Archives

Prokuroria urdhëron ndërprerjen e përkohshme të numërimit në Mitrovicë

Posted on by Drin Reçica

Sot, Prokuroria Themelore në Mitrovicë ka njoftuar se ka urdhëruar që përkohësisht te ndërpritet procesi i mëtejmë i numërimit të fletëvotimeve në Qendrën  Komunale të Numërimit në komunën e Mitrovicës, përcjell albinfo.ch.

Në njoftim është thënë se ka pasur pretendime për manipulim me fletëvotime dhe do të pritet deri në marrjen e përgjigjes zyrtare nga operatori ekonomik që i ka shtypur fletëvotimet, për të sqaruar numrat e ndryshëm serikë në disa fletëvotime.

“Kjo ka ardhur si pasojë e raportimit të parregullsive të paraqitura që kanë rezultuar me ndërprerjen e votimit nga ana e komisionerëve, për shkak të numrave serikë të ndryshëm në disa fletëvotime, ku është aluduar për gabime teknike, e po ashtu ka pasur edhe pretendime se kemi të bëjmë me manipulim të qëllimshëm me fletë votime. Për këto arsye, dhe me qëllim të shmangies të të gjitha dilemave, kjo urdhëresë vlen deri në marrjen e një përgjigje zyrtare nga operatori ekonomik që ka shtypur fletë votimet, e ku do të konfirmohet se a kemi të bëjmë me gabim teknik apo me manipulim të fletë votimeve, dhe varësisht nga përgjigja e marrë do të procedohet tutje”, thuhet në njoftim.

Në balotazhin e të dielës, në këtë komunë sipas rezultateve preliminare, ka fituar Faton Peci i Lëvizjes Vetëvendosje përballë Arian Tahirit të Partisë Demokratike të Kosovës.

Në mbrëmjen e së hënës, Komisioni Qendror i Zgjedhjeve pati thënë se ka konstatuar se në disa prej dengjeve të fletëvotimeve ka ndodhur një gabim në shtypjen e njërit prej elementeve të fletëvotimit, konkretisht në kodin e vendvotimit.  

Gjermani: Qeveria ashpërson masat kundër punës në të zezë

Posted on by Drin Reçica

Mësohet se Qeveria federale gjermane po ndërmerr hapa të rinj për të forcuar luftën kundër punës në të zezë dhe punës së padeklaruar, një problem që vazhdon të ndikojë ndjeshëm në tregun e punës dhe në të ardhurat publike të vendit, përcjell albinfo.ch.

Referuar burimeve qeveritare, projektligji i ri, i përgatitur nga koalicioni CDU/CSU dhe SPD, pritet të votohet në Bundestag më 13 nëntor 2025. Ky ligj synon të ashpërsojë ndëshkimet dhe të përmirësojë mekanizmat e kontrollit, sidomos në sektorët ku fenomeni është më i përhapur.

Në fokus të veçantë të këtij ligji do të jenë shërbimet për shpërndarjen e ushqimit, si dhe disa shërbime të tjera të lëvizshme ku rastet e punës së padeklaruar janë shtuar ndjeshëm vitet e fundit.

Sipas propozimit, punonjësit do të kenë detyrim të mbajnë dhe paraqesin dokumente identifikimidhe dëshmi të tjera që verifikojnë statusin e tyre të punës. Ndërkohë, punëdhënësit do të përballen me një detyrim të menjëhershëm raportimi për çdo punësim të ri, për të garantuar transparencë të plotë dhe shmangie të abuzimeve.

Përveç kësaj, gjobat për shkelje të rregullave pritet të rriten ndjeshëm, ndërsa organet kompetente do të pajisen me më shumë kompetenca për inspektime dhe ndëshkime.

Qeveria gjermane e sheh këtë hap si pjesë të një strategjie më të gjerë për të forcuar ekonominë formale, për të mbrojtur të drejtat e punëtorëve dhe për të siguruar konkurrencë të ndershmemidis bizneseve.

Dy aktorë shqiptarë shkëlqejnë në Netflix me filmin ndërkombëtar “Departure”

Posted on by Drin Reçica

Bëhet fjalë për Xhemi Agaj dhe Etienne Kellici përfaqësojnë me sukses artin shqiptar në kinemanë botërore, transmeton albinfo.ch.

Dy aktorë me prejardhje shqiptare që jetojnë në Kanada, Xhemi Agaj dhe Etienne Kellici, po tërheqin vëmendjen e publikut ndërkombëtar me rolet e tyre në filmin “Departure”, i cili tashmë transmetohet në platformën gjigante Netflix.

Filmi trajton një histori të thellë emocionale që flet për humbjen, dhimbjen dhe forcën njerëzore për t’u rimëkëmbur, duke sjellë në ekran një mesazh prekës për shpresën dhe rilindjen. Me regji të kujdesshme dhe rrëfim të ndërtuar me ndjeshmëri, “Departure” është vlerësuar për realizmin e tij dhe interpretimet e fuqishme të aktorëve kryesorë.

Performancat e Agajt dhe Kellicit janë cilësuar si ndër pikat më të forta të filmit, duke reflektuar autenticitet, pasion dhe profesionalizëm. Me prezencën e tyre në këtë produksion ndërkombëtar, ata po e bëjnë të njohur artin shqiptar në një prej skenave më të mëdha të kinemasë botërore.

Ky sukses është një dëshmi e qartë se talentet shqiptare po fitojnë terren në industrinë globale të filmit, duke sjellë vlera, histori dhe identitet në çdo projekt ku marrin pjesë./Albinfo.ch

Shkencëtarja shqiptare në Microsoft në ballinën e revistës së njohur kanadeze

Posted on by Drin Reçica

Në numrin më të ri të revistës Whoman Canada, ballina kryesore i është dedikuar Florida Doçit, një grua shqiptare që po formëson të ardhmen e inteligjencës artificiale në Kanada dhe në mbarë botën. Me një përkushtim të thellë ndaj zhvillimit etik të teknologjisë, Florida po dëshmon se inovacioni mund dhe duhet të udhëhiqet nga empatia dhe humanizmi, transmeton albinfo.ch. 

Ajo rrëfu se inteligjenca nuk ndërtohet vetëm në kod apo të dhëna, por edhe në dhembshuri, integritet dhe guximin për të ëndërruar përtej kufijve. Pikërisht kjo filozofi e ka bërë një prej zërave të dalluar në fushën e inteligjencës artificiale në Microsoft, ku punon si kërkuese shkencore në zhvillimin dhe implementimin e A.I.-së në mënyrë të përgjegjshme dhe bashkëpunuese.

Florida Doçi është pjesë e brezit të ri të mendjeve krijuese që po ndërthurin teknologjinë me vlerat njerëzore, duke ndikuar në mënyrën si kompanitë e mëdha ndërtojnë produkte që i shërbejnë shoqërisë.

Rruga e saj akademike është po aq mbresëlënëse: ajo ka përfunduar studimet në Universitetin e Windsor-it, ku mori dy diploma, në Shkenca Politike dhe Shkenca Biologjike & Bioteknologji. Më pas, përfundoi Masterin në Shkenca Ndërdisiplinare të Shëndetit në Universitetin e Ottawa-s, ku aktualisht është në proces të përfundimit të doktoraturës në Shëndetin e Popullatës.

Historia e saj është dëshmi e fuqisë së dijes dhe përkushtimit. Nga auditorët universitarë në Kanada, deri në një nga kompanitë më të mëdha të teknologjisë në botë, Florida Doçi po frymëzon një brez të ri grash shqiptare që besojnë se mund të ndërtojnë botën e së nesërmes me mendje të hapur dhe zemër të madhe.

