Burani me spinaq dhe mish

Burania është një nga gjellët më të gatuara në shtëpitë tona; mund të gatuhet me mish ose pa mish, por është një gjellë e shëndetshme për vlerat ushqimore që ka.

Përbërësit:

•       200 gr mish viçi
•       500 gr spinaq
•       80 gr oriz
•       1 kokërr qepë (mesatare)
•       6 qepë e njomë
•       2 lugë gjelle vaj ulliri
•       1 kokërr domate
•       1 degë nenexhik
•       kripë
•       piper
•       800 ml ujë.

Përgatitja:

Hidhni në një tenxhere vajin e ullirit, shtoni mishin e prerë në copa, kripë dhe piper dhe lërini të skuqen copat e mishit.
Kur të kenë marrë ngjyrë, shtoni qepën dhe lëreni 5-7 minuta të gatuhet me mishin.
Më pas shtoni qepën e njomë dhe orizin, kavërdisni mirë përbërësit dhe lërini të marrin pak ngjyrë.
Shtoni domaten e qëruar dhe të prerë në kubikë dhe më pas ujin që burania të zihet.
Pasi të ketë marrë valë, kontrollojeni për kripë.
Pasi të jetë trashur gjella, shtoni në minutat e fundit të gatimit spinaqin dhe nenexhikun që të mos humbasin ngjyrën dhe shijen.

Ju bëftë mirë!

LAJME INTERESANTE NGA INTERNETI