Archives

Trump e konfirmon në takimin e Bordit të Paqes, kontributi i Kosovës do të jetë me pjesëtarë të FSK-së në Gaza

Posted on by erezzaademi

Presidenti i Shteteve të Bashkuara të Amerikës, Donald Trump, duke diskutuar për ndihmën financiare që po japin shtetet anëtare të Bordit të Paqes për stabilizimin e Gazës, tha se Kosova, Shqipëria e vende të tjera do të ndihmojnë me trupa.

“Shqipëria, Kosova dhe Kazakistani do të mirëprisnin trupa dhe forca policore stabilizimin e Gazës. Egjipti dhe Jordania po ashtu do të ofronin ndihmë shumë, shumë të konsiderueshme, përfshirë trajnimin e trupave dhe mbështetje”, deklaroi ai, transmeton albinfo.ch.

Ndryshe, sot ka filluar takimi inaugurues i Bordit të Paqes, iniciativa e Trumpit për t’i dhënë fund luftës në Gaza, me përfaqësues nga më shumë se 45 vende.

Zvicra shqyrton zbritjet për ilaçet më të shitura për të ulur kostot shëndetësore

Posted on by erezzaademi

Parlamenti zviceran po shqyrton kufizimin e rritjes së vazhdueshme të kostove të kujdesit shëndetësor duke dhënë zbritje për ilaçet më të shitura në vend. Qeveria tani po e paraqet këtë masë në një proces konsultimi.

Vitin e kaluar, parlamenti federal miratoi një paketë masash të hartuara për të ulur kostot e kujdesit shëndetësor, duke përfshirë zbritjet sasiore. Të enjten, qeveria njoftoi se kishte hapur procedurën e konsultimit mbi ndryshimet ligjore për të futur këto masa.

Nga më shumë se 3,000 produkte në një listë kombëtare të ilaçeve të miratuara për mbulim sipas sigurimit bazë shëndetësor, 80-100 ilaçet më të shitura gjenerojnë më shumë se një të tretën e kostove të të gjitha këtyre ilaçeve së bashku. Kjo korrespondon me 3 miliardë CHF (3.87 miliardë dollarë), sipas qeverisë, shkruan swissinfo, transmeton albinfo.ch.

Zbritjet në ilaçet më të shitura duhet të bëjnë të mundur kursimin e 350 milionë CHF në vit, pa ndikuar në furnizimin me ilaçe, thanë autoritetet. Shpërndarja e gjenerikëve dhe biosimilarëve më pak të shtrenjtë është gjithashtu midis masave që po diskutohen.

Seanca paraprake për ish-presidentin, Ilir Meta: Arrestimi im është politik dhe kriminal

Posted on by erezzaademi

Ditën e sotme po zhvillohet seanca maratonë paraprake për ish-presidentin Ilir Meta, Monika Kryemadhi, Ema Çoku, Fatmira Kryemadhi dhe Pirro Xhixho.

TCH ka raportuar se sapo ka përfunduar mbrojtjen avokati i kreut të PL-së, Kujtim Cakrani dhe ka filluar të flasë vetë Meta.

“Arrestimi im është politik dhe kriminal”, mësohet të ketë deklaruar në seancën me dyer të mbyllura Meta, transmeton albinfo.ch.

Tutje, raportohet se Meta ka denoncuar paraburgosjen e tij duke thënë se po diskriminohet.

Afera Epstein: Arrestohet ish-Princi Andrew, reagon Mbreti Charles

Posted on by erezzaademi

Policia britanike ka arrestuar ish-Princin Andrew në raport me lidhjen e tij me ish-financierin amerikan, Jeffrey Epstein. Andrew akuzohet se i ka dërguar dokumente konfidenciale Epsteinit, i cili vdiq në vitin 2019, në rolin e tij të mëparshëm si përfaqësues tregtar.

Pas arrestimit, vëllai i tij, mbreti Charles ka reaguar duke thënë se ligji tani duhet të marrë rrugën e vet, tha mbreti në një deklaratë me shkrim.

“E kam marrë lajmin me shqetësimin më të madh. Ajo që vijon është një procedurë gjithëpërfshirëse, e drejtë dhe e duhur në të cilën kjo çështje shqyrtohet në një mënyrë të përshtatshme dhe nga autoritetet kompetente. Policia ka mbështetjen dhe bashkëpunimin e pakufizuar dhe të pakushtëzuar”, ka deklaruar ai teksa theksoi: “Ndërsa kjo procedurë vazhdon, nuk do të ishte e drejtë që unë të komentoja më tej për këtë çështje”, transmeton albinfo.ch.

