Nga sot energjia elektrike paguhet më shtrenjtë

 

Raportohet se nga sot tarifat e reja të energjisë elektrike do të jenë më të shtrenjta për 15.4 për qind, përcjell albinfo.ch.

Bordi i Zyrës së Rregullatorit për Energji ditë më parë ka vendosur për shtrenjtim të çmimit të rrymës.

Rritja prej 15 për qind përkthehet: deri në 350 kw rritja është 2.88 cent; deri në 450 kilovatë, konsumatorët do të kenë rritje prej 4.5 euro në faturën mujore; 600 kw deri në 5 euro dhe mbi 800 kw në 7 euro.

Kjo rritje është e domosdoshme për furnizim të qëndrueshëm me energji elektrike.

“Ne konsiderojmë se nëse nuk kemi furnizim të qëndrueshëm me energji, kostoja do të jetë shumëfish më e madhe sesa përqindja e propozuar. Ky është minimumi për të pasur 24 orë energji elektrike”, deklaroi ditë më parë Ymer Fejzullahu, kryesuesi i Bordit të ZRRE-së.

Fejzullahu sqaroi se Kosova ka kapacitet të prodhojë rreth 800 megavatë rrymë në orë, ndërsa nevojat e saj, në ditë dimri, arrijnë deri në 1.300 megavatë në orë. Këtë diferencë, shtoi ai, vendi ynë importon nga jashtë, sipas çmimit të energjisë elektrike në bursën hungareze HUPX.

Ndryshe Qeveria e Kosovës muajve të fundit ka ndarë milionë euro për subvencionimin e energjisë elektrike, kurse shtrenjtimi i rrymës është kundërshtuar nga qytetarë dhe shoqëria civile.

---