Kantoni i Nidwalden po modernizon mënyrën e shqyrtimit dhe pagesës së gjobave administrative. Qeveria kantonale ka miratuar urdhëresën e re mbi Aktin e Gjobave Administrative, e cila hyn në fuqi më 1 korrik 2025. Me këtë ndryshim, proceset do të bëhen më të thjeshta, më të kuptueshme dhe në përputhje me zhvillimet dixhitale, shkruan Blick, transmeton albinfo.ch.

Sipas urdhëresës së re, gjithçka do të mund të bëhet online, nga konsultimi i gjobës deri te pagesa. Gjobat do të mund të paguhen përmes kodit QR, ndërsa pagesat tradicionale me fletëpagesë do të mbeten të mundshme për ata që preferojnë formatin klasik. Po ashtu, nëse gjoba nuk është shkaktuar nga personi i regjistruar, identifikimi i personit përgjegjës mund të bëhet përmes platformës online.

Urdhëresa përcakton gjithashtu kompetencat e institucioneve zbatuese, duke sqaruar nëse në rastet konkrete vepron policia, inspektorati i peshkimit apo autoriteti mjedisor. Qëllimi është të rritet transparenca dhe efikasiteti në trajtimin e kundërvajtjeve administrative.

Po ashtu, katalogu i ri i gjobave përcakton një shumë maksimale prej 300 frangash zvicerane, duke e bërë të qartë shkallën e sanksioneve për shkelje të ndryshme, transmeton albinfo.ch.

Nga fillimi i muajit korrik, qytetarët dhe bizneset në Zvicër do të përballen me një sërë ndryshimesh ligjore dhe rregullatore që prekin fusha të ndryshme të jetës publike dhe private. Nga drejtësia penale për të miturit, në mbrojtjen e konsumatorit dhe të drejtave të kafshëve, ja një përmbledhje e reformave që hyjnë në fuqi më 1 korrik 2025:

1. Drejtësia për të Miturit: Burgim si të rritur për krime të rënda

Një ndryshim në Kodit Penal për të Miturit lejon që të miturit të moshës 16-18 vjeç që kryejnë vrasje, në raste të rralla dhe me kritere të rrepta, të ndalohen më vonë si të rritur. Megjithatë, deri në moshën 18 vjeç ata do të vazhdojnë të trajtohen sipas ligjit për të miturit. Ndërhyrja synon të trajtojë më seriozisht rastet e krimeve të rënda të kryera nga adoleshentët, shkruan Blick, transmeton albinfo.ch.

2. Kontrolli shëndetësor: Zgjerim i mbulimit për kancerin dhe lehtësim për kronikët

Zbulimi i hershëm i kancerit të zorrës së trashë do të mbulohet nga sigurimet shëndetësore deri në moshën 74 vjeç (nga 69 më parë).

Pacientët me sëmundje kronike nuk do të kenë më nevojë të dorëzojnë çdo vit dëshmi për nevojat e tyre për artikuj ose shërbime ndihmëse. Vendimi u mor për të reduktuar burokracinë dhe koston e panevojshme administrative.

3. Lufta kundër falsifikimeve: Procedura të thjeshtuara për dërgesa të vogla

Falsifikimet e zbuluara në kufi nëpërmjet pakove të vogla përbëjnë mbi 90% të rasteve. Nga korriku, autoritetet do të mund të shkatërrojnë mallrat më shpejt, pasi vetëm blerësi do të njoftohet fillimisht. Nëse ai pranon shkatërrimin, procesi përfundon menjëherë. Mbajtësi i të drejtave mund të ndërhyjë vetëm në rast kundërshtimi.

4. Testet e drejtimit: Njohuri të detyrueshme për teknologjitë moderne

Kandidatët për patentë për automjete (kategoritë B, BE, B1, A, A1) duhet të njohin sistemet moderne të asistencës së shoferit, të cilat do të testohen si në pjesën teorike ashtu edhe praktike. Qëllimi është rritja e sigurisë në rrugë dhe kuptimi i kufizimeve teknologjike, transmeton albinfo.ch.

