepse në fund, edhe mënyra si flet taksisti për vendin e vet është pasqyrë e shtetit që politika ka ndërtuar.

Dhe ju, qytetarë të Kosovës e ju diasporë shqiptare, jeni të lirë të votoni kë të doni.

Por lini inatet.
Mendoni për shtetin.
Mos votoni ata që jetojnë nga britmat, përçarja dhe emocionet momentale.

Sepse shtetet nuk ndërtohen me britma:“Rroftë mbreti, poshtë mbreti”.

As me viktimizim të përhershëm.As me patriotizëm sezonal.

Shteti ndërtohet me përgjegjësi kolektive.

Dhe mbi të gjitha:me politikanë që mendojnë për shtetin më shumë sesa për pushtetin.

Bekim Dalipi

Lexoni po ashtu:

Australia nga afër, mes pafundësisë, heshtjes dhe rendit

Ferrari prezanton veturën e parë plotësisht elektrike, çmimi arrin 640 mijë dollarë

Posted on by Drin Reçica

Ferrari ka prezantuar zyrtarisht veturën e saj të parë plotësisht elektrike, të quajtur Ferrari Luce, me një çmim fillestar prej rreth 640 mijë dollarësh, transmeton albinfo.ch.

Modeli i ri paraqet një ndryshim të madh për markën italiane të superveturave, pasi “Luce” është gjithashtu modeli i parë i Ferrarit me pesë ulëse.

Vetura është zhvilluar në bashkëpunim me agjencinë LoveFrom, të themeluar nga ish-shefi i dizajnit të Apple, Jony Ive.

Prezantimi i modelit ka nxitur reagime të shumta në rrjetet sociale dhe mediat ndërkombëtare, ku disa e kanë cilësuar si një revolucion në dizajn, ndërsa të tjerë kanë kritikuar largimin e Ferrarit nga identiteti tradicional i markës.

Sipas raportimeve të BBC, drejtori ekzekutiv i Ferrarit, Benedetto Vigna, deklaroi se zhvillimi i modelit “Luce” ka zgjatur rreth pesë vite.

Emri “Luce”, që në italisht do të thotë “dritë”, shënon hyrjen historike të Ferrarit në tregun e automjeteve elektrike, pasi kompania deri më tani kishte preferuar prodhimin e modeleve hibride.

Modeli elektrik është i pajisur me motorë elektrikë të prodhuar nga vetë Ferrari për secilën rrotë, duke i mundësuar automjetit të arrijë shpejtësinë 96 kilometra në orë për rreth 2.5 sekonda.

Ndërkohë, rivalë si Lamborghini dhe Porsche kanë reduktuar planet për automjete elektrike për shkak të kërkesës më të ulët në treg dhe konkurrencës në rritje nga prodhuesit kinezë./Albinfo.ch

Abdixhiku publikon pamje nga tubimi me mërgatën në Cyrih: “LDK është dashni”

Posted on by Drin Reçica

Kandidati për kryeministër nga Democratic League of Kosovo, Lumir Abdixhiku, ka publikuar një video nga tubimi i mbajtur me mërgatën shqiptare në Cyrih, përcjell albinfo.ch.

Në pamjet e shpërndara në rrjetet sociale shihen një numër i madh bashkatdhetarësh duke realizuar fotografi me Abdixhikun, si dhe momente përqafimesh dhe përshëndetjesh gjatë aktivitetit.

“LDK është dashni. Ju faleminderit”, ka shkruar Abdixhiku krahas videos së publikuar.

Tubimi në Cyrih u zhvillua në kuadër të takimeve të LDK-së me diasporën shqiptare në Zvicër, ku fokusi ishte te komunikimi me mërgatën dhe prezantimi i programit politik të partisë./Albinfo.ch

Zvicra voton për iniciativën “Jo një Zvicër me 10 milionë banorë”

Posted on by Drin Reçica

Më 14 qershor, qytetarët e Switzerland do të votojnë për iniciativën “Keine 10-Millionen-Schweiz” (“Jo një Zvicër me 10 milionë banorë”), e cila synon të kufizojë popullsinë rezidente të vendit në maksimum 10 milionë banorë, përcjell albinfo.ch. 

Sipas iniciativës, nëse popullsia e përhershme e Zvicrës tejkalon 9.5 milionë banorë para vitit 2050, Qeveria dhe Parlamenti zviceran do të duhet të ndërmarrin masa në fushën e azilit dhe veçanërisht në ribashkimin familjar në kuadër të marrëveshjes për lëvizjen e lirë të personave.

