Kuzhinieri me renome botërore: Maza e Rugovës, ndër 5 produktet më të mira në botë

Fejsal Demiraj është kuzhinier që ka punuar në restorantin skandinav “Noma”, me renome botërore, përcjell albinfo.ch.

Ai gjatë pandemisë ka vizituar Kosovën, më konkretisht bjeshkët e Rugovës, për të parë rreth ushqimeve burimore, që mund të eksportohen jashtë vendit. Në një intervistë për KALLXO.com, ka folur për produktin e qumështit, mazën.

“Për mua si shef i kuzhinës, që kam punuar në shumë restorante nëpër botë, kam provuar produkte të ndryshme, unë besoj që maza e vjetër që bëhet në Rugovë, që e pamë sot duke u prodhuar në Bogë, është një nga produktet më të mira në botë, edhe me siguri në top pesëshen e produkteve në Evropë, ndoshta edhe më lart”, tha Demiraj. Arsyeja që ky produkt është kaq i mirë qëndron në mënyrën e përgatitjes.

“Arsyeja është se mënyra e përgatitjes së mazës është shumë e vjetër, ndoshta me mijëra vjet dhe nuk ka ndryshuar, është e njëjta si para mijëra vjetësh, si tash”, tha Demiraj.