AAK kërkon shkarkimin e Qeverisë

Besnik Tahiri, FB

Shefi i Grupit Parlamentar të AAK-së, Besnik Tahiri, kërkon që Qeveria e udhëhequr nga Albin Kurti të shkarkohet.

Ai thotë se kjo duhet të ndodhë për shkak se Qeveria Kurti me politikat e saj po e dëmton vendin.

“Jemi në një situatë jashtëzakonisht problematike, një situatë shumë serioze, e cila përshkruhet me dobësim të Kosovës në të gjitha rrafshet, si në rrafshin e brendshëm, edhe të jashtëm. Një situatë e cila karakterizohet me krizë pas krize e skandal pas skandali, e cila po reflekton në varfërim të skajshëm të shumë familjeve”, është shprehur Tahiri, përcjell albinfo.ch.

Tutje kërkoi edhe shkarkimin e menjëhershëm të ministres së Industrisë, Ndërmarrësisë dhe Tregtisë, Rozeta Hajdari.

“Shqetësuese është sulmi që i bëhet gjyqësorit dhe prokurorisë nga ana e qeverisë, në tentim për të mbuluar skandalin me vjedhjen e rezervave shtetërore. Tani më është fakt që 52.5 tonë miell nuk kanë ardhur në Kosovë, e shumë sasi vaji mungon, ndërkaq dëmi i pretenduar është mbi 600 mijë euro. Për këtë skandal, për këtë vjedhje Qeveria e Kosovës hesht, ndërkaq e akuzon gjyqësorin e prokurorinë. Ky pushtet nuk i beson shtetit të vet. Këta njerëz synojnë të krijojnë sistem të vetin, një sistem paralel. Për të ndodhur një hetim i pavarur, është e domosdoshme të shkarkohet ministrja Hajdari”, ka thënë ai, përcjell albinfo.ch.

Ai shton se  Ministria e Arsimit, me vendimin për mossigurimin e librave shkollorë për nxënësit, ka dëmtuar nxënësit dhe ka rënduar gjendjen financiare të shumë familjeve. “Vendimi i MASHTI-t për refuzimin për t’i siguruar librat për nxënësit, është edhe një fakt që kjo qeveri nuk ka synim t’i ndihmojë njerëzit. Ky vendim ka qëllim krijimin edhe të një krize të re, ta dëmtojë buxhetin e shumë familjeve. Kjo krizë ndalet vetëm me shkarkimin e kësaj qeverie”, është shprehur Tahiri, përcjell albinfo.ch.