Në rast se numri i banorëve kalon kufirin prej 10 milionësh, iniciativa parasheh që Qeveria zvicerane të nisë procedurat për ndërprerjen e marrëveshjeve ndërkombëtare përkatëse, përfshirë edhe marrëveshjen me European Union për lëvizjen e lirë të personave, brenda një periudhe dyvjeçare.

Mbështetësit e iniciativës argumentojnë se masa të tilla janë të nevojshme për të kufizuar migracionin dhe për të ruajtur kapacitetet infrastrukturore dhe ekonomike të vendit.

Në anën tjetër, kundërshtarët paralajmërojnë se iniciativa mund të rrezikojë ekonominë dhe mirëqenien e Zvicrës, duke ndikuar negativisht në tregun e punës dhe marrëdhëniet me Bashkimin Evropian.

Debati rreth kësaj çështjeje ka marrë vëmendje të madhe në opinionin publik zviceran, ndërsa mediat vendase po zhvillojnë emisione dhe analiza të shumta lidhur me pasojat e mundshme të referendumit./Albinfo.ch 

Video SRF

SHBA-ja kryen sulme të reja ndaj objektivave iraniane

Posted on by Drin Reçica

SHBA-ja ka njoftuar për sulme të reja ushtarake ndaj objektivave në jug të Iran, duke pretenduar se janë goditur pozicione raketore iraniane dhe anije që po përpiqeshin të vendosnin mina, përcjell albinfo.ch.

Sipas deklaratës së “United States Central Command”, sulmet janë kryer në kuadër të “vetëmbrojtjes” dhe kishin për qëllim mbrojtjen e trupave amerikane nga kërcënimet e paraqitura nga forcat iraniane.

Zëdhënësi i Komandës Qendrore amerikane, Tim Hawkins, deklaroi se ushtria amerikane po vazhdon të mbrojë forcat e saj, duke treguar njëkohësisht “përmbajtje gjatë armëpushimit të vazhdueshëm” ndërmjet dy vendeve.

Deri më tani, autoritetet iraniane nuk kanë reaguar zyrtarisht ndaj sulmeve të fundit amerikane. Megjithatë, zëdhënësi i Ministrisë së Jashtme iraniane, Esmail Baqai, kishte deklaruar më herët se, megjithëse është arritur progres në bisedimet për përfundimin e konfliktit, një marrëveshje ende “nuk është afër”.

Pas sulmeve, sekretari amerikan i Shtetit, Marco Rubio, tha se një marrëveshje mes palëve mbetet ende e mundur, duke përmendur edhe bisedimet e zhvilluara mes negociatorëve iranianë dhe kryeministrit të Qatar.

Rubio theksoi gjithashtu rëndësinë strategjike të ngushticave detare në rajon, duke deklaruar se ato “duhet të mbeten të hapura”, ndërsa situatën aktuale e cilësoi si të paligjshme dhe të papranueshme për stabilitetin global./Albinfo.ch

Delegacion i kongresistëve amerikanë viziton Luginën e Preshevës dhe Kosovën

Posted on by Drin Reçica

Një delegacion i kongresistëve amerikanë, i përbërë nga Keith Self dhe Suhas Subramanyam, do të zhvillojë një vizitë zyrtare në Luginën e Preshevës dhe në Kosovë nga 26 deri më 28 maj, në koordinim me organizatën Albanians for America, transmeton albinfo.ch.

Sipas njoftimit, qëllimi i vizitës është forcimi i partneritetit strategjik ndërmjet United States dhe Kosovo, diskutimi i zhvillimeve të sigurisë rajonale, si dhe mbështetja për të drejtat dhe pozitën e shqiptarëve në rajon.

Delegacioni fillimisht do të vizitojë Luginën e Preshevës, ku do të zhvillojë takime me përfaqësues politikë shqiptarë, drejtues të komunave të Preshevës dhe Bujanocit, si dhe me Këshillin Kombëtar Shqiptar.

Në fokus të këtyre takimeve do të jenë të drejtat e shqiptarëve në Luginë, zhvillimet politike dhe sfidat me të cilat përballet komuniteti shqiptar në këtë pjesë të rajonit.

Gjatë qëndrimit në Kosovë, kongresistët amerikanë do të takohen me institucionet shtetërore, përfaqësues të shoqërisë civile dhe mediave, si dhe me autoritetet amerikane dhe ndërkombëtare të sigurisë në Camp Bondsteel, baza kryesore e forcave amerikane në Kosovë.