Policia e Luginës së Thames tha se do të kryejë kërkime në adresa në Berkshire dhe Norfolk. Një burrë në të 60-at u arrestua me dyshimin për sjellje të keqe në një detyrë publike. Bëhet fjalë për Andrew Mountbatten-Windsor, siç raportohet nga BBC, kanali Sky News dhe agjencia e lajmeve PA, ndër të tjera.

Sipas ekspertëve britanikë, masa policore mund të jetë e vlefshme deri në 96 orë, por kjo do të kërkonte edhe një vendim gjykate.

Në dosjet e Epstein të publikuara së fundmi, media britanike kishte zbuluar email-e që sugjeronin se Andrew po i dërgonte raportet e vizitave zyrtare në Hong Kong, Vietnam dhe Singapor abuzuesit seksual. Hetimi policor nuk do të thotë automatikisht se ai e ka bërë veten të dënueshëm.

Titulli princëror i humbur në tetor të vitit 2025

Ish-princi tashmë ka humbur pozicionin e tij shoqëror dhe privilegjet e tij përmes lidhjes së tij me abuzuesin seksual të ndjerë Jeffrey Epstein. Ai u detyrua të jepte dorëheqjen nga të gjitha detyrat mbretërore në vitin 2019.

Në lidhje me skandalin Epstein në vitin 2022, 66-vjeçari kishte zgjidhur një padi civile nga Virginia Giuffre, e cila e kishte akuzuar atë për abuzim seksual si i mitur. Giuffre kreu vetëvrasje në prill. Andrew gjithmonë e ka mohuar sjelljen e keqe, deri më tani ai ka heshtur për akuzat e reja.

SHBA-ja kërkon riorganizim të madh të NATO-s, përfshirë zvogëlimin e trupave në Kosovë

Posted on by erezzaademi

Shtetet e Bashkuara, nën udhëheqjen e presidentit Donald Trump, po i bëjnë presion NATO-s që të reduktojë ndjeshëm aktivitetet jashtë territorit tradicional, përfshirë përfundimin e një misioni kyç të aleancës në Irak, kanë thënë katër diplomatë të NATO-s për “POLITICO”.

Sipas tyre, SHBA-ja ka lobuar muajt e fundit edhe për zvogëlimin e misionit paqeruajtës të NATO-s në Kosovë (KFOR), si dhe që Ukraina dhe partnerët e Indo-Paqësorit të mos marrin pjesë zyrtarisht në samitin vjetor të aleancës që do të mbahet në korrik në Ankara.

Kjo nismë pasqyron përpjekjen e Shtëpisë së Bardhë për ta trajtuar NATO-n si një pakt strikt euroatlantik të mbrojtjes dhe për të zhbërë dekada zgjerimi drejt menaxhimit të krizave, partneriteteve globale dhe iniciativave të bazuara në vlera – fusha që prej kohësh kanë irrituar presidentin amerikan dhe bazën e tij politike MAGA (Bëjeni Amerikën përsëri të madhe).

Brenda NATO-s, kjo qasje është quajtur “kthim në misionin themelor”, duke nënkuptuar kufizimin e aktiviteteve “jashtë zone” që tejkalojnë detyrat thelbësore të mbrojtjes dhe parandalimit.

Presion për t’u tërhequr nga Iraku

NATO-ja aktualisht mban mision këshillimor në Irak, që synon forcimin e institucioneve të sigurisë dhe parandalimin e rikthimit të Shtetit Islamik. Ky mision u krijua gjatë mandatit të parë të Trumpit në vitin 2018 dhe është zgjeruar disa herë që nga viti 2021, me kërkesë të Bagdadit.

Sipas diplomatëve, Washingtoni ka kërkuar që misioni të përfundojë që në shtator. Paralelisht, SHBA-ja pritet të tërheqë rreth 2,500 ushtarë nga Iraku në kuadër të një marrëveshjeje të vitit 2024 me qeverinë irakiane, si pjesë e angazhimit të Trumpit për t’i dhënë fund “luftërave të pafundme”.

Ekspertë të sigurisë paralajmërojnë se tërheqja e NATO-s dhe SHBA-së mund të fuqizojë grupet e milicive dhe të destabilizojë rajonin, përfshirë Kurdistanin verior.

