Archives

Qiratë në Shqipëri ndër më fitimprurëset në Evropë

Posted on by BR

Shqipëria po konsolidohet gradualisht si një nga tregjet më interesante në Evropë për investime në pasuri të paluajtshme, veçanërisht në sektorin e qirave.

Të dhënat më të fundit mbi kthimet e investimeve nga qiraja nga Investropa tregojnë se disa qytete shqiptare po ofrojnë norma fitimi që tejkalojnë ndjeshëm mesataren evropiane, duke e kthyer vendin në një destinacion gjithnjë e më tërheqës për investitorët vendas dhe të huaj, shkruan Scan, transmeton albinfo.ch.

Sipas grafikut të publikuar i bazuar në të dhëna nga Banka e Shqipërisë, Numbeo, Fondi Monetar Ndërkombëtar dhe Banka Botërore, Tirana regjistron një kthim mesatar rreth 7% nga qiratë, një nivel që e vendos kryeqytetin shqiptar përkrah ose mbi qytete si Madridi, Brukseli, Amsterdami dhe Varshava. Ky tregues konsiderohet shumë konkurrues në standardet evropiane, ku në shumicën e kryeqyteteve kthimet vështirë se kalojnë 5%.

Përtej Tiranës, Durrësi dhe qytetet bregdetare po shfaqin gjithashtu performancë të fortë. Durrësi, si një nga qendrat kryesore urbane dhe portuale të vendit, përfiton nga kërkesa e qëndrueshme për qira afatgjata dhe afatshkurtra, duke ofruar kthime të krahasueshme me kryeqytetin. Ndërkohë, Vlora shënon rreth 6%, e mbështetur kryesisht nga zhvillimi i shpejtë i turizmit, rritja e numrit të vizitorëve të huaj dhe zgjerimi i ofertës së qirave sezonale.

Në krahasim, tregjet tradicionale të Evropës Perëndimore rezultojnë shumë më pak fitimprurëse. Qytete si Parisi, Munihu, Cyrihu, Londra apo Vjena ofrojnë kthime që variojnë kryesisht mes 3 dhe 4%, ndërsa në disa raste edhe më pak. Kjo diferencë shpjegohet me çmimet shumë të larta të blerjes së pronës, rregullimet e forta të tregut të qirave dhe një nivel të lartë maturimi të këtyre tregjeve.

Nga ana tjetër qyteti i Portos në Portugali mban fitimet më të larta nga qiratë në kthimin e pronës. Porto pasohet  nga Roterdami, Stambolli dhe Dublini ku cilësohen si vende ku investimi kthehet nga qiratë më shpejt .

Në tërësi, të dhënat sugjerojnë se Shqipëria po pozicionohet gjithnjë e më fort në hartën evropiane të investimeve në pasuri të paluajtshme, jo vetëm si një treg në zhvillim, por si një alternativë reale për investitorët që kërkojnë kthime më të larta krahasuar me tregjet e konsoliduara të BE-së.

Konstituohet Kuvendi i Kosovës, pritet edhe votimi i Qeverisë

Posted on by BR

Kryetarja e sapozgjedhur e Kuvendit të Kosovës, Albulena Haxhiu, shpalli të konstituuar institucionin ligjvënës, pas zgjedhjes së saj dhe të pesë nënkryetarëve.

Haxhiu paralajmëroi për sot edhe një seancë tjetër – atë për votimin e Qeverisë së re të Kosovës, transmeton albinfo.ch.

Deputetët e pranishëm në sallë votuan me 104 vota për pesë nënkryetarët e Kuvendit.

Kundër ishin tre, ndërsa gjashtë abstenuan.

Propozimet për nënkryetarë:

Ardian Gola – Lëvizja Vetëvendosje

Vlora Çitaku – Partia Demokratike e Kosovës

Kujtim Shala – Lidhja Demokratike e Kosovës

Sllvako Simiq – Lista Serbe

Emillija Rexhepi – komunitetet pakicë joserbe

Haxhiu flet si kryetare e Kuvendit

Posted on by BR

Albulena Haxhiu u zgjodh kryetare e Kuvendit të Kosovës.

Ajo e nisi mandatin e saj me një fjalim para deputetëve, gjatë të cilit theksoi rëndësinë e funksionimit të institucioneve dhe shërbimit ndaj qytetarëve.

“Të jesh në krye të Kuvendit do të thotë t’i shërbesh Republikës. Kuvendi është shtëpia e të gjithë qytetarëve tanë”, tha Haxhiu.

Ajo shtoi se detyra e saj kryesore do të jetë të sigurojë që Kuvendi të funksionojë me dinjitet dhe në përputhje me ligjet dhe Kushtetutën, transmeton albinfo.ch.

“Një Kuvend funksional është parakusht për një shtet të fortë dhe një demokraci të qëndrueshme. Sot në këtë sallë kemi një detyrë të përbashkët: t’u shërbejmë qytetarëve me ndershmëri. Kemi dallime, por përgjegjësitë i kemi të përbashkëta”, theksoi Haxhiu.

Arsimi: Maqedonia e Veriut i thotë  ” Jo“ Evropës?

