Osmani: Kosova të mos gabojë si Maqedonia e Veriut

Bujar Osmani

Ministri i Jashtëm i Maqedonisë së Veriut, Bujar Osmani, është shprehur se Kosova nuk duhet të marrë shembull shtetin e tij për sa i përket marrëveshjes me Greqinë para 20 vjetësh.

“Maqedonia e Veriut para 20 vjetësh në raport me Greqinë, duke menduar se ne jemi në të drejtë, tentuam ta bindim botën se ne jemi në të drejtë dhe Greqia është gabim dhe nuk pranonim një marrëveshje për ulje në tavolinë”, thotë ai për Euronews Albania.

Osmani tha se Maqedonia e Veriut ka humbur mundësinë para 20 vjetësh për të qenë pjesë e Bashkimit Evropian.

“Humbën 20 vjet, humbëm një gjeneratë që ikën nga Maqedonia e Veriut dhe nuk e di nëse do të kthehen më, humbëm shansin që të jemi pjesë e BE-së bashkë me Slloveninë dhe Kroacinë asaj kohe dhe përsëri u ulëm me Greqinë dhe gjetëm një zgjidhje që është më e vështirë sesa ofertat që kishim para 20 vjetësh”, tha Osmani, përcjell albinfo.ch.

Ai ka sugjeruar që Kosova të mësojë nga shembulli i Maqedonisë së Veriut dhe të mos përsëritet gabimi i tyre.