Von Cramon: Kosova po humb kredibilitetin e saj në mesin e komunitetit ndërkombëtar

Raportuesja për Kosovën në Parlamentin Evropian, Viola von Cramon, ka deklaruar se Kosovës po i mungon kredibiliteti në mesin e komunitetit ndërkombëtar, prandaj ajo bën thirrje që sa më shpejt të nisë zbatimi i marrëveshjeve me Serbinë.

“Momentalisht nuk po shoh vullnet politik nga asnjëra palë për zbatimin e marrëveshjeve. Kosova është mirë të fokusohet më shumë tek vetja dhe t’i kryejë obligimet që i ka marrë përsipër. Ju nuk bëni kurrfarë ndryshimi nëse e drejtoni gishtin diku tjetër. Së paku ky është qëndrimi i institucioneve kryesore të Bashkimit Evropian. Nëse Kosova dëshiron të bëhet një lojtare e rëndësishme në mesin e komunitetit ndërkombëtar, atëherë duhet ta dëshmojë fillimisht se është një lojtare kredibile, por këtë nuk është duke e treguar”.

Cramon thotë se do ishte një veprim i duhur nga Prishtina nëse largohen tërësisht njësitet speciale të Policisë së Kosovës nga objektet komunale në veri.

Ajo nënvizon rëndësinë e zbatimit të marrëveshjeve të arritura mes Kosovës dhe Serbisë, në mënyrë që të qetësohet situata në pjesën veriore të vendit.

“E gjithë rrëmuja që është krijuar në pjesën veriore të Kosovës duhet të rregullohet. Lidhur më këtë çështje tashmë ka një marrëveshje dhe ajo vetëm duhet të respektohet. Pra, do të ishte veprim i duhur që të largohen njësitet speciale të Policisë së Kosovës nga objektet komunale në veri. Para se të flisni për palën serbe, është më mirë që fillimisht t’i kryeni detyrat tuaja”, shprehet ajo për Tëvë1.

Bashkimi Evropian ende nuk ka ndryshuar qëndrim sa u përket masave ndëshkuese ndaj Kosovës.