Kurti priti mërgatën në “Ballkonin e Hapur”

Kryeministri i Kosoves

Kryeministri i Republikës së Kosovës, Albin Kurti, mbrëmjen e së hënës për nder të Ditës së Diasporës ka organizuar pritje për mërgimtarët në ambientet e “Ballkonit të Hapur të Qeverisë”.

Kurti njoftoi mërgimtarët “mbi progresin e dukshëm demokratik e ekonomik të Kosovës të evidentuar nga të gjitha raportet ndërkombëtarë kredibile, duke përmendur kështu rritjen mesatare ekonomike, rritjen e të hyrave tatimore, eksportet e investimet e huaja direkte”, thuhet në njoftimin e Zyrës së Kryeministrit.

Tutje, Kurti  veçoi se edhe mërgata jonë ka evoluuar dukshëm vit pas viti duke e zgjeruar përfaqësimin tonë kombëtar.

“Atë sot e gjejmë në format më të suksesshme në art, në kulturë, në sport, financa, e tash së fundmi edhe përfaqësim politik në shtetet e tyre, nga niveli komunal e deri te ai qendror. Disa prej tyre janë këtu në mesin tonë sonte”, shtoi kryeministri, përcjell albinfo.ch.

Tutje, ai i prezantoi mërgimtarët edhe me programin për diplomaci publike “Citizen Diplomacy Felloëship”, që ka për qëllim ndërlidhjen me vendin e origjinës përmes angazhimit profesional, si dhe lansimin e platformës “Shijo Kosovën”, përmes së cilës mërgatës, sidomos gjeneratave të reja, i’u mundësohet njohja e vendit me anë të aktiviteteve kulturore, sportive e natyrore.

Kurti i ka njoftuar mërgimtarët edhe “me anë të lehtësimit të procesit së votimit për mërgatën rritet edhe më shumë pjesëmarrja e tyre aktive”, dhe ka shtuar se themelimi i Fondit Sovran që “bashkatdhetarët tanë dëshirojmë t’i bëjmë aksionarë në ekonominë tonë”, thuhet tutje në njoftim, përcjell albinfo.ch.

Në këtë pritje, ku të ftuar ishin pjesëtarë e figura të ndryshme nga mërgata, artistë, veprimtarë, përfaqësues të shoqatave që veprojnë në mërgatë e përfaqësues të rinj politikë atje, bashkë me kryeministrin ishin të pranishëm edhe ministra e ministre të kabinetit qeveritar dhe zëvendësministra.