5. Simbolet për biçikleta elektrike dhe skuterë

Simboli i “biçikletës” do të vlejë edhe për:

Biçikletat elektrike të ngadalta dhe të shpejta, Skuterët elektrikë deri në 20 km/h.

Ndërkohë, “motoçikletat elektrike të rënda” (biçikleta mallrash deri në 450 kg) do të klasifikohen tashmë si motoçikleta. Ato nuk mund të përdoren më në zona të ndaluara për motoçikleta, as edhe me motorin e fikur.

6. Etiketa e energjisë për telefonat dhe tabletët

Në përputhje me legjislacionin e BE-së, telefonat inteligjentë dhe tabletët do të duhet të kenë etiketë të efikasitetit energjetik nga A (jeshile) në G (e kuqe). Qëllimi është transparenca për konsumatorët mbi konsumin e energjisë dhe riparueshmërinë e pajisjeve.

7. Etiketim për produkte me dhimbje shtazore

Mish, vezë dhe qumësht që vijnë nga kafshë që i janë nënshtruar procedurave të dhimbshme pa anestezi (si kastrimi, prerja e brirëve ose sqepave) do të duhet të etiketohen si të tilla. Edhe foie gras dhe produktet e tjera me origjinë të diskutueshme do të mbajnë etiketa përkatëse.

Gjithashtu, ndalohet importi i leshit të përfituar përmes mizorisë ndaj kafshëve, me një periudhë tranzicioni prej dy vitesh, transmeton albinfo.ch.

Në një votim të mbajtur të dielën, banorët e Vevey-së thanë “jo” planit për vendosjen e 44 kamerave të sigurisë në zonën e stacionit, me qëllim luftimin e trafikimit të drogës në rrugë, shkruan Blick, transmeton albinfo.ch.

Me një pjesëmarrje prej 36.4%, 60.6% e votuesve (3.008 vota kundër dhe 1.888 pro) refuzuan këtë iniciativë, duke bllokuar kështu një projekt që kishte nisur në janar nga këshilli bashkiak i qytetit.

Vevey, qyteti ku ndodhet selia e Nestlé dhe një nga zonat më të prekura në kantonin Vaud nga trafikimi i drogës, ishte në pritje të një pakete masash që përfshinte jo vetëm instalimin e kamerave, por edhe punësimin e punonjësve socialë, ngritjen e një vëzhguesi social dhe përmirësimin e ndriçimit publik.

Parlamenti lokal kishte miratuar projektin në mars, por për shkak të debatit dhe ndjeshmërisë së temës, çështja u vendos në referendum për vendimmarrje direkte nga qytetarët.

Me refuzimin e kësaj mase, Vevey duket se zgjedh të mos përdorë mbikëqyrjen me video si mjet për të luftuar trafikimin, duke e lënë në plan të parë rëndësinë e përfshirjes sociale dhe zgjidhjeve alternative për përmirësimin e sigurisë në zonën e stacionit, transmeton albinfo.ch.

Për të përmirësuar qasjen në shërbime për njerëzit me njohuri të kufizuara të gjuhës gjermane, Posta Zvicerane po teston një projekt inovativ në pesë degë të Cyrihut. Klientët mund të marrin shërbime edhe në gjuhë të tjera, përfshirë anglishten, frëngjishten dhe shqipen, varësisht nga aftësitë gjuhësore të punonjësve në sportel, shkruan SRF, transmeton albinfo.ch.

Ky projekt pilot, i nisur në dhjetor, ka për qëllim të shfrytëzojë pasurinë gjuhësore të punonjësve të Postës, të cilët përfaqësojnë më shumë se 100 kombësi dhe flasin mbi 100 gjuhë të ndryshme. Shërbimi është i vullnetshëm dhe varet nga prania e personelit shumëgjuhësh në degë.

Zëdhënësja e medias së Postës, Silvana Grellmann, konfirmon se reagimet kanë qenë jashtëzakonisht pozitive. “Klientët e vlerësojnë shumë mundësinë për të marrë këshilla në një gjuhë që e kuptojnë. Disa janë edhe të gatshëm të presin për këtë shërbim,” tha ajo, transmeton albinfo.ch.