Posted on by albinfo.ch

Ndërsa Shkupi zyrtar pretendon se anëtarësimi në Bashkimin Evropian është prioriteti kryesor, teksti i projektligjit të ri (Zakon za visoko obrazovanie 2026) dëshmon të kundërtën. Duke vendosur barriera proteksioniste dhe burokratike, vendi po i mbyll dyert bashkëpunimit rajonal dhe po tradhton parimet bazë të lëvizjes së lirë të dijes.

Një ligj që “dëbon” rininë në vend që të tërheqë dije

Në vend që të tërheqë institucione prestigjioze dhe investime të huaja, ky projektligj shërben si një mjet dëbues. Duke bllokuar tregun e arsimit, qeveria nuk po mbron cilësinë, por po dënon rininë me mërgim. Nëse të rinjtë nuk gjejnë në vendin e tyre programe inovative (si Kibernetika, Mekatronika apo Inteligjenca Artificiale) për shkak të barrierave absurde, ata do të detyrohen të ikin jashtë vendit për t’u shkolluar. Ky ligj është një makinë që prodhon emigrim dhe zbraz vendin nga truri dhe talentet.

“Perdja e Hekurt” ndaj fqinjëve dhe Ballkanit të Hapur

Neni 26 është simboli i këtij izolimi. Duke kërkuar që një universitet i huaj të jetë në “Top 500 të Shangait” për të hapur një degë në vend, qeveria përjashton automatikisht pothuajse të gjitha institucionet elitare të fqinjëve tanë: Shqipërisë, Kosovës, Serbisë, Bullgarisë dhe Greqisë.

Si mund të flasim për “Open Balkan” apo integrim rajonal kur ndalojmë investimet akademike nga fqinjët tanë? Ky kriter nuk synon cilësinë, por mbron një “kartel” universitetesh lokale që i frikësohen konkurrencës dhe inovacionit.

Raket financiar i legalizuar

Nenet 50 dhe 51 plotësojnë skenarin e mbylljes. Të kërkosh garanci bankare prej miliona eurosh (100% të të hyrave të parashikuara) është një absurditet ekonomik që nuk ekziston në asnjë vend të BE-së. Kjo masë bllokon kapitalin dhe rrit koston e studimeve për familjet maqedonase, duke u siguruar që vetëm monopolet ekzistuese të mbijetojnë. Gjithashtu, kufizimet e ngurta për personelin akademik (Neni 50) pamundësojnë ardhjen e ekspertëve ndërkombëtarë, pa të cilët nuk mund të ketë zhvillim teknologjik.

Koha e vërtetë për partitë politike: Kërkohet rishikim i menjëhershëm

Projektligji është ende në fazën e konsultimit publik. Nuk është vonë, por koha po mbaron. Partitë politike në vend, dhe veçanërisht ato shqiptare, duhet të zgjohen nga heshtja dhe të kërkojnë që kjo kopje e ligjit të rishikohet tërësisht. Nuk mund të jesh pro-evropian me fjalë dhe të votosh ligje që instalojnë monopole antievropiane në praktikë.

Është imperative që kriteret arbitrare të zëvendësohen me standardet evropiane të ENQA dhe EQAR. Nëse Maqedonia e Veriut i mbyll dyert institucioneve rajonale, ajo i dërgon një mesazh të qartë Brukselit: vendi preferon klanet e vjetra para vlerave evropiane.

Rinia e këtij vendi nuk mund të mbetet peng i interesave korporatiste. Ky projektligj duhet të rishkruhet për të hapur vendin, jo për ta mbytur atë.

« Nëse është kështu athua këtë ligj do ta votojnë deputetët shqiptar dhe e komuniteteve tjera që e kane jetik bashkëpunimin me shtetet amë respektivisht fqinjët tanë? Ky ligj nuk mund të aprovohet pa shumicë të dyfishtë . Prandaj deputetët e komuniteteve joshumicë janë ata që me këtë ligj do ta vulosin fatin e vet, pa marr parasysh se janë pozitë apo opozitë!

Albinfo.ch

Albulena Haxhiu, kryetare e Kuvendit të Kosovës

Posted on by BR

Albulena Haxhiu është zgjedhur kryetare e Kuvendit të Kosovës për legjislaturën e dhjetë. Ajo të mërkurën mori 66 vota për, ndërsa 44 ishin kundër. 8 abstenuan.

Për dallim që tash bëhet kryeparlamentare në tentimin e parë, në legjislaturën e nëntë ajo nuk arriti të merrte shumicën në disa tentime, transmeton albinfo.ch.

Në zgjedhjet e 28 dhjetorit, Albulena Haxhiu ishte gruaja më e votuara për deputete. Ajo mori më shumë se 174 mijë vota.

Para se të bëhet kryetare e Kuvendit, Haxhiu ka qenë edhe ministre e Drejtësisë për katër vjet.

Betohen deputetët e rinj

Posted on by BR

Janë betuar 118 deputetët të legjislaturës së dhjetë të Kuvendit.

