Bizneset e vogla dhe të mesme, shtyllë për zhvillimin e vendit

Ndërmarrjet e vogla dhe të mesme janë bizneset të cilat e përbëjnë 99 për qind të zhvillimit ekonomik dhe cilësohet si njëri ndër sektorët bazë në krijimin e një buxheti të qëndrueshëm ekonomik të Republikës së Kosovës.

Kështu u vlerësua nga panelistët në konferencën e mbajtur nga Agjencia për Përkrahjen e Ndërmarrjeve të Vogla dhe të Mesme, në kuadër të Ministrisë së Tregtisë dhe Industrisë, me temën “Integrimi evropian i Kosovës përmes zhvillimit të biznesit të vogël”.

Kryeshefi ekzekutiv në Agjencinë për Përkrahjen e Ndërmarrjeve të Vogla dhe të Mesme në kuadër të MTI-së, Granit Berisha, duke folur për rëndësinë e këtyre bizneseve, tha se ndërmarrjet e vogla dhe të mesme llogariten si shtylla kryesore e zhvillimit ekonomik në Kosovë.

Kurse, kryetari i Prishtinës, Isa Mustafa, ka deklaruar se orientimi në biznese të vogla dhe të mesme është shumë i rëndësishme dhe zhvillimi i tyre do të krijonte edhe vende të reja pune.

Sipas tij, është me rëndësi jetike që të nxitet dhe të përkrahet zhvillimi i sektorit të ndërmarrjeve të vogla dhe të mesme, duke u krijuar sa më shumë lehtësira administrative në bërien e biznesit.

Mirëpo, shefi i Operacioneve në Zyrën Ndërlidhëse të Komisionit Evropian në Kosovë, Christof Stock është shprehur i impresionuar me punën që e kanë bërë ndërmarrjet e vogla dhe të mesme.

Stock, ka theksuar se meqë pasuria më e madhe e Kosovës janë të rinjtë e saj, atëherë është shumë e rëndësishme që atyre t’u ofrohet një mjedis i mirë për themelimin e një biznesi.

Në këtë konferencë janë publikuar edhe emrat e tri kompanive më të suksesshme, të cilat kanë kontribuar në arkën shtetërore.