Vizita zhvillohet në një periudhë të angazhimit të shtuar të Kongresit amerikan për sigurinë dhe stabilitetin në Ballkanin Perëndimor, si dhe për avancimin e integrimit euro-atlantik të Kosovës.

Kongresisti Keith Self kishte prezantuar më herët në Kongresin amerikan një iniciativë ligjore lidhur me gjendjen e shqiptarëve në Luginën e Preshevës, ndërsa së fundmi, së bashku me kongresistët Ritchie Torres dhe Mike Lawler, ka paraqitur edhe një rezolutë që mbështet integrimin e Kosovës në NATO./Albinfo.ch

Petrit Halilaj me ekspozitë në galerinë prestigjioze “Hamburger Bahnhof” në Berlin

Posted on by Drin Reçica

Petrit Halilaj do të prezantohet me një ekspozitë të veçantë në Hamburger Bahnhof – Nationalgalerie der Gegenwart, një nga galeritë më prestigjioze të artit bashkëkohor në Gjermani, transmeton albinfo.ch.

Ekspozita organizohet nga Ambasada e Republikës së Kosovës në Berlin në bashkëpunim me artistin kosovar dhe shënon një moment të rëndësishëm kulturor për diasporën shqiptare në Gjermani.

Kjo javë përmbyll ekspozitën solo të Halilajt, e cila konsiderohet si më e madhja dhe më kompleksja në karrierën e tij artistike deri më tani. Vizitorët do të kenë mundësi të njihen nga afër me universin unik krijues të artistit, i njohur ndërkombëtarisht për ndërthurjen e kujtesës, identitetit dhe historive personale në artin bashkëkohor.

Hyrja do të jetë falas ekskluzivisht për bashkatdhetarët shqiptarë, të cilët mund të paraqiten në pikën e biletave me kodin “Syrigana”.

Një nga projektet më të veçanta të ekspozitës është edhe “SYRIGANA”, ku opera transformohet në një instalacion artistik ekspozues. Projekti ndërthur historinë e Adamit dhe Evës me këngë tradicionale nga Drenica, me kompozim nga Lugh O’Neil dhe interpretime nga sopranot Nina Guo dhe Urta Haziraj.

Gjatë vizitës, publiku do të ketë mundësi të ndjekë edhe provat gjenerale të koncertit “SYRIGANA”, duke parë nga afër orkestrën, aktorët, marionetat dhe procesin final të përgatitjeve para premierës në Berlin.

Në realizimin e këtij projekti kanë kontribuar edhe Filharmonia e Kosovës, diaspora shqiptare dhe institucione kulturore në Kosovë dhe Gjermani, duke e kthyer këtë ngjarje në një urë të rëndësishme artistike dhe kulturore mes dy vendeve./Albinfo.ch

Shqiptarja e parë që u prezantua në kopertinën e “Deutsche Dermatologie” rifiton shtetësinë e Kosovës

Posted on by Drin Reçica

Dr. Merita Hajdini-Zeqiri, dermatologe e njohur shqiptare që jeton dhe vepron në Bonn, ka ri-fituar shtetësinë e Republikës së Kosovës në një ceremoni të mbajtur në Konsullatën e Përgjithshme të Kosovës në Düsseldorf, transmeton albinfo.ch.

Vendimi për ri-fitimin e shtetësisë iu dorëzua nga Konsulli i Përgjithshëm i Kosovës në Düsseldorf, Behar Isma, i cili vlerësoi kontributin dhe sukseset profesionale të saj në Gjermani.

Dr. Hajdini-Zeqiri konsiderohet një ndër emrat e suksesshëm shqiptarë në fushën e dermatologjisë në Gjermani. Ajo ka shënuar një arritje të veçantë duke u bërë gruaja e parë shqiptare në Gjermani që është prezantuar në faqen e parë të revistës profesionale Deutsche Dermatologie, një vlerësim që pasqyron përkushtimin dhe suksesin e saj profesional.

Gjatë ceremonisë u theksua rëndësia e lidhjes së diasporës me vendin e origjinës, ndërsa ri-fitimi i shtetësisë u cilësua si dëshmi e ruajtjes së identitetit dhe lidhjeve të forta me Kosovën.

Konsullata e Kosovës në Düsseldorf falënderoi Dr. Merita Hajdini-Zeqiri për vizitën dhe i uroi asaj suksese të mëtejshme në jetën profesionale dhe personale./Albinfo.ch

 

Në Milano mbahet pasditja poetike “Riabbracciando la Poesia”

Posted on by Drin Reçica

Në ambientet e Konsullatës së Përgjithshme të Republikës së Shqipërisë në Milan është zhvilluar pasditja poetike “Riabbracciando la Poesia”, një aktivitet i dedikuar promovimit të kulturës, artit letrar dhe dialogut mes komuniteteve, përcjell albinfo.ch.