“Unë, deputet i Kuvendit të Republikës së Kosovës, betohem se me nder e me përkushtim do ta kryej detyrën time dhe do ta përfaqësoj me dinjitet popullin, do të punoj në interes të Kosovës dhe të gjithë shtetasve të saj, do të angazhohem për mbrojtjen dhe për respektimin e kushtetutshmërisë dhe të ligjshmërisë, për mbrojtjen e sovranitetit, tërësisë territoriale dhe të integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit. Betohem!”, shkruan në tekstin e Betimit.

Ajo në fund u nënshkrua nga deputetët, transmeton albinfo.ch.

Tani do të procedohet me zgjedhjen e kryetarit dhe nënkryetarëve në dy pikat e fundit të rendit të ditës.

Shqipëria debuton në Olimpiadën Dimërore

Posted on by BR

Skiatori shqiptar Denni Xhepa zhvilloi sot garën e tij të parë në Lojërat Olimpike Dimërore “Milano-Cortina 2026”, duke shënuar një moment historik për sportin shqiptar.

Kjo garë përbën edhe debutimin e ekipit shqiptar në këtë edicion të Olimpiadës Dimërore, ku Shqipëria përfaqësohet me katër sportistë.

Xhepa regjistroi kohën 1:31.72 në disiplinën Super-G, duke u renditur në vendin e 34-t. Ai zbriti në pistë me numrin 37, ndërsa kjo paraqitje shërbeu edhe si një test i rëndësishëm në prag të garës së Sllallomit Gjigant, që do të zhvillohet pas tri ditësh.

Kjo është hera e parë që Shqipëria merr pjesë në një disiplinë shpejtësie në ski alpine në Lojërat Olimpike Dimërore, transmeton albinfo.ch.

Përveç Xhepës, Shqipëria përfaqësohet edhe nga Lara Colturi, Lisa Brunga dhe Semire Dauti, të cilat garojnë në disiplina të ndryshme.

Denni Xhepa do të rikthehet në pistë më 14 shkurt në Slalom Gjigant dhe më 16 shkurt në Slalom. Ndërkohë, më 15 shkurt në Slalom Gjigant do të garojnë Lara Colturi dhe Semire Dauti, ndërsa më 18 shkurt në disiplinën e Slalomit do të zbresin në pistë Lara Colturi, Lisa Brunga dhe Semire Dauti.

Valon Berisha transferohet në Zurich

Posted on by BR

Mesfushori i Kosovës, Valon Berisha ka gjetur skuadrën e re.

Berisha të mërkurën ka nënshkruar me skuadrën e njohur zvicerane, Zurich. Berisha së fundi ishte në Austri te LASK-u.

Berisha me Zurichun ka firmosur kontratë të vlefshme deri në fund të edicionit, me mundësi të vazhdimit edhe për një vit tjetër.

Berisha ka 52 paraqitje te përfaqësuesja e Kosovës, transmeton albinfo.ch.

Trump kritikon sërish Zvicrën

Posted on by Drin Reçica

Presidenti amerikan Donald Trump ka përmendur edhe një herë Zvicrën si shembull për të justifikuar politikën e tij të tarifave doganore. Në një intervistë për “Fox Business”, ai deklaroi se mirëqenia e Zvicrës bazohet në faktin se Shtetet e Bashkuara janë “shfrytëzuar” në marrëdhëniet tregtare, përcjell albinfo.ch.

Edhe pse e përshkroi Zvicrën si një vend “ultra perfekt”, Trump theksoi se kjo, sipas tij, është e mundur vetëm sepse SHBA-të e lejojnë një gjë të tillë. Ai shtoi se ka edhe rreth 40 vende të tjera që përfitojnë në mënyrë të ngjashme, duke kritikuar sërish deficitin tregtar prej 40 miliardë dollarësh.

Trump u rikthye gjithashtu te biseda telefonike e verës së kaluar me presidenten e atëhershme të Zvicrës, Karin Keller-Sutter, duke thënë se mendonte se kishte folur me “kryeministren”. Ai e përshkroi bisedën si të përsëritur, duke theksuar se Keller-Sutter i kishte kujtuar vazhdimisht se Zvicra është një vend i vogël. “Nuk po arrija ta mbyllja telefonatën,” tha Trump, duke shtuar se në vend të një uljeje, tarifat e importit u rritën në 39 për qind.

Në të njëjtën intervistë, Trump deklaroi se shumë kompani që nuk donin të paguanin tarifat doganore kanë zhvendosur prodhimin e tyre në SHBA. Në këtë kontekst, edhe disa gjigantë zviceranë si Roche dhe Novartis kanë njoftuar plane për investime miliardëshe në fabrika të reja në Shtetet e Bashkuara.

Këto investime janë pjesë e një marrëveshjeje për tarifat e arritur në muajin nëntor me administratën Trump, e cila parashikon investime në vlerë prej 200 miliardë dollarësh nga kompani zvicerane në SHBA. Në këmbim, tarifat doganore amerikane për shumë produkte zvicerane pritet të ulen nga 39 në 15 për qind.

Gjatë fjalimit të tij në Forumin Ekonomik Botëror në Davos, Trump deklaroi se kishte ulur tarifat për të mos dëmtuar qytetarët zviceranë. Ndërkohë, Departamenti Federal i Financave i Zvicrës, nën drejtimin e Karin Keller-Sutter, theksoi se beson që popullsia zvicerane do ta interpretojë saktë këtë deklaratë.

