Austria kërkon burg për sulmuesit e ushtarëve në Kosovë

Qëndrimi zyrtar i Vjenës për kandidaturën e Serbisë për anëtarësim në BE do të varet nga hapat që do të ndërmarrë Beogradi gjatë ditëve të ardhshme për qetësimin e situatës në veri të Kosovës, raportojnë agjencitë të ketë deklaruar ministri i Jashtëm i Austrisë, Michael Spindelegger.

“Njëmbëdhjetë ushtarë të plagosur austriakë të KFOR-it kanë qenë temë bisede në mbledhjen e sotshme të shefave të diplomacisë së BE-së në Bruksel, citon REL Spindeleggerin.

Ai ka thënë se ka prezantuar qëndrimin e Austrisë, e cila pret që udhëheqja serbe, përveç dënimit të dhunës, të ndërmarrë hapa në drejtim të arrestimit dhe të dënimit të personave që kanë përdorur forcën kundër ushtarëve të KFOR-it.

“Kjo është ajo që kërkojmë në mënyrë që Serbia të ecë përpara drejt Bashkimit Europian”, tha Spindelegger.

Ai po ashtu ka thënë se këtë qëndrim ua ka përcjellë edhe ministrave të jashtëm të Serbisë, Vuk Jweremiq, dhe atij të Kosovës Enver Hoxhaj.

“Do të presim dhe të shohim nëse gjatë ditëve të ardhshme do të ndërmerren hapa dhe në bazë të kësaj do të vendosim se a do ta mbështesim dhënien e statusit të kandidatit Serbisë” , ka paralajmëruar ai.