Në këtë ngjarje kulturore, autorët Angela Kosta dhe Fatmir R. Gjata prezantuan krijimtarinë e tyre përmes leximeve poetike dhe bashkëbisedimeve artistike me të pranishmit.

Sipas organizatorëve, aktiviteti krijoi një atmosferë reflektimi, emocioni dhe frymëzimi, ndërsa pjesëmarrja e komunitetit shqiptar, miqve italianë dhe dashamirësve të letërsisë vuri në pah rolin e kulturës si urë lidhëse mes popujve.

Konsullata Shqiptare në Milano vlerësoi se ngjarje të tilla kontribuojnë në forcimin e diplomacisë kulturore dhe promovimin e kulturës shqiptare në Itali.

Në fund të aktivitetit, organizatorët shprehën mirënjohje për autorët dhe të gjithë pjesëmarrësit që kontribuuan në realizimin dhe suksesin e kësaj mbrëmjeje poetike./Albinfo.ch

 

 

Swiss do të heqë Prishtinën prej orarit të fluturimeve nga Gjeneva

Posted on by albinfo.ch

Problemet me Airbus A220 po ndikojnë në orarin e fluturimeve të kompanisë ajrore Swiss. Disa avionë kanë qenë të bllokuar për muaj të tërë për shkak të problemeve me motorët dhe mungesave të mirëmbajtjes, transmeton albinfo.ch. Si rezultat, kompania ajrore Swiss, pjesë e Grupit Lufthansa, po zvogëlon shërbimet e saj nga Gjeneva në orarin dimëror 2026/27.

Kështu, Swiss nuk do të fluturojë më nga Gjeneva për në Berlin (Gjermani), Hamburg (Gjermani) dhe Prishtinë.

“Kjo për shkak të disponueshmërisë së vazhdueshme të ngushtë globale të avionëve dhe pjesëve rezervë të motorëve për flotën Airbus A220”, thuhet në një njoftim për shtyp, shkruan blick.ch. “Për të forcuar më tej stabilitetin operacional dhe sigurinë e planifikimit, Swiss po i përshtat shërbimet e saj nga Gjeneva në përputhje me rrethanat.”, vazhdon njoftimi.

Në të njëjtën kohë nga Gjeneva, rrjeti do të zgjerohet për të përfshirë 15 destinacione me distanca të shkurtra përveç destinacionit me distanca të gjata të Nju Jorkut, përcjell albinfo.ch. Nga Cyrihu, pasagjerët mund të zgjedhin nga 60 destinacione evropiane dhe 24 ndërkontinentale.

Swiss po shton gjithashtu Bengalurun, destinacionin e saj të parë në Indinë jugore, në rrjetin e saj të itinerareve. Fluturimet nga Cyrihu, që operojnë si fluturimi LX140, do të operojnë çdo ditë përveç të hënave dhe të mërkurave. Kohëzgjatja e fluturimit nga Cyrihu në Bengaluru është afërsisht 9 orë.

A është diaspora shkencore e Kosovës një potencial i pashfrytëzuar për zhvillimin e vendit?

Posted on by Drin Reçica

Një studim i ri nga studiuesit e migracionit Russell King dhe Ilir Gëdeshi hedh dritë mbi diasporën shkencore të Kosovës, duke analizuar përmasat, karakteristikat dhe potencialin e saj për të kontribuar në zhvillimin e vendit,  transmeton albinfo.ch.

Studimi, i publikuar nga Friedrich-Ebert-Stiftung, thekson se rrjeti global i profesionistëve të kualifikuar nga Kosova mbetet një burim i rëndësishëm, por ende i pashfrytëzuar në mënyrë institucionale.

Sipas raportit, një numër në rritje i studiuesve dhe profesionistëve me arsim të lartë nga Kosova jetojnë dhe punojnë jashtë vendit, kryesisht në Gjermani, Zvicër, Austri dhe Shtetet e Bashkuara të Amerikës, duke kërkuar kushte më të mira për kërkime shkencore dhe zhvillim profesional.

Autorët e përkufizojnë këtë komunitet si “diasporë shkencore”, duke theksuar se ai nuk duhet parë vetëm si “ikje e trurit”, por si një rrjet global ekspertize që mund të kontribuojë në mënyrë të drejtpërdrejtë në zhvillimin e Kosovës.