Lexoni historinë e saj frymëzuese në Whoman.ca – një reflektim i shkëlqimit, ekuilibrit dhe shpirtit njerëzor pas inovacionit. https://whoman.ca/dr-florida-doci-shaping-canadas-ai-landscape-with-vision-and-expertise/

Kantoni i Lucernit dërgon 18,000 letra të pasakta tatimore

Posted on by Alb

Zyra Tatimore e Lucernit, në bashkëpunim me një partner të jashtëm, dërgoi javën e kaluar një letër informuese të gjithë individëve që nuk kishin dorëzuar ende deklaratat e tyre tatimore për vitin 2024. Letra i kujtonte ata të dorëzonin deklaratat deri më 31 dhjetor 2025, transmeton albinfo.ch.

Gabimi ndodhi gjatë përgatitjes së letrave, shkruan Kancelaria Shtetërore e Lucernit në një komunikatë për shtyp. Letra ishte dërguar si për individë, ashtu edhe për kompani.

Letra një-faqëshe ishte printuar në të dyja anët, dhe secila letër kishte emrin e një marrësi të ndryshëm në faqen e pasme. Në total, rreth 18,000 letra u prekën nga ky gabim.

Çfarë do të ndodhë tani?

Zyra Tatimore kërkon falje për gabimin dhe shqetësimet e shkaktuara. Të gjithë individët dhe kompanitë e prekura do të marrin së shpejti letra të reja dhe të sakta.

 

KQZ del me sqarim për fletëvotimet e dyshimta në Mitrovicë

Posted on by Alb

Komisioni Qendror i Zgjedhjeve (KQZ) ka sqaruar shqetësimet lidhur me një gabim të konstatuar në disa fletëvotime gjatë procesit të verifikimit në Qendrën Komunale të Numërimit në Mitrovicën e Jugut.

Bazuar në informatat e Komisioneve Komunale të Gjakovës dhe Mitrovicës së Jugut, gabimi lidhet me shtypjen e kodit të vendvotimit në disa fletëvotime. Kompania përgjegjëse për shtypjen ka pranuar mundësinë që problemi të ketë ndodhur në printerin mekanik dhe do të ofrojë një sqarim zyrtar në ditët në vijim.

KQZ thekson se numri total i fletëvotimeve është saktë dhe çdo fletëvotim ka numër serik që përputhet me numrin e pranuar dhe të verifikuar. Komisioni siguron se ky gabim teknik nuk ndikon në integritetin e procesit të votimit dhe numërimit, pasi fletëvotimet përmbajnë elementë sigurie që e bëjnë të pamundur falsifikimin ose kopjimin e tyre.

 

Donald Trump kërcënon BBC-në me padi për dokumentarin mbi 6 Janarin

Posted on by Alb

Donald Trump i ka dërguar BBC-së një letër ku kërcënon me veprime ligjore, duke intensifikuar krizën për transmetuesin publik britanik mbi mënyrën se si është trajtuar periudha e administratës së tij.

Sipas raportimeve të BBC News të hënën, letra vjen vetëm një ditë pas dorëheqjes së drejtorit të përgjithshëm dhe të shefes ekzekutive të lajmeve të korporatës, të cilët u kritikuan për mbulimin e deklaratave të Trump më 6 janar 2021, kur mbështetësit e tij sulmuan Kongresin Amerikan.

Një zëdhënës i BBC-së tha se letrën do ta shqyrtojnë dhe do t’i përgjigjen në kohën e duhur. Detajet e plota të saj nuk janë bërë publike.

Tim Davie, Drejtori i Përgjithshëm, dhe Deborah Turness, shefja e lajmeve, njoftuan dorëheqjet e tyre të dielën pas një vale kritike mbi supozimin e mungesës së paanshmërisë politike të BBC-së dhe sulmeve të drejtpërdrejta nga figura të së djathtës britanike dhe ekipi i Trump-it.

Trump dhe zëdhënësja e tij, Karoline Leavitt, kritikuan BBC-në për “lajme të rreme” dhe përshëndetën dorëheqjet përmes rrjeteve sociale, duke e quajtur çiftin e larguar “të pandershëm” dhe të përfshirë në përpjekje për të ndikuar zgjedhjet presidenciale.

Së fundmi, gazeta konservatore The Telegraph publikoi një memo nga ish-këshilltari i standardeve të BBC-së, Michael Prescott, ku përmendeshin disa dështime të supozuara të transmetuesit, duke përfshirë mbulimin e çështjeve transgjinore, konfliktin në Gaza dhe periudhën e presidencës së Trump.

Pretendimi kryesor ishte se Panorama kishte redaktuar fjalimin e Trump në mënyrë selektive, duke krijuar përshtypjen se ai kishte thënë: “Do të ecim drejt Kapitolit dhe do të luftojmë.” Në fakt, fjalia ishte nxjerrë nga pjesë të ndryshme të fjalimit, duke lënë jashtë segmentet ku Trump kërkonte që mbështetësit të vepronin paqësisht.

BBC është e detyruar të qëndrojë neutrale, dhe nuk është hera e parë që përballet me akuza për paanshmëri. Megjithatë, sulmet e fundit nga e djathta britanike ndodhin në një kohë delikate, ndërsa qeveria po shqyrton modelin e financimit të BBC-së.

Në deklaratën e dorëheqjes, Davie pranoi se “janë bërë disa gabime dhe përgjegjësia përfundimtare bie mbi mua.” Kryetari i BBC-së, Samir Shah, kërkoi ndjesë ndaj administratës Trump për mbulimin, por hodhi poshtë pretendimet e Prescott se BBC kishte tentuar të fshehte dështimet e saj.

Shah sqaroi se dokumentari mbi Trump ishte diskutuar nga Komiteti i Udhëzimeve Redaksionale dhe Standardi i BBC-së dhe ankesat e fundit çuan në “reflektim të mëtejshëm.” Ai pranoi se mënyra e redaktimit mund të kishte krijuar përshtypjen e një thirrjeje për dhunë dhe kërkoi ndjesë për gabimin.

Në lidhje me mundësinë e një padie nga Trump, Shah tha: “Nuk e di ende, por ai padit shpesh. Duhet të jemi të përgatitur për çdo rezultat.”

 

Ndalohet numërimi i votave në Mitrovicë, gjenden fletëvotime me numra të ndryshëm serik

Posted on by Alb

Gjatë rinumrimit të votave në Qendrën Komunale të Numërimit në Mitrovicë, gjatë ndërrimit të paradites, raportohet se u gjetën fletëvotime me numër serial të ndryshëm nga klasa përkatëse.

Ferdi Kadriu, Drejtor i Drejtorisë për Bujqësi dhe Zhvillim Rural, njoftoi se ndërrimi i dytë i numërimit po kryhej, por procesi u ndërpre nga organet e rendit dhe të drejtësisë. Numëruesit u larguan nga salla dhe puna u pezullua.

Në vendngjarje tashmë ka arritur edhe prokurori i shtetit, ndërsa mediumi lokal Mitropol ka publikuar pamje nga brenda qendrës. Ekspertët e KQZ-së raportohet se po bëjnë verifikimin e fletëvotimeve

 

 

Studimi britanik: Nuk ka lidhje mes përdorimit të paracetamolit në shtatzëni dhe autizmit

Posted on by Alb

Sipas të dhënave më të fundit shkencore, nuk ekziston asnjë provë që vërteton një lidhje mes përdorimit të paracetamolit gjatë shtatzënisë dhe shfaqjes së autizmit te fëmijët, bën të ditur një studim i publikuar sot në revistën mjekësore britanike BMJ.

Ky hulumtim hedh poshtë pretendimet e bëra kohët e fundit nga ish-presidenti amerikan Donald Trump, i cili në shtator u kishte bërë thirrje grave shtatzëna të shmangnin përdorimin e këtij ilaçi.

“Të dhënat aktuale janë të pamjaftueshme për të mbështetur ndonjë lidhje mes ekspozimit ndaj paracetamolit gjatë shtatzënisë dhe zhvillimit të çrregullimeve si autizmi apo ADHD te fëmijët,” – theksojnë autorët e studimit.