Megjithatë, brenda aleancës ka kundërshtime. Sipas diplomatëve, shumica e vendeve anëtare janë të hapura për zvogëlim gradual të misionit, por jo për përfundim të shpejtë.

Diskutime të hershme për zvogëlimin e KFOR-it në Kosovë

Më shqetësuese për aleatët evropianë është sinjalizimi i SHBA-së për të reduktuar praninë e NATO-s në Kosovë. Misioni paqeruajtës KFOR, i autorizuar nga OKB-ja dhe i vendosur në vitin 1999 pas luftërave në ish-Jugosllavi, aktualisht numëron rreth 4,500 trupa.

Engjëllushe Morina, bashkëpunëtore e lartë e politikave në Këshillin Evropian për Marrëdhëniet me Jashtë, ka thënë se misioni mbetet “i domosdoshëm” për sigurinë rajonale.

“Nëse NATO-ja tërhiqet, kjo mund t’i inkurajojë separatistët serbë në veri të Kosovës dhe të ketë efekt zinxhir në rajon, përfshirë Republikën Sërpska në Bosnje e Hercegovinë”, ka thënë ajo.

Një diplomat i lartë i NATO-s ka thënë se ekziston shqetësim serioz, pasi “gjërat në Ballkanin Perëndimor mund të përshkallëzohen shpejt”.

Megjithatë, zyrtarë të NATO-s theksojnë se nuk ka asnjë afat kohor për përfundimin e misionit në Irak apo për KFOR-in dhe se çdo vendim kërkon miratimin e të 32 vendeve anëtare.

Presion për përjashtimin e Ukrainës dhe partnerëve të Indo-Paqësorit

SHBA-ja po ushtron gjithashtu presion që Ukraina dhe katër partnerët zyrtarë të NATO-s në Indo-Paqësor – Australia, Zelanda e Re, Japonia dhe Koreja e Jugut – të mos ftohen në takimet formale të samitit të korrikut në Ankara. Sipas diplomatëve, kjo argumentohet si përpjekje për të reduktuar numrin e takimeve dhe për ta fokusuar samitin në çështjet “thelbësore” të NATO-s.

Një vendim i tillë do të sinjalizonte një përqendrim më të madh në çështjet bazë të aleancës, duke lënë në plan të dytë partneritetet globale.

Po ashtu, NATO-ja ka vendosur të mos organizojë Forumin Publik këtë vit – një aktivitet paralel që zakonisht rrit dukshmërinë e samitit dhe përfshin liderë, ekspertë të mbrojtjes dhe zyrtarë qeveritarë. Zyrtarisht, kjo lidhet me kursime buxhetore, por disa diplomatë besojnë se pas vendimit qëndron indirekt presioni amerikan për të reduktuar financimin e organizatave ndërkombëtare.

Sipas kritikëve, në një kohë kur NATO-ja përpiqet të bindë opinionin publik për rëndësinë e aktiviteteve të saj dhe rritjes së shpenzimeve të mbrojtjes, kufizimi i komunikimit publik mund të jetë i dëmshëm.

Të rrëfehesh në gjuhën e shpirtit, pse terapia në gjuhën amtare shëron më thellë

Posted on by albinfo.ch

Migrimi shpesh konceptualizohet si një proces integrimi ekonomik dhe social. Megjithatë, në planin psikologjik ai përfaqëson një përvojë thellësisht komplekse, e cila ndikon drejtpërdrejt në identitetin personal, ndjenjën e përkatësisë dhe mirëqenien mendore.

Në praktikën e saj klinike në Cyrih të Zvicrës, Dr. Valbone Miftari vëren se për një pjesë të konsiderueshme të individëve, migrimi shoqërohet me trauma të pashprehura. Këto përvoja të pa trajtuara emocionalisht manifestohen shpesh përmes simptomave psikosomatike, çrregullimeve të ankthit dhe episodeve depresive, duke reflektuar barrën psikike që mbart procesi i zhvendosjes dhe adaptimit në një realitet të ri.

“Trauma e migrimit nuk përfundon me ndryshimin e vendit të jetesës. Ajo bartet me individin në kujtesë, në trup dhe në mënyrën se si përjetohet realiteti i përditshëm,” thekson Dr. Miftari.

