Mbërritja e një avioni të tipit Antonov An-124 në Aeroportin Ndërkombëtar të Prishtinës “Adem Jashari”, më 6 maj, ka nxitur kureshtje të madhe në Kosovë. Aeroplani, i njohur si një nga më të mëdhenjtë në botë për transport mallrash, përfshirë edhe pajisje ushtarake, u pa duke u ulur në aeroportin që ndodhet rreth 17 kilometra larg Prishtinës, përcjell albinfo.ch.

Megjithatë, arsyeja e këtij fluturimi mbetet ende e panjohur. Fluturimi i avionit me regjistrimin UR-82008 nuk është shfaqur në regjistrat e fluturimeve komerciale online, ndërsa Ministria e Mbrojtjes e Kosovës ka deklaruar se nuk ka informacione zyrtare lidhur me këtë mbërritje.

Uljen e avionit e ka dokumentuar edhe fotografi i njohur kosovar Arian Mavriqi, i cili ka publikuar pamje nga momenti i aterrimit. Po ashtu, entuziastë të aviacionit, vendorë dhe të huaj, kanë shpërndarë fotografi e video, duke aluduar se aeroplani është nisur nga një bazë ajrore në Gjermani.

Sipas tyre, ekziston mundësia që Antonov An-124 të ketë sjellë pajisje ushtarake për misionin paqeruajtës të NATO-s në Kosovë, KFOR, por ky mision nuk ka kthyer përgjigje ndaj pyetjeve të Radio Evropa e Lirë lidhur me këtë çështje.

Ndërkohë, Ministria e Mbrojtjes e Gjermanisë i ka thënë REL-it se, si parim, nuk komenton transportet ushtarake dhe se deklarata e saj nuk përbën as konfirmim e as mohim për këtë fluturim. Megjithatë, ajo ka bërë të ditur se forcat e armatosura gjermane përdorin shërbimet e transportit të kompanisë Antonov.

“…Kapacitetet e Antonov Logistics SALIS GmbH përdoren për dërgimin dhe furnizimin e forcave gjermane në kontekstin e mbrojtjes kombëtare dhe mbrojtjes së aleancës, menaxhimit të krizave ndërkombëtare dhe menaxhimit të rreziqeve dhe krizave kombëtare”, ka deklaruar një zëdhënës i Ministrisë gjermane.

Për çfarë përdoren avionët Antonov?

Sipas të dhënave të publikuara nga kompania, Antonov Airlines është degë e Antonov Company me seli në Kiev të Ukrainës. Kjo ndërmarrje shtetërore operon një flotë të gjerë avionësh transportues, përfshirë pesë avionë të tipit An-124 Ruslan, të cilët mund të bartin ngarkesa deri në 150 tonë.

Dy prej këtyre avionëve përdoren përmes kompanisë Antonov Logistics SALIS GmbH, e cila ofron shërbime transporti për NATO-n dhe vendet e Bashkimit Evropian, kryesisht për dërgimin e “mallrave emergjente në situata krize”.

Për shkak të luftës në Ukrainë, kompania ka bërë të ditur se shërbimet e planifikimit të transportit dhe mirëmbajtjes janë zhvendosur përkohësisht në Lajpcig të Gjermanisë.

Fluturime të mëparshme në Kosovë

Kjo nuk është hera e parë që një avion i tillë zbarkon në Kosovë. Aeroporti i Prishtinës kishte publikuar fotografi të një avioni Antonov kur kishte mbërritur në vitin 2016, ndërsa grupi BBKRspotters kishte publikuar pamje të uljes së tij edhe në janar 2024./Albinfo.ch

Lëvizja Vetëvendosje do të garojë në zgjedhjet parlamentare të 7 qershorit në koalicion me Partinë GUXO, Partinë Alternativa dhe Partinë Shqiptare Demokristiane (PShDK), transmeton albinfo.ch.

Lajmi është konfirmuar përmes një njoftimi nga Partia GUXO, e cila ka bërë të ditur se subjektet politike kanë nënshkruar marrëveshjen e koalicionit, duke e cilësuar atë si vazhdim të një rruge të përbashkët politike.

“Sot u vulos vazhdimi i një rruge të përbashkët politike: Partia GUXO, Lëvizja VETËVENDOSJE!, Partia ALTERNATIVA dhe Partia Shqiptare Demokristiane nënshkruan Marrëveshjen e Koalicionit, si angazhim i qartë përpara qytetarëve të Republikës së Kosovës”, thuhet në njoftim.

Sipas GUXO-s, ky koalicion nuk është një bashkim i përkohshëm, por një qëndrim i vendosur politik për të qeverisur me përgjegjësi, për të mbrojtur interesin shtetëror dhe për të vendosur qytetarin në qendër të vendimmarrjes.

Në njoftim theksohet se partnerët e koalicionit hyjnë në këtë marrëveshje me bindjen se shteti forcohet përmes drejtësisë funksionale, institucioneve të qëndrueshme dhe një qeverisjeje që garanton llogaridhënie. Po ashtu, thuhet se lufta kundër korrupsionit, zhvillimi ekonomik dhe mirëqenia qytetare janë detyrime që burojnë nga besimi i qytetarëve.

GUXO ka theksuar se koalicioni synon të ofrojë stabilitet dhe qartësi politike, duke e përshkruar atë si një angazhim për një Republikë më të fortë brenda vendit dhe më të sigurt jashtë, me orientim të palëkundur euroatlantik dhe partneritete strategjike të konsoliduara./Albinfo.ch

Komisioni Qendror i Zgjedhjeve (KQZ) ka njoftuar se Aleanca Kosova e Re (AKR) dhe Nisma Socialdemokrate nuk do të marrin pjesë në zgjedhjet e ardhshme në Kosovë, përcjell albinfo.ch.

