Koronavirusi: çast pas çasti

Franca nuk lejon më përdorimin e hidroksiklorinës si ilaç kundër Covid-19

Qeveria franceze ka njoftuar se mjekëve në këtë shtet nuk iu lejohet më përdorimi i hidroksiklorinës si ilaç për trajtimin e koronavirusit.

Ky vendim vjen pasi Organizata Botërore e Shëndetësisë e pezulloi këtë javë testimin e hidroksiklorinës dhe të klorokinës, për shkak të shqetësimeve për sigurinë.

Hidroksiklorina, e cila përdoret normalisht për të trajtuar malarien ose artritin, është promovuar më herët nga virologu francez, Didier Raoult, i cili është takuar me presidentin e Francës, Emmanuel Macron, për të diskutuar përdorimin e saj si trajtim për pacientët me koronavirus.

Por, OBSH-ja tha këtë javë se ka pezulluar testimin e saj dhe të klorokinës, pasi një studim në revistën mjekësore britanike The Lancet ka konstatuar se përdorimi i këtyre ilaçeve te pacientët me koronavirus mund t’i rrisë shanset e tyre për të vdekur.

Sipas studimit, ato mund të prodhojnë efekte anësore, sidomos çrregullimin e ritmit të zemrës, përcjell Albinfo.ch