Komuniteti shkencor ka reaguar gjerësisht ndaj deklaratave të Trump, duke sqaruar se nuk ka asnjë konsensus mjekësor që mbështet këto akuza. Përkundrazi, paracetamoli (i njohur si “Tylenol” në SHBA) konsiderohet qetësuesi më i sigurt për gratë shtatzëna, ndryshe nga aspirina dhe ibuprofeni, të cilët janë vërtetuar se mund të dëmtojnë fetusin.

Edhe Organizata Botërore e Shëndetësisë (OBSH) ka përsëritur menjëherë pas deklaratave të Trump se nuk ekzistojnë prova shkencore që mbështesin një lidhje të tillë mes përdorimit të paracetamolit dhe çrregullimeve të zhvillimit.

 

Gjermani: Qeveria drejt kompromisit për rikthimin e shërbimit ushtarak

Posted on by Alb

Ministri gjerman i Mbrojtjes, Boris Pistorius, shprehu besimin se gjatë kësaj jave qeveria do të arrijë marrëveshje për një ligj të ri që synon rikthimin e një forme të shërbimit ushtarak, në kuadër të përpjekjeve për të rritur numrin e efektivëve në ushtri.

Gjatë një vizite në regjimentin e sigurisë kombëtare në Munster, Pistorius deklaroi se ishte “shumë optimist”, duke shtuar se “po afrohemi çdo ditë e më shumë drejt dakordësimit përfundimtar”.

Kabineti qeveritar, i përbërë nga blloku konservator i kancelarit Friedrich Merz dhe Partia Socialdemokrate, ka propozuar rikthimin e shërbimit vullnetar, si një mënyrë për të përforcuar Bundeswehr-in.

Sidoqoftë, brenda koalicionit kanë lindur mosmarrëveshje mbi hapat që duhen ndërmarrë në rast se mungojnë vullnetarët e mjaftueshëm për t’iu bashkuar forcave të armatosura.

Një nga opsionet e diskutuara është përzgjedhja e të rinjve me short për të kryer vlerësime fizike dhe psikologjike, e nëse është e nevojshme, përfshirja e tyre në një formë të kufizuar të shërbimit të detyrueshëm — propozim që ka hapur debat të gjerë publik.

Pistorius nënvizoi se shërbimi ushtarak duhet të mbetet mbi baza vullnetare, duke përmendur shembuj pozitivë nga vende të tjera evropiane. Megjithatë, ai shtoi se “nëse rezultatet nuk janë sipas pritshmërive, atëherë do të shqyrtohen edhe elementë detyrues”.

“Gjatë negociatave do të punojmë për të gjetur një zgjidhje të arsyeshme e të balancuar, që të jetë në interes si të ushtrisë, ashtu edhe të brezit të ri”, përfundoi ministri.

 

Natmir Mehmedi, një histori suksesi dhe humanizmi që frymëzon

Posted on by albinfo.ch

Në Zvicër jeton dhe vepron një emër që mishëron forcën, përkushtimin dhe shpirtin e pastër njerëzor. Natmir Mehmedi, me origjinë nga fshati Zagraçan i Strugës, është sot një shembull frymëzimi për komunitetin shqiptar dhe më gjerë, një dëshmi se suksesi i vërtetë nuk matet me pasuri, por me ndikimin që lë tek të tjerët.

Nga një fillim i vështirë drejt një rruge të re

Historia e tij nis në vitin 1999, kur vetëm 18-vjeçar, Natmiri mori një vendim që do t’ia ndryshonte jetën. “Mora 4 mijë marka borxh për të marrë pasaportë dhe vizë në një emër tjetër,” kujton ai. U nis drejt kurbetit, pa siguri e pa mbështetje, me vetëm një shpresë- të ndërtojë një jetë të re përmes punës së ndershme.

Katër ditë udhëtim e sollën në një realitet të panjohur, ku çdo ditë ishte sfidë për mbijetesë. Në fillim punoi në kopshtari dhe agrikulturë, por vendosmëria e tij e bëri të dallueshëm. Pas tre muajsh, u bë udhëheqës ekipi, duke fituar respektin e punëdhënësve. Megjithëse jetoi për një kohë pa dokumente, kurrë nuk e humbi besimin se çdo vështirësi është e përkohshme.

Nga mjeshtëria te sipërmarrja

Pas disa vitesh pune të palodhur, ai nisi një kapitull të ri. I mbështetur nga punëdhënës italianë, u zhvillua si mjeshtër i gipsit dhe më pas themeloi në vitin 2010 kompaninë e tij “FIT IM”, e specializuar në renovime dhe dizajn të brendshëm.

Kompania, që filloi me përpjekje modeste, sot është një emër i njohur në tregun zviceran dhe bashkëpunon me rrjetin e kinemave në Zvicër. Me profesionalizëm, përpikëri dhe ndershmëri, Natmir Mehmedi ka ndërtuar një reputacion që përfaqëson vlerat më të mira të punëtorit dhe sipërmarrësit shqiptar në Zvicër.

 

Humanizmi si themel i suksesit

Por ajo që e bën Natmirin të veçantë nuk është vetëm rrugëtimi i tij profesional, është mënyra se si ai e ka kthyer suksesin në shërbim të tjerëve.
Nëpër vite, ka ndihmuar dhjetëra bashkëkombës që kanë ardhur në Zvicër pa strehë, pa punë dhe pa mbështetje, duke u ofruar vendbanim, punësim apo thjesht një dorë të ngrohtë në momentin më të vështirë.

Një nga rastet më prekëse është ai i një personi nga Maqedonia, për të cilën ka paguar qiranë për dy vite me radhë dhe e ka ndihmuar në shpenzimet e përditshme gjatë trajtimit shëndetësor gjithmonë në heshtje, pa kërkuar publikisht njohje apo falënderime.

Ai është i pranishëm në shumë raste të ngjarjeve humanitare të organizuara në diasporë, shpesh si kontribues anonim. Ka ndihmuar familje në nevojë në Kosovë, Shqipëri dhe Maqedoni të Veriut, duke dërguar ndihma materiale, ushqimore e mjekësore, sidomos gjatë periudhave të krizave ekonomike e shëndetësore.
Për të, humanizmi është mënyrë jetese, jo rastësi. “Mirësia dhe humanizmi janë investim. Hap dyer që nuk i imagjinon, si fara e grurit që e mbjell dhe merr njëqindfish,” thotë ai shpesh, me qetësinë që e karakterizon.

Fuqia e unitetit – diaspora e Strugës në Zvicër

Përveç ndihmave individuale, Natmiri ka ditur ta shndërrojë ndjenjën e solidaritetit në organizim kolektiv. Ai është një nga figurat kyçe në krijimin dhe funksionimin e grupit të diasporës së Strugës në Zvicër, një rrjet që bashkon bashkëvendës nga të gjitha fshatrat e Strugës, të shpërndarë në kantone të ndryshme.

Nën udhëheqjen e tij, ky grup është bërë një urë bashkimi e mirëkuptimi, që mban gjallë lidhjen me vendlindjen përmes aktiviteteve kulturore, ndihmave për familjet në nevojë dhe përkrahjes së nismave lokale në Strugë.
Në bashkëpunim me të tjerë veprimtarë të diasporës, Natmiri ka ndihmuar në organizimin e mbledhjeve humanitare, në financimin e projekteve shoqërore dhe në krijimin e një fryme bashkëpunimi që ka tejkaluar dallimet krahinore apo politike.

“Struga është rrënja jonë, Zvicra është toka ku lulëzojmë – dhe detyra jonë është të mos i ndajmë, por t’i lidhim,” shprehet ai me thellësi.
Për Natmirin, diaspora është një forcë që duhet të ndërtojë ura, të mbajë identitetin dhe të japë shembull bashkimi.

Familja, themeli i vlerave

Për Natmirin, suksesi i vërtetë qëndron në ruajtjen e ekuilibrit mes punës dhe familjes. Fëmijët e tij janë rritur me dashuri, përkushtim dhe ndjenjë përgjegjësie – vlera që ai i konsideron gurthemel të çdo arritjeje.
“Unë nuk dua të ngre veten mbi të tjerët. Edhe një të dobët kur e shoh, i afrohem dhe e inkurajoj, sepse e kam përjetuar vetë çfarë do të thotë të mos kesh përkrahje,” rrëfen ai me sinqeritet.

