Gjellëra

Musaka me patate

Kjo recetë që gatuhet shpesh në shtëpitë tona është një nga ato ushqime që shijohet tepër. Musaka me patate është një pjatë ushqyese dhe kalorike, të cilën familjarët tuaj do ta duan.

musaka me patatePërbërësit:

  • 1 kg patate
  • ½ kg mish i grirë
  • 5-6 kokrra qepë mesatare
  • 3-4 filxhanë kafeje vaj ulliri
  • 4-5 kokrra domate ose 1 lugë gjelle salce
  • kripë, piper, dafinë

Për beshamelin:

  • 1 lugë gjelle gjalpë
  • 1 lugë gjelle miell
  • 1 gotë çaji qumësht
  • 1 vezë
  • djathë kaçkavall

Përgatitja:

Qërojmë patatet. I lajmë dhe i presim në feta të rrumbullakëta, jo shumë të trasha. Patatet skuqen derisa të marrin pak ngjyrë.

Presim qepët në formë gjysmë rrethi dhe i skuqim në zjarr të ngadaltë në mënyrë që të mos digjen. Hedhim dhe domatet e qëruara në copa kubike, pak salcë dhe mishin e grirë dhe vazhdojmë t’i përziejmë. Përzierjes i shtojmë kripë, piper dhe fletët e dafinës.

Shtrojmë në tavë një shtesë me patatet e skuqura dhe sipër hedhim gjysmën e qepës. Vendosim dhe një shtresë tjetër me patate dhe pjesën e ngelur të qepës dhe shtresën e fundit me patate.

Skuqim miellin me gjalpë, hedhim qumësht, përzihet mirë derisa të marrë valë. Hedhim pak kripë dhe e lëmë masën të trashet. E heqim nga zjarri dhe e lëmë të ftohet pak dhe e përziejmë me vezë.
Beshamelin e përgatitur e vendosim mbi musaka dhe i hedhim djathë kaçkavall.

Ju bëftë mirë!


LAJME INTERESANTE NGA INTERNETI