PDK mbledh Këshillin Drejtues për të diskutuar për veriun

Partia Demokratike e Kosovës ka thirru mbledhje të Këshillit Drejtues për të diskutuar për situatën në veri.

Mbledhja do të mbahet në orën 15:00, në Hotel “Amazona”. Të dielën mbajtjen e mbledhjes e ka paralajmëruar kryetari i PDK-së, Memli Krasniqi.

“Kam ftuar mbledhjen e Këshillit Drejtues të PDK-së, për të diskutuar për gjendjen e rëndë në vend dhe për rrugën që është para nesh. Mbi të gjitha, për vendimet dhe veprimet që i kërkon kjo periudhë sfiduese. Situata nuk është normale dhe nuk mund ta simulojmë normalitetin. Qytetarët kanë nevojë për qartësi në këtë kohë konfuzioni. Dhe, një gjë është më se e qartë: Kosova nuk mund të mbetet edhe më tutje peng e tekeve të Albin Kurtit”, ka shkruar Krasniqi, përcjell albinfo.ch.

Krasniqi ka akuzuar Kurtin për sanksionet e Bashkimit Evropian ndaj Kosovës.

“Ky kryeministër i papërgjegjshëm po e vendos Kosovën në hartën e vendeve të sanksionuara, ku nga Evropa bëjnë pjesë vetëm Rusia, Bjellorusia, Moldavia e Republika Srpska”, u shpreh tutje ai, përcjell albinfo.ch.