Në jetën e tij, çdo arritje është e lidhur me respektin ndaj njeriut, punën e ndershme dhe mirënjohjen ndaj rrënjëve.

Një frymë që ngjall shpresë

Historia e Natmir Mehmedit është shumë më tepër se një biografi suksesi, është rrëfimi i një njeriu që ka ditur të ngrihet mbi sfidat, pa harruar asnjëherë të shtrijë dorën ndaj tjetrit.
Në një botë që shpesh harron vlerat e thjeshta, ai na kujton se mirësia është gjuha më universale, se bashkimi është forca që na bën të qëndrueshëm, dhe se suksesi pa shpirtin e ndarë me të tjerët mbetet i paplotë.

Faleminderit, Natmir Mehmedi, për shembullin që jep, për forcën që frymëzon dhe për dritën që shpërndan në heshtje, si një njeri që beson në punë, në dashuri dhe në humanitet.

 

Rritet numri i vizitorëve në Kosovë, Shqipëria dhe Gjermania kryesojnë listën

Posted on by Alb

Sipas të dhënave zyrtare për sektorin e turizmit, gjatë shtatorit 2025, numri i vizitorëve në hotelet e Kosovës ka shënuar rritje krahasuar me të njëjtën periudhë të vitit të kaluar. Në total, gjatë këtij muaji janë regjistruar 64,727 vizitorë.

Kosova vazhdon të tërheqë turistë edhe pas përfundimit të sezonit veror. Shtatori ka treguar një rritje të dukshme të aktivitetit turistik, me më shumë qëndrime në hotele dhe interes të shtuar si nga turistët vendorë, ashtu edhe nga ata të huaj.

Nga 64,727 vizitorë, 39.1% (rreth 25,330 persona) ishin vendas, ndërsa 60.9% (rreth 39,397 persona) të huaj, duke treguar rëndësinë e turizmit ndërkombëtar për sektorin hotelier të vendit.

Gjatë këtij muaji janë realizuar gjithsej 146,598 net-qëndrime: 50.6% (rreth 74,175 net-qëndrime) nga vizitorët vendas dhe 49.4% (rreth 72,423 net-qëndrime) nga turistët e huaj. Ky raport tregon një balancë të qëndrueshme mes turizmit të brendshëm dhe atij ndërkombëtar, duke dëshmuar aktivitet të qëndrueshëm edhe pas muajve të pikut veror.

Peja – destinacioni më i preferuar i turistëve vendas

Rajoni i Pejës ka qenë më i vizituari nga turistët vendas në shtator. Qyteti ka pritur 8,281 vizitorë vendorë, të cilët kanë kryer gjithsej 25,048 net-qëndrime. Ky rezultat konfirmon Pejën si një nga destinacionet kryesore të turizmit në Kosovë, për shkak të natyrës së pasur malore, burimeve termale dhe mundësive për turizëm rekreativ.

Turistët e huaj – kryesisht nga Shqipëria dhe Gjermania

Numri i vizitorëve të huaj ka mbetur i qëndrueshëm, me 39,397 persona gjithsej. Shtetet që kryesojnë listën e turistëve që vizituan Kosovën këtë muaj janë: Shqipëria, Gjermania, Zvicra, Turqia, Mali i Zi, Maqedonia e Veriut, Italia dhe Austria. Këto të dhëna tregojnë se Kosova mbetet një destinacion i preferuar për turistët rajonalë dhe diasporën, të cilët përbëjnë një pjesë të konsiderueshme të vizitorëve të huaj.

 

Në cilin shtet evropian do të rriten më shumë çmimet e ushqimeve në 2026?

Posted on by Alb

Sipas parashikimeve ekonomike, Kroacia pritet të shohë një rritje më të fortë të çmimeve të ushqimeve në vitin 2026 krahasuar me mesataren e Eurozonës. Analistët theksojnë se kroatët shpenzojnë rreth 25% të të ardhurave të tyre vetëm për ushqim, dhe nëse përfshihen edhe shpenzimet për strehim, energji dhe transport, mbi gjysmën e buxhetit familjar shkon për nevoja bazike.

Parashikohet që çmimet e ushqimeve në Kroaci të rriten me rreth 4.1%, që është dyfish më shumë se niveli i pritshëm për Eurozonën, i cili qëndron pranë 2%. Ndryshe nga Kroacia, shumica e vendeve të tjera të Eurozonës kanë ndalur rritjen e çmimeve ushqimore gjatë këtij viti. Mesatarisht, inflacioni i ushqimeve në Eurozonë (pa Kroacinë) ka rënë pak nga 3.3% në korrik në 3.2% në gusht, ndërsa ushqimet e papërpunuara u rritën deri në 5.5%, krahasuar me 2.6% për ushqimet e përpunuara, përcjell albinfo.ch

Në Kroaci, çmimet e ushqimeve u rritën ndjeshëm gjatë muajve maj, qershor dhe korrik, duke arritur një nivel të rreth 7%, përpara se të zbuteshin në 6.6% në gusht. Për një pjesë të madhe të vitit, rritja e çmimeve të ushqimeve ka qenë më e lartë se inflacioni i përgjithshëm.

Banka Kombëtare e Kroacisë (CNB) vuri në dukje se ushqimet kanë qenë motor kryesor i inflacionit këtë vit. Kryeekonomisti Vedran Šošić shpjegoi se rritja e çmimeve lidhet me luhatjet në tregjet globale të lëndëve të para ushqimore dhe me rritjen e pagave, që u mundëson prodhuesve të kalojnë kostot më të larta tek konsumatori. CNB parashikon që rritja e çmimeve të ushqimeve të ngadalësohet gradualisht deri në fund të vitit.

 

Zvicra pranë një marrëveshjeje të re tregtare me SHBA-në, tarifat pritet të ulen në 15%

Posted on by Alb

Zvicra është raportuar se është pranë arritjes së një marrëveshjeje të përmirësuar tregtare me Shtetet e Bashkuara, e cila do të ulte tarifat doganore në 15% për eksportet zvicerane, sipas burimeve të Bloomberg, transmeton albinfo.ch.

Kjo marrëveshje do të përbënte një lehtësim të madh për Zvicrën, pas tarifës prej 39% të vendosur në gusht.

Deri në 20 gradë: Flluska e nxehtësisë së Saharasë ngroh Zvicrën

Posted on by erezzaademi

Guetzli-t e Krishtlindjeve janë tashmë në dyqane, por adhuruesit e verës mund të presin me padurim ditë jashtëzakonisht të buta përsëri këtë javë. Flluska e nxehtësisë së Saharasë na sjell temperatura deri në 20 gradë në fund të javës së punës. Kjo bëhet e mundur nga një zonë me presion të ulët pranë brigjeve të Spanjës dhe Portugalisë, shkruan 20minuten. Së bashku me një temperaturë të lartë mbi Evropën Lindore, ajo siguron që ajri i ngrohtë nga Afrika e Veriut të kapet dhe të drejtohet drejt nesh.

Flluska e nxehtësisë pritet të arrijë kulmin të enjten dhe të premten. Kufiri zero gradë më pas rritet në 3500 deri në 4500 metra. Në një lartësi prej 2000 metrash, priten deri në 14 gradë. Në luginat e föhn janë të mundshme edhe 20 gradë, transmeton albinfo.ch.

Në ultësira, temperaturat varen nga shpejtësia e shkrirjes së mjegullës. Nëse dielli shfaqet në pasdite, veçanërisht vendet pak të ngritura si Zürichberg ose Uetliberg mund të presin 15 gradë të buta.

Meteorologu Peter Wick e klasifikon situatën: “Kjo fazë nxehtësie është shumë e theksuar, por jo një fenomen i përhershëm. Në nëntor mund të ketë gjithashtu ngrica dhe borë, ose, nëse kushtet e motit janë të përshtatshme, një fazë të shkurtër nxehtësie. Situata e motit është praktikisht “akti i dytë i verës Martini”, thotë Wick. “Të premten, mund të ketë gjithashtu mjaft grimca pluhuri në ajër për shkak të fluksit të ajrit Saharian, gjë që e bën qiellin të duket pak i verdhë.”

