Përplasje e hapur mes Kurtit dhe prokurorëve

Albin Kurti

Arrestimi i dy zyrtarëve të lartë në Ministrisë së Tregtisë në Kosovë për keqpërdorim të rezervave shtetërore, ka bërë që Kryeministri i Kosovës, Albin Kurti dhe Këshilli Prokurorial i Kosovës të kenë një përplasje mes tyre.

KPK ka dënuar ashpër deklaratat e kryeministrit Albin Kurti, i cili i akuzoi gjykatësit e prokurorët e shtetit si kastë e vjetër në  mbështetje tё krimit, shkruan DW.

Këshilli Prokurorial i Kosovës i cilësoi tendencioze, të pavërteta e linçuese ndaj institucionit të Prokurorisë dhe prokurorëve deklaratat e kryeministrit Kurti.

“I bëjmë thirrje kryeministrit dhe ministrave të kabinetit të tij qeveritar që të përmbahen nga deklaratat e vazhdueshme shantazhuese dhe rrjedhimisht nënçmuese, ndaj sistemit prokurorial të Kosovës në përgjithësi dhe ndaj punës së prokurorëve në veçanti, duke tentuar të linçojnë publikisht çdo gjë që ka të bëjë me sistemin prokurorial dhe punën e prokurorëve të shtetit”, thuhet në reagimin e Këshillit Prokurorial, përcjell albinfo.ch.

Të arrestuar për keqpërdorim të rezervave shtetërore, të Ministrisë së Industrisë, Tregtisë dhe Ndërmarrësisë janë Hafiz Gara, drejtor për Rezervat Shtetërore dhe Irfan Lipovica, drejtor në Departamentin për Integrim Evropian. I arrestuari i tretë  është një afarist Ridvan Muharremi, shkruan DW.