Zviceranët, të parët në “Skena UP”

Në “Skena UP”, çmimi kryesor i ka takuar shfaqjes “Sehnsucht” nga shkolla zvicerane “Teatro Dimitri-Academy for physical theatre”

Në edicionin e nëntë të festivalit “Skena UP”, në kategorinë e teatrit çmimi kryesor i ka takuar shfaqjes “Sehnsucht” nga shkolla zvicerane “Teatro Dimitri-Academy for physical theatre”, me regji, skenar e në rol kryesor të Marco Cupellari.

Tregimi i kësaj shfaqjeje bazohet në jetën e një personi që jeton brenda botës së tij të izoluar me mungesë komunikimi.

“Opalescene”, filmi kanadez me regji të Alejandro Jimnez ka marrë çmimin “Filmi më i mirë” në edicionin e nëntë të festivalit “Skena UP”. Filmi i prodhuar nga shkolla INIS në Kanada me Noemie Godin-Vigneau dhe Alex Belec në rolet kryesore është vlerësuar për rrëfimin që i përmbush mrekullueshëm të gjitha kriteret e një filmi artistik.

Në këtë edicion të Festivalit Ndërkombëtar të Studentëve për Film dhe Teatër, që u mbajt prej 5 deri më 12 dhjetor në Prishtinë janë dhënë 90 filma dhe 9 shfaqje, të vendit dhe ndërkombëtar.