Jo të gjithë janë të lumtur për motin e ngrohtë

Sado i këndshëm që dielli shkëlqen në nëntor, trupi vështirë se është i përgatitur për luhatje të tilla të temperaturës. Shumë njerëz reagojnë me probleme të qarkullimit të gjakut, dhimbje koke ose probleme me gjumin. Efekti i nxehtësisë është gjithashtu i dukshëm në natyrë: bimët mbijnë përsëri, pemët frutore formojnë sytha dhe insektet mbeten aktive më gjatë. Kjo mund të prishë përkohësisht ekuilibrin natyror.

Gjuetarët e apartamenteve në Zvicër paralajmërohen për rritje të mashtrimeve të reja

Posted on by erezzaademi

Mashtrimet me qira nuk janë asgjë e re, por grupet zvicerane të konsumatorëve dhe agjencitë e pasurive të paluajtshme po paralajmërojnë për numrin dhe shtrirjen në rritje të këtyre mashtrimeve.

Forumi Zviceran i Konsumatorëve ka ngritur së fundmi alarmin për një lloj të ri mashtrimi që synon njerëzit që kërkojnë strehim me qira: këta kriminelë nuk veprojnë më në hije, por në publik, duke infiltruar platformat legjitime të pasurive të paluajtshme për të kryer mashtrimin e tyre.

Këtë vit, Zyra Federale për Krimin Kibernetik (FOCC) ka marrë 228 raportime për mashtrime në lidhje me listat e pasurive të paluajtshme.

Ky numër po rritet me shfaqjen e teknologjive të reja, sipas SMG Swiss Marketplace, grupit që operon markat kryesore zvicerane të pasurive të paluajtshme si ImmoScout, Homegate dhe Flatfox.

“Në përgjithësi, në internet dhe në të gjitha llojet e platformave dixhitale, po shohim një rritje të përpjekjeve për mashtrim, megjithëse këto shpesh shfaqen në valë,” tha zëdhënësi i kompanisë Fabian Korn.

“Teknologjitë e reja, të tilla si përdorimi i inteligjencës artificiale, ofrojnë mundësi më të mëdha për zhvillimin e mashtrimeve të reja,” shtoi ai.

Si funksionon një mashtrim tipik me qira?

Sipas Tribune de Genève, “sapo një qiramarrës potencial gjen një pronë që i pëlqen në internet dhe kontakton pronarin ose agjencinë e qirasë, atij i kërkohet të rezervojë pronën përmes faqes së internetit TripAdvisor.”

Në të njëjtën kohë, pronari informon personin e interesuar se ndodhet jashtë vendit dhe nuk dëshiron të udhëtojë pa nevojë përsëri në Zvicër nëse personi nuk e ka seriozisht marrjen me qira të apartamentit. Prandaj, kërkohet një depozitë.

Kjo mbështetje te kompanitë e palëve të treta si TripAdvisor ose Airbnb është “veçanërisht e fshehtë”, sipas faqes së dedikuar për listat mashtruese në ImmoScout24, shkruan thelocal, transmeton albinfo.ch.

Për të krijuar një ndjenjë sigurie, “mashtruesit ofrojnë të transferojnë depozitën tuaj të sigurisë në një llogari me një kompani me reputacion të mirë, si Airbnb ose TripAdvisor, në vend që t’i paguajnë ata direkt”, shpjegon platforma online. “Kjo duket më e sigurt sepse kompania supozohet të veprojë si një trust i pavarur, i cili do t’i kthejë paratë nëse vendosni përfundimisht të mos e përdorni akomodimin.”

Megjithatë, mashtruesit më pas dërgojnë një lidhje në një faqe interneti të rreme që duket tamam si ajo e vërteta që i përket një agjencie të besueshme.

Si mund ta shmangni rënien në këtë kurth?

Duke pasur parasysh mungesën e banesave në shumë qytete zvicerane, mund të tundoheni nga një nga këto reklama.

Megjithatë, ka mënyra për të shmangur këtë skenar të rastit më të keq:

Kini kujdes nëse një ofertë duket shumë e mirë për të qenë e vërtetë

Verifikoni gjithmonë që adresa e pronës ekziston vërtet. Qëndroni të informuar rreth çmimeve të pasurive të paluajtshme në zonën që ju intereson. Nëse pronat e krahasueshme zakonisht kushtojnë dy herë më shumë se reklama, ky është një sinjal alarmi. Një çmim i ulët përdoret shpesh për të joshur viktimat e listave mashtruese.

Gjithmonë vizitoni apartamentin personalisht

Mos nënshkruani një kontratë qiraje ose mos paguani një depozitë sigurie para se të shikoni apartamentin fizik. “Edhe nëse takoni dikë personalisht që pretendon të jetë qiradhënësi, gjithmonë duhet të vizitoni pronën para se të nënshkruani një kontratë qiraje ose të transferoni para”, sipas Zyrës Federale të Kohezionit Social.

Refuzoni çdo qira që kërkon pagesë paraprake nga jashtë vendit përmes kompanive të transferimit të parave

Në vend që të përdorni një shërbim transferimi parash, kërkoni një numër llogarie bankare për transaksione. Përsëri, mos bëni asnjë pagesë para se të vizitoni apartamentin që planifikoni të merrni me qira.

Mos zbuloni informacione personale të ndjeshme

Mos ndani kurrë informacione personale, siç është një kopje e dokumentit tuaj të identifikimit ose numri i llogarisë bankare, në internet. Këto informacione mund të përdoren kundër jush. Kur komunikoni me reklamuesin, kërkoni informacionin e kontaktit të biznesit të tij (adresën, numrin e telefonit, etj.) dhe verifikojeni atë.

Nëse keni ndonjë dyshim në lidhje me një reklamë, kontaktoni drejtpërdrejt platformën online.

Ata mund të kryejnë kontrollet e nevojshme dhe ta heqin reklamën nëse rezulton të jetë mashtruese.

Gjithmonë kryhet një verifikim për të përcaktuar nëse është me të vërtetë një përpjekje për mashtrim. Në fakt, disa reklama shënohen si potencialisht mashtruese, por rezultojnë të jenë legjitime.

“Kjo është arsyeja pse një shqyrtim rast pas rasti para çdo çaktivizimi është gjithmonë i këshillueshëm,” tha grupi SMG Swiss Marketplace.

Zgjedhje pa fitues absolut, por me mesazhe për partitë

Posted on by erezzaademi

Rezultatet preliminare, të publikuara nga Komisioni Qendror i Zgjedhjeve (KQZ) për garat me balotazh në 18 komuna të Kosovës, të mbajtura më 9 nëntor, krijuan një balancë të re lokale mes partive politike – me fuqi pothuajse të barabartë.

Bazuar në të dyja rundet e votimeve për kryetarë të 38 komunave, Lëvizja Vetëvendosje (LVV) dhe Lidhja Demokratike e Kosovës (LDK) fituan secila nga shtatë komuna. Partia Demokratike e Kosovës (PDK) fitoi gjashtë, ndërsa Aleanca për Ardhmërinë e Kosovës (AAK) ruajti udhëheqjen në pesë.

Nisma Socialdemokrate, Partia Turke KDTP dhe iniciativa e Ramiz Lladrovcit siguruan nga një komunë secila. Ndërsa, Lista Serbe ka kontrollin në të dhjetë komunat me shumicë serbe.

Një rezultat i fragmentuar politikisht

Sociologu dhe analisti politik, Artan Muhaxhiri, vlerëson për Radion Evropa e Lirë se këto rezultate nuk kanë prodhuar një fitues apo humbës të qartë në nivel partie.