Osmani dhe Begaj shprehin ngushëllime pas sulmit tragjik në Kanada

Posted on by Drin Reçica

Presidentja e Kosovës, Vjosa Osmani, ka shprehur ngushëllimet e saj për familjet e viktimave pas sulmit tragjik në Kanada, ku humbën jetën disa persona dhe dhjetëra të tjerë mbetën të plagosur, përcjell albinfo.ch.

Në një reagim në platformën “X”, Osmani theksoi se asnjë prind, fëmijë apo komunitet nuk duhet të përjetojë një tragjedi të tillë.

“Ne vajtojmë me popullin e Kanadasë dhe shprehim ngushëllimet tona më të thella familjeve që po përballen me këtë humbje të paimagjinueshme. Mendimet tona janë edhe me të plagosurit. Kosova qëndron fuqishëm me Kanadanë në këtë kohë pikëllimi”, shkroi Osmani.

Ndërkohë, edhe Presidenti i Shqipërisë, Bajram Begaj, është shprehur i tronditur nga sulmi me armë në një shkollë në provincën British Columbia, ku sipas raportimeve kanë humbur jetën 10 persona dhe janë plagosur rreth 25 të tjerë.

Begaj u ka shprehur ngushëllime familjeve të viktimave dhe ka shprehur solidaritetin e Shqipërisë me popullin kanadez përballë kësaj tragjedie.

“I tronditur nga të shtënat tragjike në një shkollë në British Columbia. Ngushëllimet e mia më të thella familjeve të viktimave dhe shërim të shpejtë të plagosurve. Shqipëria solidarizohet me popullin kanadez dhe dënon çdo akt dhune që merr jetë njerëzore”, shkroi Presidenti Begaj në “X”.

Ushtria Zvicerane ndalon përkohësisht 238 tanke për shkak të defekteve teknike

Posted on by Drin Reçica

Ushtria Zvicerane ka vendosur ndalim të përkohshëm qarkullimi për 238 automjete të blinduara të tipit M113, pas zbulimit të problemeve serioze teknike gjatë mirëmbajtjes rutinë, përcjell albinfo.ch.

Sipas njoftimit të Departamentit Federal të Mbrojtjes (VBS), defektet janë konstatuar në sistemin anësor të transmetimit, të cilat mund të ndikojnë drejtpërdrejt në drejtimin dhe frenimin e mjeteve, duke paraqitur rrezik për sigurinë.

Gjatë kontrolleve janë gjetur pjesë metalike në vaj dhe është vërejtur një funksionim i vështirësuar i mekanizmit. Hetimet paraprake tregojnë se shkaku lidhet me një komponent që nuk i plotëson specifikimet teknike dhe që është instaluar gjatë servisimit të fundit.

Autoritetet ushtarake theksojnë se siguria ka prioritet absolut, ndaj ndalimi i qarkullimit vlen për të gjithë flotën M113. Ky nuk është rasti i parë i tillë, pasi edhe në dhjetor 2023 këto automjete ishin nxjerrë nga përdorimi për shkak të defekteve teknike. Riparimet e mëparshme kishin kushtuar rreth 2.6 milionë franga dhe kishin zgjatur deri në fund të vitit 2025./Albinfo.ch

Samiti IV-të i Diasporës Shqiptare në Tiranë, 14–15 prill 2026

Posted on by Drin Reçica

Rreth 2.26 milionë shqiptarë jetojnë aktualisht jashtë vendit të lindjes, duke përbërë një prani të konsoliduar me peshë të ndjeshme në zhvillimet ekonomike, profesionale dhe kulturore në hapësira të ndryshme ndërkombëtare. Përmes investimeve, angazhimit në rrjete akademike e profesionale, si dhe përmes promovimit të identitetit kulturor, diaspora shqiptare ruan një marrëdhënie të qëndrueshme dhe funksionale me Shqipërinë.

Në këtë kontekst zhvillohet Samiti IV i Diasporës Shqiptare, i cili do të mbahet në Tiranë më 14–15 prill 2026. Ky takim synon të forcojë bashkëpunimin ndërmjet institucioneve shtetërore dhe përfaqësuesve të diasporës, duke krijuar një platformë të strukturuar dialogu dhe koordinimi për projekte konkrete zhvillimore.

Samiti pritet të mbledhë përfaqësues të komuniteteve shqiptare nga kontinente të ndryshme, ekspertë të fushave të ekonomisë, arsimit, inovacionit dhe kulturës, si dhe përfaqësues të sektorit publik dhe privat. Organizimi realizohet nga Agjencia Kombëtare e Diasporës, në kuadër të përpjekjeve për konsolidimin e rolit të diasporës në politikat afatgjata të zhvillimit të vendit.

Protesta e opozitës në Tiranë: 21 të arrestuar, 16 policë të lënduar

Posted on by Drin Reçica

Njëzet e një persona janë arrestuar pas protestës së opozitës, e zhvilluar mbrëmjen e së martës në bulevardin “Dëshmorët e Kombit” në Tiranë, ndërsa 16 punonjës policie mbetën të lënduar gjatë përplasjeve mes protestuesve dhe forcave të rendit, përcjell albinfo.ch.

