Jeta në Austri

Eurodeputeti Mandl i përgatit befasi ambasadorit kosovar në Austri

“Gënjeshtra e bardhë” e Lukas Mandl dhe Arbër Markut për Ambasadorin e Republikës së  Kosovës në Austri, Sami Ukellin

Që nga koha kur u bë e ditur se Ambasadori i Kosovës në Austri, Sami Ukelli do ta përfundojë mandatin e tij diplomatik në Austri, eurodeputeti austriak, njëherësh kryetar i shoqatës „Miqësia Austri – Kosovë“, Lukas Mandl së bashku me sekretarin e kësaj shoqate, Arbër Markun kishin menduar t`ia bënin atij një befasi. Siç pati raportuar fillimisht albinfo.ch, Z. Ukelli, së shpejti do të zhvendoset për të vazhduar punën si ambasador në Zvicër.

Amabsadori, i shtangur nga befasia që i përgatitën

Ideja e përbashkët e tyre ishte që të ftojnë miq austriakë të Kosovës dhe të ambasadorit, personalitete nga trupi diplomatik, njerëz me ndikim në Austri por edhe bashkatdhetarë shqiptarë. Në mesin e të ftuarve, ishte edhe Erhard Busek, ish ekspert për Evropën Juglindore, ish zëvendës kancelar në Austri dhe mik e kontribuues i madh për Pavarësinë e Kosovës. Nuk mungonin as familja e ambasadorit, bashkëshortja Brikenda dhe dy vogëlushet e tij, Hana dhe Ema.

Që në ftesë kërkohej që gjithçka të mbetej e fshehtë.  Arbër Marku, një aktivist mjaft i njohur shqiptar në Austri e kishte marrë përsipër ta zhvillojë “lojën” ndaj ambasadorit, ndërkaq Lukas Mandl bashkë me të ftuarit e tjerë prisnin në sallën e madhe në Shtëpinë e BE-së, në Vjenë (Haus der Europänischen Union – Wien).

Me ish zëvendëskancelarin austriak, Busek

Dy muaj me herët, Arbëri e kishte caktuar datën 24 janar dhe i kishte thënë ambasadorit se duhej patjetër të rezervonte kohën për një takim me të, pasi që bëhej fjalë për diçka shumë të rëndësishme për shtetin e Kosovës.

Pak para orës 17.00, për kur ishte paraparë të fillonte mbrëmja përshëndetëse, Arbëri takohet me ambasadorin dhe i kërkon që të shkojnë në një restorant afër Shtëpisë se BEsë në Vjenë, shkruan albinfo.ch. Teksa kalojnë pranë, Arbëri i thotë ambasadorit se duhej të hynte me shpejtësi në Shtëpinë në fjalë për të lënë një zarf dhe i kërkoi që ta shoqëronte. Sapo hapet dera e sallës, hyn ambasadori dhe sheh një grumbull njerëzish që e prisnin me duartrokitje. AI mbeti i shokuar! Për disa çaste nuk dinte as se çfarë po ndodhte dhe as se si të reagonte. Dy vajzat e tij vrapuan dhe e përqafuan, ndërsa Lukas Mandl, afrohet e i thotë: „Kjo është e pakta që kemi mundur të bëjmë për ju dhe angazhimin tuaj në Austri“, raporton “albinfo.ch”.  Ambasadori mbetet i shtangur dhe sytë i mbushen me lot, ndërsa fillon të përshëndetet me secilin që ishte në sallë.

Në podium, së bashku me eurodeputetin Mandl

Më pas Lukas Mandl fton ambasadorin të ngjitet në podiumin e sallës për një bashkëbisedim dhe për të falënderuar për bashkëpunimin mes dy shteteve: Austrisë dhe Kosovës. Ndërkohë, edhe ambasadori tha fjalët më të mira për ndihmën e vazhdueshme të shtetit austriak dhe marrëdhëniet bilaterale por edhe për vitet e mira që ka kaluar në Vjenë gjatë mandatit si ambasador.

Në fund Lukas Mandl bashkë me miq të tjerë kishin përgatitur disa dhurata falënderuese për ambasadorin tonë.

Ambasador i ri  i Kosovës në Austri, Lulëzim Pllana

Ambasadori Ukelli njoftoi se të enjten do ta këtë një takim përshëndetës para se ta përfundojë mandatin e tij në Austri dhe të marrë detyrën e re në Zvicër. Siç mëson “albinfo.ch” në vend të ambasadorit Ukelli, Ambasador i Kosovës në Austri është emëruar, Lulëzim Pllana, diplomat në Ambasadën e Kosovës në Gjermani.