“Në përgjithësi, është një shpërndarje shumë e llojllojshme e fituesve – gjë që, logjikisht, nuk lejon të ketë fitues apo humbës absolut. Por, gjithsesi, partitë do ta interpretojnë sipas dëshirave të tyre”, thotë ai.

Partitë politike dhe komunat ku fituan kandidatët e tyre për kryetar

Lëvizja Vetëvendosje (7 komuna): Mitrovicë e Jugut, Gjilan, Obiliq, Fushë Kosovë, Kamenicë, Podujevë dhe Shtime

Lidhja Demokratike e Kosovës (7 komuna): Prishtinë, Pejë, Dragash, Viti, Junik, Istog dhe Lipjan

Partia Demokratike e Kosovës (6 komuna): Prizren, Vushtrri, Kaçanik, Skënderaj, Ferizaj dhe Han i Elezit

Aleanca për Ardhmërinë e Kosovës (5 komuna): Gjakovë, Suharekë, Klinë, Rahovec dhe Deçan

Partia Turke KDTP (1 komunë): Mamushë

Nisma Socialdemokrate (1 komunë): Malishevë

Iniciativa e Ramiz Lladrovcit (1 komunë): Drenas

Lista Serbe (10 komuna): Kllokot, Leposaviq, Novobërdë, Shtërpcë, Zubin Potok, Zveçan, Graçanicë, Ranillug, Partesh dhe Mitrovicë e Veriut

Në të njëjtën linjë është edhe politologu Dritëro Arifi, i cili thekson se Lëvizja Vetëvendosje ka dëshmuar një përhapje më të gjerë gjeografike sesa në zgjedhjet e mëparshme, megjithëse në nivel asambleje ajo mbetet forca e tretë.

“Është një balancë interesante. Me asamble, LVV-ja është në vendin e tretë, por me komuna (kryetarë) është më mirë se ka qenë para katër ose tetë vjetësh. Unë do të thosha se jemi duke parë një fragmentarizim të pushtetit lokal – me një rënie të lehtë edhe të PDK-së në krye të komunave, por jo në nivel asambleje”, shpjegon Arifi për Radion Evropa e Lirë.

Përqendrimi në qendrat kryesore

Sipas Muhaxhirit, partitë do ta matin suksesin e tyre në bazë të fitores në qendrat kryesore.

“LDK-ja do të mbështetet te fitorja në Prishtinë, por duhet të merret parasysh se ka humbur dy bastione tradicionale: Fushë Kosovën dhe Obiliqin. Në anën tjetër, LVV-ja ka shënuar avancim të rëndësishëm, veçanërisht me fitoren në Mitrovicën e Jugut”, thotë Muhaxhiri.

Ai shton se PDK-ja nuk ka performuar mirë në këto zgjedhje, por ka arritur të ruajë Prizrenin – një nga komunat më të rëndësishme të vendit.

AAK-ja mbajti të gjitha komunat që i qeveriste më parë, gjë që, sipas Muhaxhirit, është një rezultat i qëndrueshëm.

Rezultati i partive në zgjedhjet lokale në vitin 2021

Partia Demokratike e Kosovës (9 komuna): Prizren, Drenas, Kaçanik, Vushtrri, Dragash, Mitrovicë e Jugut, Skënderaj, Han i Elezit dhe Ferizaj

Lidhja Demokratike e Kosovës (7 komuna): Prishtinë, Fushë Kosovë, Istog, Viti, Junik, Pejë dhe Lipjan

Aleanca për Ardhmërinë e Kosovës (5 komuna): Gjakovë, Klinë, Rahovec, Therandë dhe Deçan

Lëvizja Vetëvendosje (4 komuna): Gjilan, Podujevë, Kamenicë dhe Shtime

Nisma Socialdemokrate (1 komunë): Malishevë

Xhafer Gashi (1 komunë): Obiliq

Lista Serbe (10 komuna): Leposaviq, Novobërdë, Shtërpcë, Zubin Potok, Zveçan, Graçanicë, Ranillug, Partesh, Mitrovicë e Veriut dhe Kllokot

Pasojat në skenën kombëtare

Zgjedhjet lokale u zhvilluan në një kohë të paqartësive politike në nivel qendror, teksa mbetet e hapur çështja nëse Kosova do të ketë një qeveri të re apo do të shkojë në zgjedhje të parakohshme parlamentare.

Kjo do të qartësohet deri më 19 nëntor, kur përfundon afati për mandatarin e LVV-së, Glauk Konjufca, që të formojë dhe paraqesë qeverinë në Kuvend.

Analistët thonë se rezultatet lokale u japin partive një pasqyrë të qartë për përgatitjen e zgjedhjeve eventuale nacionale.

Arifi thekson se vetëm dy komuna – Prishtina dhe Mitrovica e Jugut – kanë peshë reale për matjen e forcës partiake.

“Fitorja në Prishtinë i jep një përparësi të lehtë LDK-së, por nuk është fitore absolute, sepse pjesëmarrja ka qenë e ulët dhe shumë votues nuk i përkasin LDK-së. Por, nuk është matës i mirë vetëm kryetari i komunës dhe balotazhi. Shpeshherë kjo di të mashtrojë”, thotë Arifi.

Në të njëjtën frymë, ai shton se në Mitrovicën e Jugut, ku fitoi Faton Peci i LVV-së ndaj Arian Tahirit të PDK-së, asambleja komunale mbetet e fragmentuar – çka reflekton kompleksitetin e votës lokale.

Sipas Muhaxhirit, rezultatet e zgjedhjeve lokale tregojnë se nuk priten ndryshime të mëdha në skenën politike kombëtare, përveç nëse partitë ndryshojnë qasje.

Nëse partitë vazhdojnë me të njëjtin stil, LVV-ja “do të mbetet në populizëm”, ndërsa të tjerat do të vuajnë nga “mungesa e kreativitetit dhe guximit për të ndryshuar”, thotë ai.

“Nëse kjo gjendje ‘fotokopjohet’ në nivel qendror, nuk do të kemi dallime të mëdha nga sot”, shton Muhaxhiri.

Rënia e pjesëmarrjes – sinjal për partitë

Pjesëmarrja në zgjedhje ishte e ulët: rreth 40 për qind në rundin e parë dhe vetëm 32 për qind në balotazh.

Sipas Arifit, kjo tregon se qytetarët janë zhgënjyer nga ofertat politike, të cilat ende fokusohen në çështje bazike, si kanalizimi e ujësjellësi.

“Unë nuk kam parë kandidat, i cili me të vërtetë ka investuar shumë në një vizion apo program që mund të jetë i zbatueshëm në katër vjetët e ardhshëm. Ne ende flasim për kanalizim e ujë – në vitin 2025”, shprehet Arifi.

Muhaxhiri e sheh rënien e daljes në votime si mungesë motivimi dhe sinjal paralajmërues për partitë para zgjedhjeve të mundshme parlamentare.

“Votuesit kanë kritere reale dhe të sakta. Ata nuk panë ofertë të besueshme… Mesazhi është i qartë: nevojitet politikë racionale dhe më pak polarizuese”, përfundon Muhaxhiri./REL

Agon Sejdiu, piloti shqiptar që i dha krahë ëndrrës së fëmijërisë

Posted on by albinfo.ch

Në një kabinë të vogël mbi re, ku drita prek horizontin, Agon Sejdiu ndjek ëndrrën që e ka ndërtuar me përkushtim që nga fëmijëria. I lindur dhe rritur në Zvicër me rrënjë nga Kosova, Agoni e sheh avionin jo si mjet transporti, por si simbol të mundësive të pafundme. Sot, ai është pjesë e EasyJet Switzerland, duke përfaqësuar një brez të ri profesionistësh shqiptarë që fluturojnë lart, por me këmbët në tokë.

