Kryeministri i Kosovës thotë se dialogu rrezikohet me shantazhet e Serbisë

Taksa 100 për qind ndaj mallrave serbe nuk do të hiqet deri në njohjen e Kosovës nga Serbia, ka ripërsëritur kryeministri Ramush Haradinaj. 

Pas mbledhjes së Qeverisë, Haradinaj ka thënë se nuk do të pranojnë që të vazhdojë dialogu, nëse Serbia shantazhon dhe vë kushte për këtë proces, përcjell albinfo.ch.

Kryeministri edhe një herë tjetër ka dalë kundër partnerit në koalicion, PDK-së, kreu i cilës, Kadri Veseli, ka kërkuar pezullimin e taksës për 120 ditë.

Kreu i ekzekutivit ka komentuar edhe deklaratën e kryetarit të Mitrovicës së Jugut se “mund të ketë luftë të paparë” nëse do të ketë lëvizje të kufijve në Mitrovicë.

Sipas Haradinajt, nuk do të ketë destabilizim të situatës në veri, por ka thënë se e sheh të rrezikshme tregtinë me territore. Në mbledhjen e Qeverisë, kabineti qeveritar ka miratuar dhënien e statusit të investitorit strategjik kompanisë gjermano-izraelite “SOWI KOSOVO”. 

Vlera e këtij investimi është rreth 170 milionë euro.  Qeveria ka ndarë 50 mijë euro për mbulimin e shpenzimeve për shërim jashtë vendit të Aritë Sylejmanit.