Një nga dukuritë më të shpeshta në praktikën klinike është somatizimi i vuajtjes emocionale, pra shndërrimi i përjetimeve psikike në shenja trupore. Në kushtet e migrimit, përvojat e stresit kronik, humbjes së mbështetjes sociale dhe presionit për funksionim të vazhdueshëm nuk arrijnë të strukturohen në nivel simbolik dhe shfaqen përmes dhimbjeve fizike.

Shprehja e vuajtjes shpirtërore, me trup

“Shumë bashkatdhetarë nuk e shprehin vuajtjen me fjalë, por me trup. Dhimbjet fizike janë shpesh forma përmes së cilës psikika kërkon të dëgjohet,” shprehet ajo.

Spektri klinik i ankesave përfshin çrregullime psikosomatike, dhimbje trupi pa bazë organike të përcaktueshme, tension të vazhdueshëm muskulor, çrregullime të gjumit dhe lodhje kronike. Krahas tyre paraqiten forma të depresionit të maskuar pas funksionimit normal dhe përkushtimit ndaj punës, si dhe çrregullime ankthi të shoqëruara me gjendje të vazhdueshme shqetësimi të brendshëm. Në praktikën klinike hasen gjithashtu raste të lidhura me diskriminim dhe bullizim në vendin e punës, rraskapitje psikofizike “Burnout”, konflikte mes gjeneratave  abuzim emocional afatgjatë, divorce, probleme të varësisë, si dhe çrregullime më të rënda psikiatrike, përfshirë çrregullime deluzive dhe psikoza. Kjo e bën traumën e migrimit një përvojë shumëdimensionale.

Vendimi për t’iu drejtuar terapisë nuk lidhet domosdoshmërisht me krizën akute. Në shumë raste ai paraqet shprehje të vetëdijes dhe të përgjegjësisë ndaj shëndetit mendor. Megjithatë, procesi terapeutik kërkon gatishmëri për reflektim dhe përballje me vetveten, çka ende përbën pengesë kulturore për një pjesë të komunitetit.

Gjuha ka vend të veçantë në psikoterapi

Në procesin terapeutik, gjuha ka rëndësi të veçantë. Dr. Miftari thekson se përdorimi i gjuhës amtare krijon kushte të favorshme për shprehjen e përvojës emocionale. “Shumë pacientë arrijnë të shpjegojnë simptomat në një gjuhë tjetër, por vetëm në gjuhën amtare arrijnë të prekin thelbin e dhimbjes. Aty dalin fjalë që nuk kanë përkthim, emocione që nuk gjejnë ekuivalent dhe histori që kanë nevojë të tregohen pikërisht ashtu si janë jetuar” vazhdon ajo më tutje. “Në gjuhën amtare pacienti arrin të strukturojë përvojën emocionale dhe të përpunojë kujtesën personale. Kjo krijon kushte më të qëndrueshme për procesin terapeutik,” vëren ajo.

Trauma e migrimit dhe gratë

Një kapitull i veçantë i traumës së migrimit lidhet me përvojën e grave shqiptare në mërgatë. Terapia për to përfaqëson shpesh hapësirën e parë ku mund të artikulojnë përjetimet personale dhe barrën emocionale pa presionin e roleve tradicionale familjare dhe shoqërore. “Për shumë gra, terapia është hera e parë që flasin për veten jashtë roleve të imponuara. Ky është një hap drejt ndërtimit të një identiteti më të vetëdijshëm dhe më autonom,” thekson Dr. Miftari.

Procesi terapeutik ndihmon në vendosjen e kufijve psikologjikë dhe në ndërtimin e marrëdhënieve më të balancuara me veten dhe me të tjerët. Ky zhvillim ka ndikim të drejtpërdrejtë në stabilitetin emocional të familjes dhe në funksionimin më të shëndetshëm të marrëdhënieve shoqërore.

Një dimension tjetër i rëndësishëm i traumës së migrimit shfaqet te burrat shqiptarë në mërgatë. Modelet tradicionale të maskulinitetit, të bazuara në përmbajtje emocionale dhe përgjegjësi për familjen, krijojnë pengesa për kërkimin e ndihmës profesionale.

Mërgimi dhe kriza e identitetit

“Tek burrat, depresioni shpesh shfaqet përmes irritimit dhe izolimit. Kërkimi i ndihmës ndodh zakonisht kur simptomat janë bërë të pamohueshme,” shprehet ajo.

