Osmani e propozoi 14 Prillin si Ditë të Mbijetuarve të Dhunës Seksuale gjatë luftës së fundit në Kosovë

FB

Qeveria e Kosovës sot e ka caktuar 14 Prillin si Ditë të Mbijetuarve të Dhunës Seksuale gjatë Luftës së Fundit në Kosovë, përcjell albinfo.ch.

Me anë të një njoftimi Presidenca e Kosovës ka bërë të ditur se kjo ditë u caktuar me propozim të presidentes Vjosa Osmani.

Osmani ka theksuar se ky vendim do t’i kontribuojë ruajtjes së memories kolektive, ndërsa ka përmendur nevojën e solidarizimit me të mbijetuarit e dhunës seksuale.

“Rikujtojmë se gjatë luftës së fundit në Kosovë, rreth 20.000 persona kanë qenë viktima të luftës seksuale. Jetët e të gjithë këtyre personave ndryshuan përgjithmonë. Pikërisht më 14 prill ndryshoi gjithmonë edhe jeta e Vasfije Krasniqit, e cila u rrëmbye me forcë dhe u dhunua nga forcat serbe. Ajo mori guximin që ta ndajë të vërtetën me tërë botën. Përmes rrëfimit të saj, ajo u shndërrua në zërin e të gjithë të mbijetuarve të dhunës seksuale gjatë luftës së fundit në Kosovë”, ka thënë ndër të tjera Osmani në propozimin drejtuar Qeverisës së Kosovës.