Partia Demokratike e Kosovës (PDK) ka publikuar listën e kandidatëve për deputetë me të cilën do të garojë në zgjedhjet e parakohshme parlamentare të 7 qershorit, përcjell albinfo.ch.

Kryetari i PDK-së, Bedri Hamza, ka bërë të ditur se lista përmban një përzierje të energjisë së re dhe përvojës politike, duke theksuar se mbi gjysma e kandidatëve janë emra të rinj.

“Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve. Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj”, ka shkruar Hamza në një postim në Facebook.

Ai shtoi se përveç listës së kandidatëve, PDK në ditët në vijim pritet të prezantojë edhe programin zgjedhor, të cilin e cilësoi si “më seriozin dhe më të përgjegjshmin” për shtetin dhe qytetarët.

“Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët. Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë!”, ka përfunduar Hamza.

Zgjedhjet e parakohshme parlamentare në Kosovë do të mbahen më 7 qershor./Albinfo.ch

Ka përfunduar të martën afati i përcaktuar nga Komisioni Qendror i Zgjedhjeve (KQZ) për dorëzimin e listave të kandidatëve për deputetë nga subjektet politike që do të marrin pjesë në zgjedhjet e jashtëzakonshme të 7 qershorit, përcjell albinfo.ch.

Zëdhënësi i KQZ-së, Valmir Elezi, bëri të ditur se katër parti politike nuk kanë dorëzuar listat me emrat e kandidatëve të tyre, ndonëse më herët kishin njoftuar për pjesëmarrje në zgjedhje.

Sipas Elezit, partitë që nuk i kanë dorëzuar listat janë: Yeniliçki Türk Haraket Partisi, Kosovski Savez, Partia Balliste – P.B dhe Partia Qytetare për Mirëqenie Sociale.

“Gjatë periudhës 11-ditore, pra nga data 2 maj deri më 12 maj, KQZ ka pranuar listat e kandidatëve për deputetë nga 23 subjekte politike, prej të cilave 18 parti politike, 3 koalicione, një nismë qytetare dhe një kandidat i pavarur. Katër parti politike, të cilat më herët kishin njoftuar KQZ-në për pjesëmarrje në zgjedhje, nuk kanë dorëzuar listat me emrat e tyre”, tha Elezi.

Ai bëri të ditur se numri i përgjithshëm i kandidatëve të paraqitur nga këto 23 subjekte politike është 917, prej të cilëve 603 janë burra dhe 314 gra.

Po ashtu, Elezi njoftoi se procesi i certifikimit të kandidatëve pritet të përmbyllet deri më 15 maj, ndërsa paraprakisht do të shqyrtohet nëse kandidatët përmbushin kriteret ligjore të përcaktuara.

Zgjedhjet e jashtëzakonshme parlamentare në Kosovë do të mbahen më 7 qershor./Albinfo.ch

Një nga temat më të diskutuara ditëve të fundit ka qenë mundësia e përfshirjes së Fatmir Limaj në listën e kandidatëve për deputetë të Partia Demokratike e Kosovës (PDK), përcjell  albinfo.ch.

Megjithatë, në këto zgjedhje Limaj nuk do të jetë pjesë e listës së PDK-së, pasi një vendim i tillë është marrë nga kryesia e kësaj partie. Ndërkohë, PDK ende nuk e ka publikuar listën finale të kandidatëve për deputetë, çka ka nxitur spekulime nëse mospërfshirja e Limajt është arsyeja kryesore e vonesës.

Lidhur me këtë situatë ka reaguar Ardian Gaxherri, i cili deklaroi se brenda PDK-së ekziston një përçarje serioze.

“Është një lëmsh i madh aty në PDK, janë ndarë në dysh, të rinjtë me themeluesit. Unë besoj që do të kenë presion nga njerëz me ndikim dhe prapë ta fusin Fatmir Limajn, sepse mendoj që ky është një budallallëk shumë i madh që ka bërë PDK-ja. Ku do me i marrë PDK-ja votat?”, deklaroi Gaxherri.

Ai shtoi se përfshirja e Limajt do t’i sillte PDK-së rreth 30 mijë vota, duke e konsideruar largimin e tij si një vendim të dëmshëm për rezultatin zgjedhor të partisë.

PDK pritet që në ditët në vijim të bëjë publike listën përfundimtare të kandidatëve, ndërsa debati për mungesën e Limajt vazhdon të mbetet në qendër të vëmendjes politike./Albinfo.ch

Lëvizja Vetëvendosje, Lidhja Demokratike e Kosovës dhe Aleanca për Ardhmëri të Kosovës kanë publikuar listat e kandidatëve me të cilët do të garojnë në zgjedhjet e parakohshme të 7 qershorit, përcjell albinfo.ch.

Por Partia Demokratike e Kosovës, e cila doli e dyta në zgjedhjet e fundit nacionale, nuk e ka bërë ende. 

Të martën ishte afati i fundit për dorëzimin e listës së kandidatëve.