Në degën e Glattbrugg, ku punon Brian Santana, një punonjës që flet gjermanisht, spanjisht dhe anglisht, klientët tashmë vijnë qëllimisht për të përfituar nga ndihma shumëgjuhëshe. “Disa klientë madje udhëtojnë në Wallisellen vetëm sepse e dinë që punoj atje,” thotë ai.

Ndërsa projekti po hyn tani në fazën strategjike, Posta Zvicerane po vlerëson rezultatet me mundësinë për ta shtrirë në mbarë vendin. Ndërkohë, pesë degët e Cyrihut dhe një në Zvicrën frëngjishtfolëse kanë shprehur dëshirën për të vazhduar me këtë ofertë.

Ky shërbim, ndonëse mirëpritur nga shumë, nuk është pa debat. Çështja e integrimit dhe domosdoshmërisë së mësimit të gjermanishtes mbetet një temë e ndjeshme në arenën politike dhe publike.

Megjithatë, për Postën Zvicerane dhe klientët e saj, shumëgjuhësia po shihet si një pasuri, jo si pengesë, transmeton albinfo.ch.

Zvicra po përballet me një tjetër valë të nxehtësisë, ndërsa temperaturat ekstreme po shndërrohen në realitet të përditshëm për qytetarët. Pas një rënie të shkurtër nën 30 gradë Celsius ditën e enjte, sinoptikanët paralajmërojnë rikthimin e të nxehtit përvëlues, që nuk prek vetëm të ndjeshmit ndaj motit, por ndikon dukshëm edhe në përformancën e punonjësve në vendin e punës, shkruan 20minuten, transmeton albinfo.ch.

Sipas studimeve, përqendrimi i punëtorëve bie ndjeshëm kur temperaturat kalojnë mbi 30°C, por pavarësisht kësaj, shumica e punonjësve janë të detyruar të shkojnë në punë si zakonisht. Pyetja që shtrohet në këto kushte është: a janë të mbrojtur punëtorët nga vala e nxehtësisë?

Nicole Vögeli Galli, avokate dhe lektore për të drejtën e punës në Universitetin e Aplikuar ZHAW, sqaron për mediat se, edhe pse ekzistojnë rregullore që kërkojnë mbrojtje të punonjësve, ligji nuk përcakton një temperaturë fikse mbi të cilën puna konsiderohet e paarsyeshme. “Në praktikë, përjashtimi nga puna për shkak të motit të keq është i mundur vetëm në raste të veçanta,” thotë Vögeli, transmeton albinfo.ch.

Sipas saj, moti “i keq” në kuptimin ligjor mund të përfshijë edhe temperaturat shumë të larta, por vendimi për të liruar punonjësin nga detyra varet nga shumë faktorë: lloji i punës, lagështia në ambient, era, si dhe masat që ka marrë punëdhënësi për të garantuar sigurinë.

Sekretariati Shtetëror për Çështjet Ekonomike (SECO) rekomandon ndërmarrjen e masave parandaluese në momentin kur temperaturat i afrohen ose e kalojnë 34 gradë Celsius. Këto masa përfshijnë:

Lehtësim të kodit të veshjes në zyrë;

Vendosjen e ventilatorëve ose ajrit të kondicionuar;

Ndryshim të orarit të punës (p.sh. fillim më herët në mëngjes);

Pushime më të shpeshta gjatë orarit të punës.

Nëse, pavarësisht këtyre masave, ekziston ende rrezik për shëndetin e punonjësve, punëdhënësi duhet të sigurojë pushim nga puna. Megjithatë, pagesa për këtë kohë të lirë nuk është e detyrueshme, nëse punëdhënësi ka ndërmarrë të gjitha masat mbrojtëse të nevojshme.

Në rastet kur vala e të nxehtit zgjat për ditë të tëra, kompanitë mund të aplikojnë për punë me kohë të shkurtuar dhe të kërkojnë kompensim përmes sigurimit të papunësisë, transmeton albinfo.ch.