Sipas Drejtorisë Vendore të Policisë Tiranë, arrestimet janë kryer në flagrancë. Të ndaluarit akuzohen për një sërë veprash penale, përfshirë “Goditja për shkak të detyrës”, “Plagosja e rëndë me dashje”, “Prishja e rendit dhe qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr” si dhe “Kundërshtimi i punonjësit të rendit publik”.

Mes të arrestuarve janë edhe katër të mitur, të moshës 17-vjeçare, si dhe persona të moshave nga 18 deri në 48 vjeç. Policia bën me dije se një 32-vjeçar është proceduar në gjendje të lirë, ndërsa një 41-vjeçar është shpallur në kërkim.

Po ashtu, ndaj sekretarit organizativ të Partisë Demokratike, E. M., ka nisur procedim penal për organizim të grumbullimeve të paligjshme, kundërshtim të policisë dhe shtytje të të miturve në kryerjen e veprave penale. Procedime penale janë nisur edhe ndaj disa anëtarëve të PD-së për kundërshtim të policisë dhe përfshirje të të miturve në protesta të dhunshme.

Sipas policisë, protestuesit fillimisht u mblodhën para Kryeministrisë dhe më pas u zhvendosën drejt Kuvendit, ku hodhën mjete piroteknike, lëndë djegëse dhe sende të forta në drejtim të forcave të rendit dhe institucioneve shtetërore.

Si pasojë e përplasjeve, 16 efektivë policie pësuan lëndime dhe morën ndihmë mjekësore, duke qenë jashtë rrezikut për jetën. Në cilësinë e provës materiale janë sekuestruar 22 mjete molotov të pashpërthyera dhe tre shishe me lëndë të dyshuara djegëse.

Kjo ishte protesta e tretë e Partisë Demokratike, e cilësuar nga organizatorët si “kombëtare”, me kërkesën për largimin e kryeministrit Edi Rama nga pushteti.

Plisi i bardhë, zëri i kombit shqiptar drejt UNESCO-s

Posted on by Drin Reçica

Në një botë që po ecën me shpejtësi drejt uniformitetit, ku identitetet kulturore shpesh zbehen në emër të globalizimit, plisi i bardhë vazhdon të qëndrojë si një simbol i fortë i identitetit shqiptar. I thjeshtë në formë, por i thellë në kuptim, ai përfaqëson një trashëgimi shekullore që ende jeton, transmeton albinfo.ch.

Plisi, një kapuç prej leshi të bardhë i punuar me dorë, ka shoqëruar shqiptarët ndër shekuj – në gëzime e në beteja, në rite tradicionale dhe në përditshmëri. Sot, ai kërkon më shumë se respekt: kërkon njohjen dhe vlerësimin ndërkombëtar.

Një nismë e fundit përmes një peticioni online u bën thirrje institucioneve përkatëse që plisi i bardhë të përfshihet në listën e Trashëgimisë Kulturore Jomateriale të Njerëzimit të UNESCO-s. Kjo nismë nuk është thjesht simbolike, por një reagim i ndërgjegjshëm ndaj rrezikut që trashëgimia kulturore shqiptare të mbetet vetëm në muze, e shkëputur nga jeta reale dhe brezat e rinj.

Plisi nuk është thjesht një veshje tradicionale. I njohur edhe si qeleshe, kësulë apo qylaf në krahina të ndryshme, ai përfaqëson vazhdimësinë historike të shqiptarëve dhe një shenjë të përbashkët identiteti që i ka mbijetuar pushtimeve, ndryshimeve politike dhe modave kalimtare. Në një copë leshi të bardhë është ruajtur një histori rezistence, krenarie dhe përkatësie.

Njohja nga UNESCO nuk do të ishte vetëm një vlerësim ndërkombëtar simbolik. Ajo do të nënkuptonte mbrojtjen e teknikës tradicionale të punimit të plisit, mbështetjen e artizanëve që ende e prodhojnë me dorë, si dhe ringjalljen e interesit për trashëgiminë kulturore shqiptare. Njëkohësisht, do të krijonte mundësi konkrete për zhvillimin e turizmit kulturor dhe promovimin e historisë shqiptare përtej kufijve.

Fakti që peticioni ka mbledhur rreth 4 mijë firma brenda pak ditësh dëshmon qartë se kjo çështje nuk lidhet me nostalgjinë, por me një nevojë reale për ruajtjen e identitetit. Çdo firmë përfaqëson një zë që thotë: kjo trashëgimi na përket dhe nuk duhet të humbasë.

Plisi i bardhë është një urë mes së shkuarës dhe së ardhmes. Ta çojmë drejt UNESCO-s do të thotë ta mbajmë gjallë këtë urë – jo vetëm për ne, por edhe për botën që ka nevojë të njohë historitë e vogla që mbartin identitete të mëdha.

Zviceranët blejnë gjithnjë e më shumë jashtë vendit, pavarësisht masave qeveritare

Posted on by Drin Reçica

Blerjet ndërkufitare të konsumatorëve zviceranë vazhdojnë të rriten, edhe pse qeveria ka ndërmarrë masa për të frenuar këtë fenomen duke ulur kufirin e përjashtimit nga taksat nga 300 në 150 franga, përcjell albinfo.ch.