Albin Kurti do t’i prijë listës së Lëvizjes Vetëvendosje, ndërsa në Top 10 janë edhe Glauk Konjufca, Donika Gërvalla, Avni Dehari, Albulena Haxhiu, Xhelal Sveçla, Mimoza Kusari Lila, Hajrulla Çeku e Shqipe Memeti Selimi. 

Në listë nuk janë emra si Besnik Bislimi e Hysen Durmishi. Durmishi në një postim në Facebook tha se vetë ka vendosur të mos jetë pjesë e listës. Në listën e Vetëvendosjes me numër 15 është Arton Konushevci, vëllai i heroit Ilir Konushevci.

Lidhja Demokratike e Kosovës dhe Aleanca për Ardhmëri të Kosovës kanë publikuar listat e kandidatëve për deputetë me të cilat do të garojnë në zgjedhjet e parakohshme të 7 qershorit. 

Bartëse e listës së LDK-së është ish-presidentja Vjosa Osmani, ndërsa në Top 10 në listë nuk janë emrat si Avdullah Hoti e Hykmete Bajrami.  Hoti do të mbajë numrin 11 e Bajrami 12. Në krye të listës është Vjosa Osmani, teksa numri dy do të jetë Lumir Abdixhiku. Dhjetëshen e parë e kompletojnë Kujtim Shala, Doarsa Kica-Xhelili, Lutfi Haziri, Jehona Lushaku-Sadriu, Albena Reshitaj, Ukë Rugova, Jeta Statovci e Anton Quni.

“Numri i vetëm që ka rëndësi është numri i Lidhjes Demokratike të Kosovës. Numrat e tjerë i përcaktojnë qytetarët”, ka shkruar Hoti.

“Nga zyra e LDK-së me është kumtuar se në listë unë jam me numër 12, pas njerëzve që deri dje e kanë luftuar LDK-në, por kjo për mua personalisht s’paraqet asnjë problem, sepse beteja ime nuk është për renditje as për fitore personale. Beteja ime është për një Kosovë që nuk i nënshtrohet arrogancës së pushtetit; për politikën që i shërben qytetarit e jo interesave personale; për demokracinë që nuk tkurret; për qytetarin që kërkon llogari nga qeveria; për biznesin që nuk pengohet nga politika dhe për institucione që nuk kapen nga partitë.  Kauza ime është Kosova shtet i fortë dhe këtë kauzë mund ta çojë përpara vetëm LDK-ja, me njerëzit e saj, LDK-ja që i mbron parimet e veta dhe nuk harron pse ekziston”, ka shkruar Bajrami në Facebook.

Kryetari i LDK-së, Lumir Abdixhiku, ka proklamuar “bashkimin e madh”. Në listë është kthyer Osmani dhe me vete ka sjellë edhe disa emra nga ish-partia e saj Guxo.  Por, “bashkimi  i madh” ka hasir në rezistencë nga brenda LDK-së. Të hënën dega e LDK-së në Podujevë e nominoi ish-kryetarin e Podujevës, Agim Veliu, si kandidat për deputet. Por, Veliu nuk e pranoi numimin ndërsa kritikoi Abdixhikun. 

E kritika të martën ka pasur edhe Melihate Tërmkolli. 

“Dmth, unë Melihate Tërmkolli, ndër të parët e LDK-s, në temele të saj e para saj, me një jetë të tërë plot sakrifica, punë e kontribute për liri e shtet, me plot rreziqe jetësore në të gjitha fazat politike, gjithherë me qëndrime të qarta politike kombëtare, me punu sot për zuzen e sorosave që e kanë grabitë LDK-n, për Lulmira, Vjosa, e krejt udhëheqjen e saj, për tuxharitë e multi milionat e tyre a?! E valla jo!” – ka shkruar Tërmkolli në Facebook.

Te AAK-ja bartës i listës është Ardian Gjini, ndërsa Ramush Haradinaj garon me numrin 11. Sot është afati i fundit për dorëzimin e listave nga partitë politike.

Aleanca Kosova e Re ka njoftuar se s’do të marrë pjesë në zgjedhjet e 7 qershorit. E Partia Socialdemokrate në këto zgjedhje do të garojë me 6 kandidatë. 

Partia Demokratike e Kosovës ende s’e ka publikuar listën. Kryesia e PDK-së të hënën mori vendim të mos e përfshijë në listë Fatmir Limaj dhe anëtarë tjerë të Nismës Socialdemokrate.

Lëvizja Lëvizja Vetëvendosje ka bërë publike listën e kandidatëve për deputet për zgjedhjet parlamentare që do të mbahen më 7 qershor, transmeton albinfo.ch.

Në krye të listës është vendosur Albin Kurti, i cili njëkohësisht është edhe kandidat për kryeministër nga ky subjekt politik.

Pas tij, në listë janë renditur edhe kandidatët e tjerë për deputet nga radhët e Vetëvendosjes, të cilët pritet të garojnë për një ulëse në Kuvendin e Kosovës në zgjedhjet e ardhshme.

Publikimi i listës vjen në kuadër të përgatitjeve të partisë për fushatën zgjedhore, ndërsa pritet që ditët në vijim të ketë edhe zhvillime të tjera politike lidhur me koalicionet dhe programet elektorale./Albinfo.ch