Kurti thotë se Vuçiq refuzoi ofertën e tij për vetëmenaxhim të serbëve

Kryeministri i Kosovës, Albin Kurti, ka thënë se në Ohër kishte një ofertë për “vetëmenaxhim të serbëve të Kosovës, në një asociacion” që do ta hartonte dhe propozonte. Por, ai tha se këtë e refuzoi presidenti i Serbisë, Aleksandër Vuçiq.

Për këtë Kurti ka shkruar në Twitter, por nuk ka dhënë më shumë hollësi, transmeton albinfo.ch.

Në një postim në Twitter, Kurti ka përmendur këtë refuzim të Vuçiçit, duke i rikujtuar edhe refuzimet e tjera të presidentit serb për të nënshkruar Marrëveshjen për normalizim të marrëdhënieve mes Kosovës dhe Serbisë më 27 shkurt, si dhe aneksin për zbatimin e kësaj Marrëveshjeje, më 18 mars në Ohër.

“Pas refuzimit të nënshkrimit të Marrëveshjes së 27 shkurtit dhe para se të refuzonte sërish nënshkrimin e saj me Aneksin e 18 marsit, Presidenti i Serbisë refuzoi ofertën time bujare të vetëmenaxhimit për serbët, në një shoqatë që unë do ta hartoja dhe propozoja. A është ai dr. Jo apo z. Nyet?  Epo, ne e dimë se ai nuk është doktor”, ka shkruar Kurti./Albinfo.ch