Kompania nga Kosova, me investim milionësh në Ulqin

Arbër Kryeziu, biznesmen i njohur nga Kosova, është drejtuar për në Ulqin me investimet e tij. Kompania e tij “Royal Company” do të investojë mbi 40 milionë euro në mënyrë që ish-hoteli “Jadran” të marrë një pamje tjetër, shkruan Telegrafi, përcjell albinfo.ch.

Të premten në Podgoricë u nënshkrua edhe aneksi IV i kontratës për mega projektin që parasheh të jetë një nga hotelët më luksozë në bregdetin e Malit të Zi. Kryeministri i Malit të Zi, Dritan Abazoviq, i cili mori pjesë në ceremoninë e nënshkrimit, tha se shteti që ai drejton është i hapur për investime. “Jemi shumë të gëzuar që edhe rajoni e ka një vullnet të cilin e ka Qeveria e Malit të Zi duke integruar investime të ndryshme. Shpresoj që ndërtimi i këtij hoteli do të jetë një vlerë shumë e madhe për qytetin”, u shpreh ai.

E pronari i “Royal Company”, Arbër Kryeziu, premtoi një nga brendet më ekskluzive në botë. “Nënshkruam Aneksin 4 të kontratës për t’u hapur rrugë investimeve në turizëm në Detin Adriatik në Ulqin, në vendin e ish-hotelit Jadran. Investimi do të jetë së paku 40 milionë euro dhe do të jetë një nga brendet më ekskluzive në botë. Ndaj, falënderoj kryeministrin dhe gjithë Qeverinë e Malit të Zi”, deklaroi Kryeziu.

Ndërkohë, kryetari i Komunës së Ulqinit e ka parë si ditë historike nënshkrimin e kësaj kontrate.  “Kjo është ditë historike për Ulqinin. Me ketë investim kemi një kthesë historike në zhvillimin e komunës tonë”, tha Omer Bajraktari. Projekti pritet të finalizohet brenda tri ose katër vjetëve,  përcjell albinfo.ch.

---