Abazoviq sqaron votën e Malit të Zi pro Kosovës në KE

Abazoviq

Kryeministri i Malit të Zi, Dritan Abazoviq, ka thënë se vota e Malit te Zi pro-Kosovës për anëtarësim në Këshillin e Evropës nuk ishte kundër Serbisë.

Në seancën e sotme të Komitetit Parlamentar për Marrëdhënie Ndërkombëtare dhe Emigrantë, Abazoviq, duke shpjeguar votën pro të Malit të Zi për Kosovën në KE, përmendi edhe Nenin 4 të Marrëveshjes së Ohrit, duke thënë se “një vend nuk do të ndalojë një tjetër nëse dëshiron të anëtarësohet në një organizatë të caktuar ndërkombëtare”, përcjell Albinfo.ch.

“Mali i Zi votoi pro së bashku me 33 vende të tjera. Interesi i Malit të Zi këtu është më i madhi. Ai reflektohet në bashkëpunimin dhe stabilitetin rajonal. Ne nuk mund të japim një kontribut më të madh në zgjidhjen e këtyre çështjeve, por mund të jemi miqësorë dhe t’i ftojmë shtetet të gjejnë një gjuhë të përbashkët”, deklaroi ndër të tjera kryeministri shqiptar në komision, duke shtuar se shteti i tij ka marrëdhënie të mira me Serbinë.

“Kam qenë shumë kolegial, kam thënë se do të votojmë pro dhe se nuk ka asgjë kundër Serbisë. Ne jemi një vend që e kemi njohur Kosovën, jemi sjellë si të gjitha vendet që e kanë njohur, por ne i kuptojmë edhe vendet që nuk e kanë njohur Kosovën”, deklaroi ndër të tjera Abazoviq./Albinfo.ch