Sipas të dhënave të publikuara nga Federata Zvicerane e Tregtisë me Pakicë dhe Instituti Ekonomik BAK, gjatë vitit 2025, zviceranët shpenzuan 2.8 për qind më shumë në vendet fqinje krahasuar me vitin paraprak.

Ekspertët theksojnë se çmimet më të ulëta në tregjet fqinje, të kombinuara me forcimin e vazhdueshëm të frangut zviceran ndaj euros, e bëjnë gjithnjë e më tërheqëse blerjen jashtë kufijve të vendit./Albinfo.ch

Frangu zviceran thyen rekorde të reja ndaj euros dhe dollarit

Posted on by Drin Reçica

Frangu zviceran vijon forcimin e tij historik në tregjet valutore, duke shënuar nivele rekord si ndaj euros ashtu edhe ndaj dollarit amerikan, transmeton albinfo.ch.

Pas arritjes së niveleve të reja në fund të janarit, kjo javë ka nisur me një tjetër dobësim të dollarit dhe me një rritje të mëtejshme të frangut. Të hënën, dollari amerikan u tregtua në nivelin 0.7659 franga, një nga vlerat më të ulëta historike.

Ndërkohë, edhe euro ka pësuar rënie të ndjeshme kundrejt frangut zviceran. Kursi euro-frang u vendos në 0.9130, duke prekur madje një rekord të ri historik gjatë pasdites, kur zbriti në nivelin 0.9127.

Forcimi i vazhdueshëm i frangut konfirmon rolin e tij si një nga monedhat më të sigurta në kohë pasigurie ekonomike globale./Albinfo.ch

Nis në Itali gjyqi për vdekjen e kosovares 24-vjeçare

Posted on by Drin Reçica

Në Itali ka nisur procesi gjyqësor ndaj një 39-vjeçari nga Venecia, i cili akuzohet për vrasje nga pakujdesia në qarkullim rrugor, lidhur me aksidentin tragjik ku humbi jetën 24-vjeçarja nga Kosova, Donika Nikollbibaj, transmeton albinfo.ch.

Ngjarja e rëndë kishte ndodhur më 16 prill 2022, rreth orës 06:30, në rrugën Castellana, në zonën Padernello di Paese, pranë qytetit Treviso. Automjeti tip Volkswagen Polo, që drejtohej nga viktima, ishte përplasur ballë për ballë me një kamion frigoriferik Iveco, i cili po lëvizte nga Treviso në drejtim të Castelfranco Veneto.

Sipas hetimeve, dyshohet se 24-vjeçarja kishte humbur kontrollin e automjetit, duke kaluar në korsinë e kundërt, çka e bëri përplasjen të pashmangshme. Megjithatë, hetimet kanë zbuluar se shoferi i kamionit po qarkullonte me shpejtësi rreth 72 kilometra në orë, ndonëse kufiri i lejuar në atë segment rrugor ishte 50 kilometra në orë, pasi zona konsiderohej e banuar dhe me kalime për këmbësorë.

Për këtë arsye, Prokuroria ka ngritur aktakuzë ndaj drejtuesit të kamionit për shkelje të rregullave të qarkullimit rrugor me pasojë vdekjen, duke e dërguar çështjen në gjykatë.

Në automjetin e viktimës ndodhej edhe motra e saj, Monika Nikollbibaj, 25 vjeçe, e cila pësoi lëndime të lehta. Të dyja motrat jetonin në San Michele d’Adige, në provincën e Trentos.

Përplasja ishte e fuqishme dhe automjeti përfundoi në një kanal anës rrugës, duke i lënë të bllokuara brenda makinës. Donika Nikollbibaj u intubua në vendin e ngjarjes nga ekipet e urgjencës dhe u transportua me urgjencë në repartin e reanimacionit të spitalit të Trevisos. Ajo luftoi për jetën për tre ditë, por ndërroi jetë më 21 prill 2022. Shoferi i kamionit nuk pësoi lëndime.

Familja e viktimës është paraqitur në gjykatë si palë civile, duke theksuar se shpejtësia e lartë e mjetit të rëndë ka ndikuar në pasojat fatale të aksidentit.

Në momentin e aksidentit, dy motrat po udhëtonin drejt aeroportit të Venecias për të fluturuar në Kosovë, ku do të kalonin pushimet e Pashkëve. Prindërit e tyre kishin udhëtuar një ditë më herët. Familja Nikollbibaj jetonte prej rreth pesë vitesh në Itali.

Donika Nikollbibaj ishte studente universitare në Verona dhe punonte me kohë të pjesshme në MediaWorld në Trento për të përballuar shpenzimet e studimeve.

Procesi gjyqësor pritet të vazhdojë me dëgjimin e dëshmitarëve dhe ekspertëve të aksidenteve rrugore, ndërsa vendimi final do të përcaktojë përgjegjësinë penale të të pandehurit.