Studimi vë theks të veçantë në konceptin e “qarkullimit të trurit”, duke sugjeruar se bashkëpunimi duhet të kalojë nga kthimi fizik i individëve drejt krijimit të urave të vazhdueshme akademike dhe kërkimore me vendin e origjinës.

Raporti thekson se, ndonëse vetëm një pjesë e vogël e të anketuarve shprehin gatishmëri për t’u kthyer përfundimisht në Kosovë, shumica janë të hapur për bashkëpunime përmes projekteve kërkimore, mentorimit dhe ligjëratave afatshkurtra.

Një nga gjetjet kryesore është mungesa e një strategjie të mirëfilltë shtetërore për angazhimin e diasporës shkencore, duke bërë që bashkëpunimi aktual të mbetet kryesisht joformal dhe i bazuar në kontakte personale.

Në përfundim, studiuesit rekomandojnë krijimin e databazave kombëtare të ekspertëve, partneriteteve universitare dhe programeve të strukturuara për bashkëpunim shkencor, duke e konsideruar diasporën shkencore një nga asetet më të rëndësishme për të ardhmen e Kosovës. /Albinfo.ch

IKSHPK: 20 raste të konfirmuara me fruth në Kosovë, apel për vaksinim

Posted on by Alb

Instituti Kombëtar i Shëndetësisë Publike të Kosovës (IKShPK) ka bërë të ditur se në periudhën 16 prill – 25 maj 2026 janë regjistruar gjithsej 20 raste të fruthit në vend. Vetëm gjatë javës së fundit janë raportuar edhe dy raste të reja.

Sipas të dhënave të institutit, rastet janë të shpërndara në disa komuna: Ferizaj (7 raste), Prishtinë (4 raste), Kaçanik (4 raste), si dhe nga një rast në Lipjan, Fushë Kosovë, Gjilan, Shtime dhe Obiliq.

IKShPK thekson se të gjithë të prekurit janë persona të pavaksinuar me vaksinën MMR dhe kanë kërkuar trajtim spitalor.

Instituti u bën thirrje qytetarëve që në rast të simptomave si temperaturë e lartë, skuqje apo ndryshime në lëkurë, kollë dhe rrufë, të drejtohen menjëherë në institucionet shëndetësore.

Duke pasur parasysh natyrën shumë ngjitëse të fruthit, IKShPK apelon te prindërit që të verifikojnë statusin e vaksinimit të fëmijëve dhe të sigurojnë vaksinimin e tyre në qendrat e mjekësisë familjare.

Sipas institutit, vaksinimi mbetet masa më efektive dhe më e sigurt për parandalimin e sëmundjes dhe mbrojtjen e shëndetit publik.

Mësuesit e diasporës bashkohen në Kosovë për forcimin e gjuhës shqipe dhe identitetit kombëtar

Posted on by Alb

Ministria e Arsimit dhe Sportit e Republikës së Shqipërisë, në bashkëpunim me Ministrinë e Arsimit dhe Shkencës të Republikës së Kosovës, ka shpallur thirrjen për pjesëmarrje në Seminarin XIX për mësuesit e gjuhës shqipe dhe kulturës shqiptare në diasporë dhe mërgatë.

Seminari do të zhvillohet në Kosovë, në periudhën 28–31 korrik 2026, dhe ka për qëllim forcimin e mësimit të gjuhës shqipe dhe ruajtjen e identitetit kombëtar ndër nxënësit shqiptarë jashtë vendit, transmeton albinfo.ch.

Tema e seminarit

“Motivimi i nxënësve në diasporë për mësimin e gjuhës shqipe dhe ruajtjen e identitetit kombëtar”

Aplikimi dhe pjesëmarrja

Mësuesit e interesuar për të marrë pjesë ose për të prezantuar punime në punëtori duhet të aplikojnë online brenda afatit të përcaktuar.

Aplikimi për pjesëmarrje dhe abstrakte: 25 maj – 9 qershor 2026

Njoftimi për pranimin e abstrakteve dhe pjesëmarrësve: 12–15 qershor 2026

Dorëzimi i prezantimeve të plota: deri më 15 korrik 2026

Dy formularë aplikimi janë në dispozicion:

Më shumë informacion mund të gjendet edhe në faqen zyrtare:

http://qbd.gov.al⁠

Seminari pritet të mbledhë mësues nga diaspora shqiptare me synimin për të shkëmbyer përvoja dhe për të forcuar mësimdhënien e gjuhës shqipe në komunitetet jashtë vendit.