“Kur je mbi re, kupton sa i vogël është njeriu përballë natyrës, por edhe sa shumë mund të arrijë me dije dhe pasion.” -Agon Sejdiu

Albinfo.ch: Agon, si ishte fëmijëria jote dhe kur lindi ëndrra për t’u bërë pilot?
Agon Sejdiu: Kam pasur një fëmijëri të lumtur dhe shumë aktive. Kam qenë i angazhuar në klube, sidomos sportive, dhe prindërit më kanë nxitur gjithmonë të provoj gjëra të reja. Lartësia më ka ndjekur që herët, pushimet e dimrit i kalonim rregullisht në bjeshkët e Zvicrës për skijim dhe snowboard. Arsimi ka pasur gjithmonë një rol të veçantë në familjen tonë. Ëndrra për t’u bërë pilot lindi herët, në çdo udhëtim që bënim, unë e shihja avionin jo thjesht si mjet transporti, por si simbol të mundësive të pafundme.

Albinfo.ch: A ka ndonjë moment apo njeri të veçantë që ndezi tek ty pasionin për aviacionin?
Agon Sejdiu: Pasioni u ndez gjatë udhëtimeve me familje. Unë gjithmonë shikoja me admirim avionët dhe pilotët. Familja më mbështeti shumë  shpesh të shtunave shkonim bashkë në aeroportin e Cyrihut vetëm për të parë avionët. Këto momente ishin vendimtare, sepse aty kuptova se shikimi nga toka nuk më mjaftonte, unë doja të isha në kabinë.

Albinfo.ch: Familja dhe rrethi i ngushtë  si e përjetuan zgjedhjen tënde për një profesion kaq të rrallë?
Agon Sejdiu: Ata nuk u habitën aspak. E kishin parë që nga fëmijëria ime se aviacioni ishte më shumë se një interes kalimtar  ishte një pasion i vërtetë. Për ta, zgjedhja ime ishte një vazhdim logjik i rrugës sime.

Albinfo.ch: Pas diplomimit për Betriebswirtschaft (Ekonomi e ndërmarrjeve), si lindi ideja të hedhësh hapin drejt trajnimit për t’u bërë pilot?
Agon Sejdiu: Studimet në ekonomi më dhanë një bazë të fortë, por zemra ime ishte gjithmonë në aviacion. Ashtu siç e përmenda edhe më herët, ëndrra ime ka qenë gjithmonë fluturimi. Për mua, ishte një hap i natyrshëm drejt realizimit të vetvetes.

Albinfo.ch: Cila ka qenë sfida më e madhe gjatë rrugës për të marrë licencën Frozen ATPL?
Agon Sejdiu: Sfida më e madhe ishte kombinimi i disiplinës teorike me presionin praktik. Duhet përqendrim absolut, orë të panumërta studimi dhe shumë durim. Por çdo sfidë e kaluar më forconte bindjen se ndodhesha në rrugën e duhur.

Albinfo.ch: Sa i vështirë është financimi dhe përgatitja për t’u bërë pilot për një të ri nga Kosova?
Agon Sejdiu: Është një rrugë e shtrenjtë dhe kërkon sakrifica, por unë gjithmonë them: aty ku ka pasion dhe vendosmëri, gjendet edhe rruga. Është e rëndësishme të shohim këtë investim jo si shpenzim, por si derë që hap horizonte të reja.

Albinfo.ch: Çfarë do të thotë për ty të jesh pjesë e easyJet Switzerland – cilat janë emocionet dhe përgjegjësitë që mbart çdo ditë?
Agon Sejdiu: Është një nder dhe një përgjegjësi e madhe. Çdo fluturim nuk është vetëm transport pasagjerësh, por kujdes për jetën dhe besimin që njerëzit vendosin tek ne. Kjo ndjenjë përgjegjësie është motivimi im i përditshëm.

Albinfo.ch: Si i ri me prejardhje të huaj, a ishte integrimi i lehtë profesionalisht dhe personalisht?
Agon Sejdiu: Unë kam lindur në Zvicër, ndaj procesi i integrimit ishte pothuajse i natyrshëm. Për mua, integrimi nuk do të thotë vetëm të jetosh në një vend, por të bëhesh pjesë aktive e shoqërisë së tij: duke marrë pjesë në klube, duke kontribuar në jetën sportive e kulturore, duke respektuar vlerat, por njëkohësisht duke ruajtur rrënjët e tua.

Albinfo.ch: A ke hasur paragjykime apo sfida si i ri me rrënjë shqiptare?
Agon Sejdiu: Paragjykimet ekzistojnë kudo, por përvoja ime më ka treguar se në Zvicër pasioni dhe disiplina peshojnë më shumë se paragjykimet. Unë gjithmonë kam dashur të dëshmoj me punë dhe përkushtim se kush jam. Me kalimin e kohës kuptova se rezultatet dhe sjellja e hapin rrugën.

Albinfo.ch: Së fundi, u mirëprite në Konsullatën e Kosovës në Cyrih, çfarë domethënie pati për ty ky vlerësim?
Agon Sejdiu: Ishte një moment i veçantë. U ndjeva i vlerësuar jo vetëm si individ, por si përfaqësues i një komuniteti që kontribuon jashtë vendlindjes. Përfaqësitë diplomatike janë të rëndësishme sepse lidhin diasporën me vendlindjen dhe nxisin bashkëpunimin kombëtar.

Me shefin e Konsullatës së Republikës së Kosovës, në Cyrih, Z. Vigan Berisha

Albinfo.ch: Si e mban gjallë lidhjen me Kosovën, traditat dhe gjuhën, edhe pse jeta jote zhvillohet kryesisht jashtë?
Agon Sejdiu: Gjuha, kultura dhe traditat janë pjesë e pandashme e identitetit tim. Ato i ruaj çdo ditë  në familje, në shoqëri dhe në mënyrën si përfaqësoj veten. Ky është një thesar që dua t’ua përcjell brezave që vijnë.

Albinfo.ch: A ke menduar të kontribuosh në zhvillimin e aviacionit në Kosovë?
Agon Sejdiu: Po, padyshim. Aviacioni është një fushë ku përvoja ndërkombëtare ka shumë vlerë. Me shumë kënaqësi do të sjellja njohuritë dhe eksperiencën time për zhvillimin e këtij sektori në Kosovë.

Albinfo.ch: Si e sheh fenomenin “brain drain” të të rinjve që kërkojnë mundësi jashtë vendlindjes?
Agon Sejdiu: Të rinjtë që shkojnë jashtë sjellin me vete dije, përvojë dhe rrjete të reja. Nëse këto lidhen më vonë me vendlindjen, krijohet një shkëmbim i dijes që i shërben gjithë shoqërisë.

Albinfo.ch: A e shikon veten si shembull frymëzues për të rinjtë që hezitojnë të ndjekin ëndrrat e tyre?
Agon Sejdiu: Nëse historia ime shërben si shembull, atëherë mesazhi është ky: ëndrrat kërkojnë disiplinë, durim dhe guxim për të përballuar sfida. Me vetëbesim, përkrahje familjare dhe punë të palodhshme, çdo gjë është e mundur.

Albinfo.ch: Cila është ndjenja më e fortë kur je mbi re?
Agon Sejdiu: Kur je mbi re, kupton sa i vogël është njeriu përballë natyrës, por njëkohësisht sa shumë mund të arrijë me dije dhe teknologji. Ky kontrast më frymëzon çdo ditë.

Albinfo.ch: Çfarë ëndërron për të ardhmen – si pilot dhe si Agon, njeriu pas uniformës?
Agon Sejdiu: Si pilot, ëndërroj të përparoj profesionalisht dhe të kontribuoj në standardet e aviacionit europian. Si Agon, ëndërroj të jem gjithmonë një urë mes dy botëve , Zvicrës ku u rrita dhe Kosovës ku kam rrënjët. Sepse në fund, suksesi nuk matet vetëm me karrierë, por me ndikimin që lë tek të tjerët.

Albinfo.ch: Cili është mesazhi yt për të rinjtë shqiptarë që sot ndodhen mes dilemës: të qëndrojnë në vendlindje apo të kërkojnë rrugë jashtë?
Agon Sejdiu: Mos e shihni këtë si një zgjedhje përfundimtare, por si dy rrugë që mund të plotësojnë njëra-tjetrën. E rëndësishme është që, përtej suksesit personal, të mendoni çfarë mund të bëni për shoqërinë ku jetoni dhe për atë nga vini. Ky është kontributi që i jep kuptim të vërtetë arritjeve.