Bashkatdhetarë nga diaspora mblidhen para Speciales për të ndjekur deklaratën përmbyllëse të mbrojtjes së Thaçit

Posted on by Drin Reçica

Qytetarë nga diaspora kanë nisur të mblidhen pranë Dhomave të Specializuara në Hagë për të ndjekur seancën e sotme gjyqësore, ku pritet të fillojë paraqitja e deklaratës përmbyllëse nga ekipi mbrojtës i ish-presidentit Hashim Thaçi, përcjell albinfo.ch.

Rreth një orë para nisjes së seancës ka mbërritur edhe avokati i Thaçit, Lluka Mishetiq. Ai kishte njoftuar më herët se në ditën e tretë të fazës përfundimtare të procesit gjyqësor, do të nisë paraqitjen e deklaratës përmbyllëse duke filluar nga ora 09:00.

Ndërkohë, Zyra e Prokurorit të Specializuar (ZPS) përmbylli dje paraqitjen e fjalës përfundimtare, pas së cilës argumentet e saj i paraqiti edhe mbrojtësi i viktimave.

ZPS ka deklaruar se gjatë procesit ka paraqitur mbi pesë mijë prova materiale dhe ka intervistuar më shumë se 130 dëshmitarë. Kryeprokurorja e Specializuar, Kimberly West, ka kërkuar dënim me nga 45 vjet burg për secilin prej katër ish-krerëve të UÇK-së, që në total arrin në 180 vjet burgim.

Gjatë paraqitjes së saj, prokuroria ka pretenduar se ish-presidenti Hashim Thaçi “i ka gënjyer disa herë ndërkombëtarët”, duke iu referuar dëshmive të James Rubin dhe Wesley Clark.

Kërkesa e prokurorisë për dënime të gjata me burg ka nxitur reagime nga liderë politikë në Kosovë dhe rajon, të cilët kanë vlerësuar se një kërkesë e tillë nuk mbështetet në standarde ndërkombëtare, duke theksuar se Ushtria Çlirimtare e Kosovës ka zhvilluar një luftë të drejtë./Albinfo.ch

Sot fjalët përmbyllëse të mbrojtjes së Hashim Thaçit në Hagë

Posted on by Drin Reçica

Sot nis fjala përmbyllëse e mbrojtjes së ish-presidentit, Hashim Thaçi. Në ditën e tretë të fazës përfundimtare te procesit më të madh gjyqësor në Hagë, siç edhe ka njoftuar avokati i Thaçit, Lluka Mishetiq, ai do të fillojë shpalosjen e deklaratës përmbyllëse nga ora 9 e mëngjesit, përcjell albinfo.ch.

Zyra e Prokurorit të Specializuar ka përmbyllur dje fjalën përfundimtare, duke vijuar më pas mbrojtësi i viktimave.

ZPS ka thënë se ka pranuar, siç pretendon, mbi pesë mijë prova materiale dhe ka intervistuar mbi 130 dëshmitarë.

Kryeprokurorja e Specializuar, Kimberly West ka kërkuar dënimin me burg nga 45 vjet për katërshen e UÇK-së, që në total i bie 180 vjet burgim.

Po ashtu, gjatë ditës së djeshme, prokuroria ka pretenduar se ish-presidenti Hashim Thaçi “i ka gënjyer disa herë ndërkombëtarët”, duke përmendur kështu dëshmitë e James Rubin e Wesley Clark.

Për kërkesën e Zyrës së Prokurorit të Specializuar për dënim me nga 45 vjet burgim kanë reaguar liderët e vendit por edhe të rajonit, duke thënë se kjo nuk mbështetet në asnjë standard ndërkombëtar e po ashtu se Ushtria Çlirimtare e Kosovës bëri luftë të drejtë.

Paraqitja e deklaratave përmbyllëse shënon fazën përfundimtare të procesit më të madh gjyqësor në Dhomat e Specializuara të Kosovës, në Hagë.

Prokuroria, mbrojtësi i viktimave, ekipet mbrojtëse dhe ish-krerët e UÇK-së, gjatë kësaj dhe javës se ardhshme kanë mundësi që për herë të fundit t’i drejtohen trupit gjykues me parashtrimet e tyre në këtë proces.

Hashim Thaçi, Kadri Veseli, Jakup Krasniqi dhe Rexhep Selimi, po përballen me akuza të ngritura nga Zyra e Prokurorit të Specializuar, të cilat ata i kanë cilësuar si të pabazuara. Edhe mbrojtja i ka hedhur poshtë këto akuza dhe ka argumentuar se UÇK-ja nuk kishte strukturë të organizuar komanduese.

Gjykimi ndaj tyre ka nisur më 3 prill 2023 – gati tri vjet pas konfirmimit të aktakuzës prej kur ish-krerët e UÇK-së mbahen në qendrën e paraburgimit në Hagë.

Ansambli “Hasan Prishtina” sjell festën e Pavarësisë së Kosovës në Austri

Posted on by Drin Reçica

Komuniteti shqiptar në Austri do të shënojë përvjetorin e Pavarësisë së Kosovës përmes dy mbrëmjeve të veçanta kulturore, të organizuara me pjesëmarrjen e Ansamblit të Këngëve dhe Valleve “Hasan Prishtina” nga Vushtrria, transmeton albinfo.at.

