Kush është garuesi i Shqipërisë në Lojërat Olimpike Dimërore për të Rinj “Lozana 2020”

Garuesi i Shqipërisë në Lojërat Olimpike Dimërore për të Rinj “Lozana 2020” është Enzo Leonetti, një italian, e ëma e të cilit është me origjinë shqiptare, shkruan albinfo.ch.

Në një prononcim për albinfo.ch, ai ka thënë se në Lozanë të Zvicrës e përfaqëson Shqipërinë, fakt ky që po e bën atë të ndjehet shumë i lumtur dhe i emocionuar,

“Jam në Lozanë për të marrë pjesë në Lojërat Olimpike Dimërore për të Rinj, ku do ta përfaqësoj Shqipërinë dhe ndjehem shumë i lumtur dhe i emocionuar”, është shprehur Enzo Leonetti.

Ai gjithashtu garën e nesërme e ka cilësuar si shumë të rëndësishme, provat për të cilën garë i ka mbajtur edhe sot.

Duke falënderuar Federatën e Skive dhe Komitetin Olympik në Shqipëri për mundësinë që i ka dhënë të marrë pjesë në këto lojëra, ai ka premtuar se do ta japë maksimumin./albinfo.ch