Migrimi shoqërohet me humbje të statusit social dhe me rënie të vetëvlerësimit. Nga figurë autoriteti në kontekstin e origjinës, individi shndërrohet në punëtor anonim në shoqërinë pritëse. Kjo krizë të identitetit vështirë se artikulohet me fjalë.

Një nga temat qendrore të përvojës së migracionit është jetesa mes dy realiteteve. Individët jetojnë fizikisht në shoqërinë pritëse, por emocionalisht mbeten të lidhur me vendin e origjinës. Kjo gjendje prodhon ndjenjë të mungesës së përkatësisë dhe tension të vazhdueshëm psikologjik.

“Të jetosh mes dy realiteteve do të thotë të mos kesh ndjenjën e përkatësisë në asnjërën anë. Kjo krijon një lodhje identitare që shoqëron individin për vite me radhë,” thekson Dr. Miftari.

Në diskursin publik, migrimi shpesh interpretohet si histori suksesi dhe stabiliteti ekonomik. Por pas këtij imazhi të rregullt fshihet një rrugë e gjatë sakrificash dhe përvojash traumatike, të cilat gradualisht marrin formën e pagjumësisë, ankthit dhe depresionit. “Trauma nuk përfundon me kalimin e kufijve; ajo vazhdon të jetojë përmes ndjenjës së mos-përkatësisë dhe përjashtimit social, duke prekur jo vetëm gjeneratën e parë, por edhe brezat që pasojnë,” nënvizon Dr. Miftari.

Kujdesi për veten sot është dhuratë për brezat që vijnë nesër

Ajo shpjegon se trauma mes gjeneratash është një realitet i dokumentuar shkencërisht: dhe se ajo transmetohet përmes marrëdhënies prind- fëmijë, modeleve emocionale dhe mekanizmave biologjikë të stresit, përfshirë ndryshimet neuroendokrine dhe epigjenetike që rrisin ndjeshmërinë ndaj ankthit dhe depresionit. Kështu, shumë të rinj mbartin një dhimbje pa emër, gjegjësisht një trashëgimi të historive të papërpunuara të familjes. Terapia ndihmon në identifikimin e mekanizmave të transmetimit ndër gjeneratash të traumës dhe në ndërprerjen e këtij cikli, duke pasur vlerë parandaluese për stabilitetin emocional të familjes.

Sipas Dr. Miftari, konflikti mes gjeneratave lind nga përplasja mes kulturës së sakrificës së prindërve dhe nevojës së fëmijëve për autonomi personale. “Prindërit shpesh veprojnë nga një sistem mbijetese i formuar nga trauma, frika dhe kontrolli, ndërsa fëmijët kërkojnë identitet dhe vetë përcaktim në një realitet tjetër social. Mes” mos harro nga vjen” dhe “dua të jem vetja” krijohet një tension i brendshëm që shfaqet si ankth, krizë identiteti apo distancë emocionale, ndërsa terapia u mëson prindërve se t’i lejosh fëmijët të ecin rrugën e tyre nuk do të thotë t’i humbasësh, por t’u besosh dhe se dashuria nuk matet me kontroll, por me mbështetje.”

Në përmbyllje, Dr. Miftari rikujton se shëndeti mendor është themeli i mirëqenies njerëzore dhe shoqërore dhe nuk përbën një çështje individuale . “Kur shërohet individi, shërohet familja dhe kur forcohet familja, forcohet komuniteti,” thekson ajo. Edhe pse kombi ynë ka një reziliencë të jashtëzakonshme, rezilienca e vërtetë, sipas saj, nuk qëndron vetëm në durim dhe mbijetesë, por në guximin për të kërkuar ndihmë profesionale.  Kujdesi për veten sot është dhuratë për brezat që vijnë nesër”.

