Violonçelistja nga Kosova performon në Serbi

Marigona Komoni është nga Gjakova dhe studion në Vienë. Ndryshe nga kolegët e saj, ajo ka filluar vonë me muzikën.

“Më është dashur të punoj shumë për t’ia dalë mbanë dhe në fund jam e kënaqur me rezultatin”, u shpreh ajo.

Këtë vit u bashkua me Balkan Youth Orchestra për herë të parë.

“Gjëja kryesore për të cilën jam këtu është pa dyshim muzika, të fitoj më shumë eksperiencë, të luaj me të tjerët”, u shpreh Marigona, për DW.

Gjatë turit të saj me orkestrën ajo udhëtoi për në Serbi për herë të parë. Kështu, ajo dhe kolegët e saj nga Kosova patën edhe probleme në kufi.

“Nuk kam pasur shumë mundësi të vizitoj qytetin duke qenë se kishim prova dhe arritëm shumë vonë këtu. Patëm probleme në kufi, si shqiptarë të Kosovës. Nuk mund të kalonim kufirin mes Serbisë dhe Malit të Zi kështu na u desh të ktheheshim në Kosovë e të kalonim nga kufiri i Mërdarit. Për ne ishte rrugë e gjatë që të vijmë këtu në Serbi”, tregoi muzikantja e re për DW.

Ajo shton se në këtë orkestër nuk flasin për politikë. Secili ka ardhur me një qëllim, të luaj muzikë dhe të kalojnë kohë me njëri-tjetrin.

“Mendoj që njerëzit që njoha këto, do t’i njoh për një kohë të gjatë”, u shpreh Marigona, përcjell albinfo.ch.