Për punëtorët që punojnë jashtë, si në sektorin e ndërtimit, rekomandohet përdorimi i jelekëve ftohës, një masë tashmë e zakonshme në sport, si dhe mbrojtje e detyrueshme ndaj rrezeve UV, përfshirë kremra mbrojtës dhe veshje të lehta. Vlerësimi i kushteve duhet të bëhet në mënyrë profesionale kur temperaturat kalojnë 36°C për punë fizike të rëndë, apo 39°C për punë të lehtë.

Ligji kërkon mbrojtje të veçantë për grupet e ndjeshme, përfshirë gratë shtatzëna, nënat që ushqejnë me gji dhe personat me gjendje shëndetësore të cenueshme. Ato nuk duhet të punësohen në mënyrë që rrezikon shëndetin e tyre apo të fëmijëve të tyre.

Në rastet kur shkollat mbyllen për shkak të temperaturave ekstreme dhe fëmijët qëndrojnë në shtëpi, prindërit kanë të drejtë të mungojnë nga puna për t’u kujdesur për ta – por kjo nuk garanton pagesë, përveç nëse është parashikuar ndryshe në kontratë.

Ndërsa valët e nxehtësisë po bëhen gjithnjë e më të shpeshta, mbrojtja e punonjësve në Zvicër kërkon qasje serioze nga punëdhënësit. Ligji nuk vendos kufij të prerë temperaturash, por obligon ndërmarrjen e masave konkrete për të garantuar një ambient pune të sigurt – si për të punësuarit në zyrë, ashtu edhe për ata në terren, transmeton albinfo.ch.

Duke filluar nga 1 korriku 2025, kantoni i Basel-Stadt do të zgjerojë skemën e subvencioneve të qirasë, përfshirë për herë të parë edhe familjet pa fëmijë. Qeveria kantonale ka miratuar urdhëresën përkatëse, e cila do të lehtësojë barrën financiare të qirasë për mijëra banorë të qytetit, shkruan Blick, transmeton albinfo.ch.

Sipas vendimit të ri, kontributet mujore do të variojnë nga 50 deri në 1.060 franga zvicerane, në varësi të të ardhurave, madhësisë së banesës dhe shumës së qirasë.

Autoritetet lokale vlerësojnë se rreth 3.250 familje të tjera do të përfitojnë nga ky ndryshim, krahas përfituesve ekzistues. Kjo përfshin personat që jetojnë vetëm ose çiftet pa fëmijë, me të ardhura vjetore deri në 50.000 franga zvicerane, për sa kohë që të paktën njëri prej tyre ka banuar në Basel-Stadt për të paktën dy vite.

Aplikimet për të përfituar nga subvencionet mund të dorëzohen në Zyrën e Kontributeve Shoqërore (Amt für Sozialbeiträge). Skema synon të promovojë përballueshmërinë e strehimit dhe të mbështesë qytetarët që përballen me kosto të larta jetese, veçanërisht në qytetet me treg të ngushtë të banesave si Baseli, transmeton albinfo.ch.

Një zjarr i fuqishëm shpërtheu të dielën pasdite në portin e qytetit Zug, duke përfshirë disa anije dhe shkaktuar një shtyllë të madhe tymi që ishte e dukshme nga disa kilometra larg. Policia kantonale e Zugut konfirmoi intervenimin emergjent, ndërkohë që në vendngjarje ndodhen zjarrfikësit dhe përfaqësues të Zyrës Kantonale për Mjedisin, shkruan 20minuten, transmeton albinfo.ch.

Pamjet dhe videot e publikuara nga dëshmitarët tregojnë për flakë të përhapura në disa anije, si dhe dëgjohen shpërthime të herëpashershme. Sipas policisë, katër anije janë prekur nga zjarri, dy prej të cilave janë fundosur. Për fat të mirë, nuk ka raportime për të lënduar.

“Zjarri u përhap shumë shpejt,” tha dëshmitari okular Hennes, i cili ishte ndër të parët që njoftoi zjarrfikësit. Sipas tij, një direk i një anijeje me vela u shemb dhe kontribuoi në përhapjen e flakëve drejt anijeve të tjera. “Shpresoja vetëm që askush të mos ishte brenda në ato momente,” u shpreh ai.