Ky turne kulturor është realizuar falë bashkëpunimit ndërmjet Shoqatës “Internacionale” në Kapfenberg dhe “Unionit Humanitar Shqiptar” në Graz, me synim ruajtjen dhe promovimin e traditave kulturore shqiptare në diasporë.

Përveç programit artistik, vizita ka edhe karakter institucional. Delegacioni nga Vushtrria, i udhëhequr nga kryetari i komunës, Ferit Idrizi, pritet të zhvillojë takime zyrtare me autoritetet lokale në Kapfenberg dhe Graz, me qëllim forcimin e bashkëpunimit dhe krijimin e mundësive të reja ndërinstitucionale.

Sipas organizatorëve, këto aktivitete synojnë jo vetëm festimin e një prej datave më të rëndësishme shtetërore të Kosovës, por edhe forcimin e lidhjeve kulturore dhe shoqërore mes diasporës shqiptare dhe vendlindjes.

Mbrëmjet kulturore do të zhvillohen sipas këtij programi:

• Kapfenberg – 20 shkurt, ora 19:00, në adresën Lannergasse 1, 8605 Kapfenberg

• Graz – 21 shkurt, ora 19:00, në adresën Alte Poststraße 461, 8055 Graz

Organizatorët kanë ftuar bashkëatdhetarët që përmes këngës dhe valles tradicionale të festojnë së bashku Pavarësinë e Kosovës, duke ruajtur dhe promovuar identitetin kulturor shqiptar në Austri./Albinfo.ch

https://www.facebook.com/share/p/18fhq5oSDV/?mibextid=wwXIfr

Sot mbahet seanca konstituive e Kuvendit

Posted on by Drin Reçica

Sot nga ora 17:00 do të mbahet seanca konstituive e Kuvendit të Kosovës.

Presidentja e Kosovës, Vjosa Osmani, në një njoftim për media të martën bëri me dije se ka thirrur seancën konstituive në orën 12.

Por kryetari i Kuvendit Dimal Basha ka njoftuar se me kërkesë të nënkryetares së PDK-së, Vlora Çitaku, mbajtja e kësaj seance është shtyrë për orën 17:00.

Kjo kërkesë erdhi pasi në kuadër të procesit të gjykimit që po zhvillohet në Hagë kundër ish-krerëve të UÇK-së, fjalën do ta ketë mbrojtja.

“Data mbetet sot, ora ka ndryshuar me kërkesë të nënkryetares Vlora Çitaku që për shkak të rrethanave në të cilat gjendemi, nesër, kur do të ketë mbrojtja fjalën e vet gjatë ditës. Në respekt për atë që po ndodhë në Hagë të gjitha subjektet politike kanë pranuar që seanca të mbahet në ora 17:00 dhe pastaj të vazhdohet me votimin e qeverisë”, ka thënë Basha në deklarimin për media pas mbledhjes së kryesisë së partive politike.

Caktimi i seancës u bë një ditë pasi Komisioni Qendror i Zgjedhjeve certifikoi rezultatet e zgjedhjeve të 28 dhjetorit.

Në zgjedhjet e 28 dhjetorit, Lëvizja Vetëvendosje fitoi më shumë se 51 për qind, apo 57 ulëse në Kuvend. Partia Demokratike e Kosovës mori 22 ulëse, Lidhja Demokratike e Kosovës 15, ndërsa Aleanca për Ardhmërinë e Kosovës 6. 20 ulëse janë të rezervuara për komunitetet.

Zgjedhjet e shkuara s’kishin prodhuar koalicion të shumicës. Institucionet nuk u formuan që nga 9 shkurti kur u mbajtën ato dhe Kosova u fut në krizë institucionale. Si pasojë e mungesës së institucioneve, Kuvendi ende s’e ka miratuar buxhetin 2026 e as marrëveshjet ndërkombëtare shumëmilionëshe. 

Pos tyre, Kuvendi e ka obligim ta zgjedhë presidentin deri më 4 mars, një muaj para se Vjosa Osmanit t’i përfundojë mandati. 

Debat në Thurgau: A duhet bërë publike vendndodhja e radarëve të shpejtësisë?

Posted on by Alb

Në kantonin zviceran të Thurgaut po diskutohet nëse duhet publikuar vendndodhja e radarëve të shpejtësisë. Partia Popullore Zvicerane (SVP) kërkon transparencë, duke argumentuar se njohja e vendndodhjeve rrit sigurinë dhe bën që drejtuesit të vozisin më kujdesshëm, transmeton albinfo.ch.

Nga ana tjetër, Partia e Gjelbër kundërshton idenë, duke thënë se publikimi do të dobësonte efektin parandalues të kontrolleve dhe do t’i lejonte shoferët të shmangin radarët. Aktualisht, në Thurgau nuk publikohen vendndodhjet e radarëve gjysmë-stacionarë dhe të atyre mobilë, pasi policia konsideron se kjo rrit sigurinë duke ruajtur elementin e papritur.

Debati pritet të arrijë së shpejti në parlamentin kantonal, ku do të vendoset nëse kërkesa e SVP do të miratohet apo jo.