Kurti takon von Cramon, diskutojnë për zhvillimet në veri

Kryeministri i Kosovës, Albin Kurti takon Raportuesen për Kosovë në Parlamentin Evropian, Viola von Cramon, Zyra e Kryeministrit

Kryeministri i Republikës së Kosovës, Albin Kurti, ka takuar Raportuesen për Kosovën në Parlamentin Evropian, Viola von Cramon, e shoqëruar nga shefi i Zyrës së Bashkimit Evropian në Kosovë, Tomáš Szunyog dhe bashkëpunëtorë të tjerë.

Nga Zyra e Kryeministrit bëhet e ditur se është diskutuar për zhvillimet në vend, me theks procesin e dialogut në Bruksel dhe marrëdhëniet ndërmjet Kosovës dhe Serbisë, dhe për procesin pas-zgjedhor në katër komunat në veri të vendit, përcjellë albinfo.ch.

Tutje bëhet e ditur se kryeministri rikujtoi se “zgjedhjet në katër komunat në veri të vendit ishin shtyrë një herë në dhjetor, dhe se tani pas mbajtjes së tyre me 23 prill, është e rëndësishme që të fillojmë sa më parë me ofrimin e shërbimeve bazike për qytetarët, të cilat kanë munguar që nga fillimi i muajit nëntor të vitit të kaluar pas dorëheqjes së kryetarëve pararendës”, thuhet në komunikatë.

Sa i përket dialogut të ndërmjetësuar nga Bashkimi Evropian dhe Marrëveshjes Bazike dhe Aneksit të Zbatimit të saj, Kurti përsëriti që duhet zbatim i shpejtë, i plotë dhe i pakushtëzuar, përcjellë albinfo.ch.