Komuna e Gjilanit shkurton orarin për punëtorët agjërues

FB: Alban Hyseni

Me vendim të kryetarit të Komunës së Gjilanit, Alban Hysenit, të gjithë punonjësit që agjërojnë gjatë muajit të Ramazanit do të punojnë një orë më pak.

Sipas këtij vendimi, puna në komunë nis në orën 09:00 e jo në orën 08:00, siç është e paraparë. Po ashtu, me këtë vendim janë obliguar drejtoritë komunale që të mbajnë evidencë për zyrtarët publikë, shkruan Koha.net, përcjellë albinfo.ch.

Zyrtari për media në Komunën e Gjilanit, Besart Selimi, i ka thënë KOHËS se vendimi është vetëm lehtësirë. “Kryetari i Komunës ka marrë vendim që të gjithë ata që agjërojnë gjatë muajit të Ramazanit të fillojnë punën nga ora 09:00, pra një orë më vonë. Nuk është ndryshim i orarit por vetëm lehtësirë për një orë duke e pasur parasysh vështirësinë e agjërimit e orarit të hershëm të syfyrit. Kjo është një praktikë që është praktiku edhe vitin e kaluar dhe po besoj që praktikohet edhe në shumë institucione të tjera”, ka thënë Selimi, përcjellë albinfo.ch.