Kur Agon Sejdiu flet për fluturimin, ndien se nuk është fjala për qiellin  por për lirinë. Lirinë për të ndjekur atë që të thërret nga brenda, pavarësisht pengesave, rrënjëve apo rrugëve të gjata që ndonjëherë ndahen mes dy vendeve.
Në çdo fluturim të tij, ai mbart me vete një copë nga Kosova dhe një horizont nga Zvicra  një bashkim i dy botëve që nuk përjashtojnë, por plotësojnë njëra-tjetrën.
Në kabinën e avionit, përballë horizontit që ndryshon çdo sekondë, ai mbetet i njëjti djalë që dikur shikonte qiellin me kureshtje. Vetëm se tani, është vetë ai që e hap atë.  Sepse për Agonin, siç thotë vetë, suksesi nuk është të ngjitesh më lart se të tjerët, por të mos humbësh asnjëherë tokën nga ku je nisur.

Zvicër: Zyra postare nuk do të shesë më bileta në bord

Posted on by erezzaademi

Nga 14 dhjetori, pasagjerët e Graubese AutoPostale nuk do të jenë më në gjendje të blejnë bileta në bord, por vetëm në mënyrë digjitale (për shembull përmes aplikacionit SBB) ose në makinat shitëse në ndalesa.

Për ata që nuk janë ende të njohur me sistemin e ri, do të jetë ende e mundur të blejnë një biletë nga shoferi deri në mars 2026, shkruan RSI, transmeton albinfo.ch.

Sipas kompanisë, “kjo garanton stabilitet më të madh. Shoferët nuk humbasin më kohë duke shitur bileta dhe mund të respektojnë më mirë oraret. Kjo u sjell dobi udhëtarëve që duhet të përdorin lidhjet.” Në Val Bregaglia dhe Davos, stafi tashmë nuk shet më bileta në bord.

Ky ndryshim e bën Kantonin e Graufünden një përjashtim në nivelin zviceran, por jo për shumë kohë: në Ticino, AutoPostale dëshiron të prezantojë një rregullore të ngjashme deri në fund të vitit 2026. Tetë kompani transporti duan të blejnë së bashku makina shitëse biletash dhe për këtë arsye heqin dorë nga shitja e biletave në autobusë.

Hanover: Kapet drogë me vlerë 600,000 €: Arrestohet një kosovar dhe një turk

Posted on by albinfo.ch

Hetuesit doganorë nga Hanoveri kanë kapur afërsisht 60 kilogramë marijuanë me një vlerë tregu prej rreth 600,000 €. Zyrtarët zbuluan drogën në një dërgesë me origjinë nga Spanja dhe destinacion Bremenin në fund të javës së kaluar, njoftoi zyra e hetimit doganor, transmeton albinfo.ch. Lënda narkotike ishte e paketuar në disa kuti, të deklaruara si produkte industriale, sipas dpa-infocom.

Të premten, zyrtarët policorë arrestuan dy të dyshuar për kontrabandë droge në lagjen Woltmershausen të Bremenit.

Burrat e arrestuar janë një 35-vjeçar kosovar dhe një 41-vjeçar shtetas turk. Të dy dyshohet se janë të lidhur me dërgesën e drogës. Njëkohësisht, policët kontrolluan tre apartamente në Bremen dhe sekuestruan “prova të shumta” të cilat, sipas zyrtarëve doganorë, tregojnë se të dy personat po merreshin me tregti me kanabis.

Një njësi speciale doganore u përfshi gjithashtu në operacion.

Sesioni rinor parlamentar zviceran paraqet 11 kërkesa

Posted on by erezzaademi

Pjesëmarrësit në sesionin parlamentar të të rinjve të këtij viti kanë paraqitur 11 kërkesa. Këto përfshijnë një regjistër mbi vrasjet specifike gjinore, trajnim profesional më tërheqës, teste falas për infeksionet seksualisht të transmetueshme dhe prezervativë për të rinjtë deri në 25 vjeç.

Kjo u njoftua nga organizatorët e Sesionit të të Rinjve 2025 të dielën në mbrëmje. Gjatë katër ditëve, 200 të rinj të moshës 14-21 vjeç u mblodhën në Pallatin Federal. Ndër të tjera, ata diskutuan tema specifike në grupe pune dhe më pas miratuan 11 kërkesa.

Në ndryshim nga projektligji i qeverisë, sesioni i të rinjve propozon që kërkesat e kapitalit të bankave për rreziqet e filialeve të huaja të jenë 75%, shkruan swissinfo. Ai gjithashtu bën thirrje për një monitorim më të mirë të të drejtave të punës dhe një studim afatgjatë me bazë të gjerë mbi efektet e rritjes së popullsisë, transmeton albinfo.ch.

Temat e diskutuara këtë vit përfshinin shëndetin seksual, qeverisjen dixhitale, vetëvrasjen e asistuar, lëvizjen e lirë të personave, mundësitë e barabarta, politikën arsimore, neutralitetin dhe qendrën financiare zvicerane.

Kancelari Federal, Viktor Rossi hapi seancën plenare të shtunën me disa fjalë rreth karrierës së tij politike dhe më pas mori pyetje nga të rinjtë. Debati plenar vazhdoi të dielën. Të rinj nga të gjitha rajonet gjuhësore qëndruan në foltoren e Dhomës së Përfaqësuesve dhe folën në mbështetje të shqetësimeve të tyre.

Çmimi Prix Jeunesse, i cili nderon një angazhim të veçantë ndaj të rinjve si pjesë e Sesionit Rinor, iu dha këtë vit mediumit rinor Radio Summernight.

11 kërkesat e dakorduara iu dorëzuan presidentes së Dhomës së Përfaqësuesve dhe ish-pjesëmarrëses së sesionit rinor Maja Riniker në orën e fundit të seancës të dielën.

Një specie lakuriqësh nate u zbulua në Lucernë

Posted on by erezzaademi

Lakuriqi i natës alpin është zbuluar në Lucern për herë të parë. Speciet, të panjohura më parë në kantonin e Lucernit, po përhapen gjithnjë e më shumë drejt veriut dhe tani janë zbuluar si pjesë e një projekti pjesëmarrës.

Në projektin “Stadt Wild Tiere” të Lucernit, 140 vullnetarë regjistruan rreth 25,000 thirrje lakuriqësh në 120 vende midis majit dhe gushtit 2025. Ekspertët analizuan regjistrimet dhe ishin në gjendje të identifikonin dhjetë lloje lakuriqësh nate, përfshirë lakuriqin e natës alpin si një zbulim i ri surprizues, njoftoi qyteti i Lucernit të hënën, shkruan swissinfo, transmeton albinfo.ch.

Sipas deklaratës, lakuriqi i natës alpin deri më tani është gjetur kryesisht në Ticino dhe Valais, por po vëzhgohet gjithnjë e më shumë në rajone më veriore. “Nuk dihej që kishte mbërritur tashmë në Lucern”, thuhej në njoftimin për shtyp.

Javën e kaluar, autoritetet e Bazelit njoftuan se një lakuriq nate alpin ishte shfaqur në qytetin e Bazelit për herë të parë. Kafsha u gjet e plagosur pranë stacionit kryesor të trenit.

Përveç lakuriqit të natës alpin, në qytetin e Lucernës janë identifikuar gjashtë specie me “prioritet kombëtar”, duke përfshirë lakuriqët e natës mushkonja, lakuriqët e natës me veshë të gjatë dhe lakuriqët e natës dyngjyrësh. Zbulimi i specieve të ndjeshme ndaj dritës, siç është lakuriqët e natës më të mëdhenj të ujit, ishte gjithashtu veçanërisht i kënaqshëm. Ky është një tregues i efektit të masave të qytetit kundër ndotjes nga drita, sipas autoritetit.