Gjermania mbështet integritetin dhe sovranitetin e Kosovës

Ministri i Jashtëm Gjerman, Guido Westerwelle ka ritheksuar se nuk ka ndryshim të kufijve në Ballkan dhe sipas tij për Gjermaninë kjo është e qartë.

“Nuk do të diskutohet asnjëherë ndarja e Kosovës dhe për ne kjo është punë e kryer”, tha shefi i diplomacisë gjermane  pas takimit me Kyreministrin, Hashim Thaçi.

Në pyetjen nëse Serbia do të kushtëzohet me njohjen e Kosovës për anëtarësim në BE, Westervelle, ka deklaruar se secili vend duhet të negociojë për anëtarësim, por ka shtuar se njëra nga pikat që duhet të diskutohet për anëtarësim është edhe çështja e kufijve. 

Ministri gjerman ka kërkuar nga 5 vendet e BE-së që ta njohin pavarësinë e Kosovës dhe ka theksuar se shteti i tij ka lobuar dhe po lobon për njohjen e pavarësisë së Kosovës.

Ndërsa kryeministri Thaçi ka ritheksuar se zhvillimet e fundit që kanë ndodhur në veri kanë qenë të domosdoshme dhe të ligjshme.

“Falënderoj shumë KFOR-in për punën e shkëlqyer që ka mbajtur situatën nën kontroll. Ne do të bashkëpunojmë me KFOR-in duke respektuar plotësisht marrëveshjen e arritur, po ashtu edhe bashkëpunimi me EULEX-in do të dëshmohet në projektet konkrete”, ka deklaruar kryeministri.

Westerwelle ka zhvilluar takim edhe me presidenten e vendit Atifete Jahjagën.