Sipas njoftimit zyrtar të KQZ-së, këto dy subjekte politike kanë dorëzuar konfirmimin për mospjesëmarrje brenda afatit të përcaktuar, i cili ka përfunduar më 7 maj në ora 24:00.

KQZ bëri të ditur se në total nëntë parti politike kanë njoftuar zyrtarisht se nuk do të jenë pjesë e garës zgjedhore, ku përfshihen edhe AKR dhe Nisma, si dy nga subjektet më të njohura politike në vend.

Në listën e partive që nuk do të marrin pjesë në zgjedhje janë edhe: Partia Demokratike e Unitetit, Balli Kombëtar i Kosovës, Lëvizja Qytetare Vatra, Bashkimi për Ndryshim Anamorava, Partia e Drejtësisë, Srpski Narodni Pokret dhe Partia Reforma Demokratike.

Afati për njoftimin e pjesëmarrjes, mospjesëmarrjes dhe formimin e koalicioneve ka qenë i hapur nga 1 deri më 7 maj 2026, dhe ka vlejtur për 53 partitë politike të regjistruara në Kosovë./Albinfo.ch

Projekti evropian HAPE ka përfshirë një komponent të veçantë për trajnimin e telepilotëve të dronëve në Kosova, me qëllim rritjen e kapaciteteve të institucioneve të sigurisë dhe forcimin e luftës kundër krimit të organizuar, transmeton albinfo.ch.

Programi është realizuar përmes një bashkëpunimi të ngushtë mes Shërbimit të Sigurisë së Brendshme të Ambasada e Francës në Kosovë dhe operatorit CIVIPOL, ndërsa kësaj iniciative i është shtuar edhe një cikël i veçantë për trajnimin e instruktorëve.

Gjatë gjashtë javëve të fundit, dy ekspertë francezë nga Akademia e Policisë në Lognes kanë zhvilluar një trajnim intensiv për pjesëmarrësit në Kosovë.

Si rezultat i këtij programi, gjithsej 14 telepilotë janë trajnuar, ndërsa 6 prej tyre janë certifikuar edhe si instruktorë, duke krijuar kështu bazën për trajnime të mëtejshme në vend.

Këto aftësi të reja pritet të kontribuojnë në forcimin e kapaciteteve të policisë dhe doganave, veçanërisht në përdorimin e teknologjisë së dronëve për monitorim dhe luftë kundër aktiviteteve të paligjshme.

Sipas organizatorëve, një mision i ri është planifikuar të zhvillohet gjatë kësaj vjeshte, me synim konsolidimin e njohurive të fituara dhe vlerësimin e cilësisë së trajnimit të realizuar deri më tani./Albinfo.ch

Gjithsej 22 parti politike dhe tri koalicione janë regjistruar për të marrë pjesë në zgjedhjet e parakohshme që do të mbahen më 7 qershor në Kosova, përcjell albinfo.ch.

Afati për regjistrimin e pjesëmarrjes ose mospjesëmarrjes në zgjedhje, si dhe për formimin e koalicioneve në Komisioni Qendror i Zgjedhjeve (KQZ), është mbyllur më 7 maj në orën 24:00. Ky obligim ka vlejtur për 53 partitë politike që aktualisht janë pjesë e regjistrit të partive të regjistruara në Kosovë.

Sipas njoftimit të KQZ-së, deri në përfundim të afatit janë pranuar njoftime për pjesëmarrje në zgjedhje nga 22 parti politike, ndërsa janë formuar edhe tri koalicione të përbëra nga nëntë parti politike. Ndërkohë, nëntë parti kanë njoftuar se nuk do të marrin pjesë në zgjedhjet e 7 qershorit.

Ndër partitë që kanë konfirmuar pjesëmarrjen në zgjedhje janë edhe Lidhja Demokratike e Kosovës, Partia Demokratike e Kosovës, Aleanca për Ardhmërinë e Kosovës dhe Partia Socialdemokrate, së bashku me një sërë partish të komuniteteve joshumicë.

Ndërkohë, sipas KQZ-së, janë njoftuar edhe tri koalicione politike: koalicioni mes Demokratska Stranka Bošnjaka dhe Demokratska Stranka Vatan (Koalicija VAKAT); koalicioni mes Partia e Ashkalinjëve për Integrim, Partia Demokratike e Ashkanlive të Kosovës dhe Lëvizja për Bashkëveprim (Ashkalitë e Bashkuar); si dhe koalicioni i përbërë nga Lëvizja Vetëvendosje, Guxo, Alternativa dhe Partia Shqiptare Demokristiane.

Në anën tjetër, disa parti politike kanë njoftuar mospjesëmarrjen në zgjedhje, ndër të cilat edhe Aleanca Kosova e Re, Nisma Socialdemokrate dhe Partia e Drejtësisë.

Sipas KQZ-së, procesi i njoftimit për pjesëmarrje ose mospjesëmarrje dhe formimi i koalicioneve është i ndarë nga procesi i aplikimit për certifikimin e subjekteve të reja politike dhe dorëzimin e listës së kandidatëve për deputetë.

Zëdhënësi i KQZ-së, Valmir Elezi, ka bërë të ditur se afati për aplikim për certifikimin e subjekteve të reja politike – përfshirë koalicionet, nismat qytetare dhe kandidatët e pavarur – ka filluar më 2 maj dhe do të përfundojë më 10 maj.

Ndërkohë, dorëzimi i listave të kandidatëve për deputetë nga subjektet politike do të jetë i hapur deri më 12 maj 2026. Sipas Ligjit për Zgjedhjet e Përgjithshme, partitë politike konsiderohen automatikisht të certifikuara, ndërsa procesi i certifikimit zbatohet vetëm për subjektet e reja politike./Albinfo.ch