Zëdhënësi i policisë, Frank Kleiner, deklaroi për mediat se operacioni i shuarjes përfundoi pak pas orës 16:00. Ndërkohë, ekipet e emergjencës janë duke monitoruar ndotjen e mundshme të liqenit, pasi karburanti dhe materialet djegëse nga anijet e shkatërruara janë derdhur në ujë gjatë ndërhyrjes.

Autoritetet kanë nisur hetimet për shkaqet e zjarrit dhe po vlerësojnë masat për të kufizuar ndikimin mjedisor në liqenin e Zugut, transmeton albinfo.ch.

Me nisjen e sezonit të pushimeve verore, autoritetet zvicerane kanë paralajmëruar për trafik të ngarkuar dhe bllokime të gjata në rrugët kryesore, veçanërisht në autostradën A2 dhe zonën e tunelit Gotthard, që shërben si nyje kyçe për kalimet veriore-jugore, shkruan The Local, transmeton albinfo.ch.

Sipas Zyrës Federale të Rrugëve (ASTRA), datat e fundjavave të korrikut dhe gushtit duhet shmangur për udhëtime, pasi ato përkojnë me pikun e fluksit të automjeteve, si nga udhëtarët vendas ashtu edhe nga ata ndërkombëtarë që kalojnë tranzit nëpër Zvicër për të udhëtuar drejt Italisë apo vendeve të tjera të Mesdheut.

Gotthard: pika më e ndjeshme

Tuneli Gotthard, i gjatë 17 kilometra, pritet të mbingarkohet ndjeshëm, duke krijuar kolona që zgjasin disa orë. Autoritetet kujtojnë se bllokimet në këtë rrugë janë të zakonshme gjatë verës dhe mund të shmangen duke udhëtuar gjatë javës, në vend të fundjavave, ose duke zgjedhur rrugë alternative si San Bernardino.

Kalendari i trafikut TCS: si të lexoni ngjyrat

Organizata zvicerane e automobilave TCS ka publikuar një kalendar të ngjyrosur të rrjedhës së trafikut:

E kuqe – trafik shumë i rënduar

Portokalli – trafik i rënduar

E verdhë – trafik i ngadaltë

E gjelbër – trafik i rrjedhshëm

Në korrik, vetëm datat 1 dhe 2 korrik janë të shënuara me ngjyrë të gjelbër, ndërsa fundjavat nga 4-6, 11-13, 18-20 dhe 25-29 korrik mbarten si ditët më problematike për udhëtim, me trafik të mbingarkuar, transmeton albinfo.ch.

Gushti, muaji i kthimit dhe i festës kombëtare

Në gusht, situata nuk përmirësohet. Me kthimin e pushuesve dhe rifillimin e vitit shkollor në kantone të ndryshme nga 8 deri më 15 gusht, si dhe Ditën Kombëtare më 1 gusht (e shtunë), pritet që rrugët të mbingarkohen edhe më shumë.

Sipas kalendarit të TCS, vetëm 28 dhe 29 gushti shihen si ditë të sigurta për udhëtim. Pjesa tjetër e muajit do të shënohet me trafik të ngadaltë apo të rënduar në shumicën e rrugëve, në të dy drejtimet.

Këshilla për udhëtarët

Shmangni udhëtimet nga e premtja deri të dielën, sidomos në korrik dhe gusht

Planifikoni rrugët gjatë javës, kur trafiku është më i qetë

Kontrolloni trafikun në kohë reale në faqet zyrtare të ASTRA ose TCS para nisjes

Merrni në konsideratë rrugë alternative përtej tunelit Gotthard, si rrota e San Bernardino-s

Autoritetet paralajmërojnë se edhe ditët “e mira” mund të mbingarkohen nëse shumë udhëtarë vendosin të udhëtojnë në të njëjtën kohë. Udhëtarëve u rekomandohet fleksibilitet, durim dhe planifikim i hershëm për të shmangur stresin dhe vonesat gjatë pushimeve, transmeton albinfo.ch.