Profili i Dr. Med. Valbone Miftarit

Dr. med. Valbone Miftari është mjeke specialiste FMH për Psikiatri dhe Psikoterapi dhe ushtron veprimtarinë e saj profesionale në Cyrih, ku drejton ordinancën VM Praxis | Psychiatrie und Psychotherapie. Ajo ka përvojë të gjerë klinike në trajtimin e një spektri të gjerë çrregullimesh të shëndetit mendor, ndërsa puna e saj me pacientë nga mërgata shqiptare ndërthur qasjen bashkëkohore shkencore me ndjeshmëri të theksuar kulturore. Krahas praktikës klinike, Dr. Miftari është nënkryetare e Lidhjes së Mjekëve Shqiptarë në Zvicër dhe kontribuon aktivisht në promovimin e shëndetit mendor përmes shkrimeve dhe përkthimeve të librave, si dhe në forcimin e bashkëpunimit profesional brenda komunitetit.

email: [email protected]
Web: www.vmpraxis-zürich.ch

 

 

Shtetësi pas vdekjes: Kantoni Thurgau i jep nënshtetësi një personi të ndjerë

Posted on by Drin Reçica

Një rast i pazakontë është regjistruar në Thurgau, ku parlamenti kantonal ka miratuar dhënien e shtetësisë zvicerane për një person që kishte ndërruar jetë para përfundimit të procedurës së natyralizimit, përcjell albinfo.ch.

Gjatë seancës së së mërkurës, parlamenti i Thurgaut miratoi në mënyrë kolektive natyralizimin e 140 aplikantëve, mes të cilëve rezultoi të ishte edhe një kandidat që nuk ishte më gjallë. Sipas autoriteteve, bëhet fjalë për një burrë 77-vjeçar, identiteti dhe shtetësia e mëparshme e të cilit nuk janë bërë publike, i cili kishte ndërruar jetë më 9 janar.

Rasti ka ngritur pikëpyetje mbi mënyrën se si ka ndodhur ky gabim administrativ. Sipas raportimeve mediatike, mbetet e paqartë pse kandidati i ndjerë nuk u hoq nga lista e natyralizimit, pavarësisht se vdekja e tij ishte raportuar zyrtarisht pranë institucioneve përkatëse.

Autoritetet kantonale nuk kanë dhënë ende një shpjegim të detajuar për këtë lapsus procedural, ndërsa pritet që çështja të shqyrtohet nga strukturat administrative për të kuptuar dështimin në koordinim dhe për të shmangur raste të ngjashme në të ardhmen.

Ngjarja ka tërhequr vëmendje të gjerë publike dhe mediatike në Zvicra, duke nxitur debat mbi transparencën dhe saktësinë e procedurave të natyralizimit në nivel kantonal.

“Sunny Hill” publikon datat për vitin 2026

Posted on by Drin Reçica

Përmes një njoftimi në llogarinë zyrtare në Instagram, organizatorët kanë bërë të ditur se festivali do të mbahet më 31 korrik, 1 dhe 2 gusht, duke ftuar publikun me mesazhin: “Zyrtarizohet. Festivali Sunny Hill më 31 korrik, 1 dhe 2 gusht. Shihemi në ‘kodër’”, përcjell albinfo.ch.

Prej vitesh, Sunny Hill ka arritur të sjellë në Kosovë artistë të njohur ndërkombëtarë, duke e shndërruar Prishtinën në një pikëtakim të mijëra vizitorëve nga vende të ndryshme të botës. Për tri net me radhë, festivali krijon një atmosferë unike që ndërthur muzikën, energjinë rinore dhe promovimin kulturor të vendit.

Gjatë ditëve të organizimit, Kosova merr vëmendje të gjerë mediatike ndërkombëtare. Edicioni i kaluar u pasqyrua nga media prestigjioze si BBC, The Guardian dhe Daily Mail, të cilat, përveç raportimeve mbi festivalin, i kushtuan vëmendje edhe faktit që Dua Lipa mori nënshtetësinë e Kosovës.

Edicioni i vitit 2026 pritet të vazhdojë traditën e suksesit, duke e konsoliduar Sunny Hill si një nga ngjarjet më të rëndësishme muzikore në rajon./Albinfo.ch

Shërbimi i dërgesave Smood do të mbyllet, mbi 400 vende pune humbasin në Zvicër

Posted on by Drin Reçica

Zvicra do të përballet me humbjen e mbi 400 vendeve të punës pas vendimit për mbylljen e shërbimit të dërgesave Smood, i cili operohet nga Migros Geneva, përcjell albinfo.ch.

Kompania njoftoi të mërkurën se Smood do të ndërpresë plotësisht aktivitetin e saj më 30 prill 2026, duke prekur drejtpërdrejt më shumë se 400 punonjës në 25 qytete zvicerane.

Sipas deklaratës zyrtare, vendimi për mbylljen e shërbimit është marrë për shkak të kushteve të vështira të tregut dhe rezultateve financiare zhgënjyese. Smood theksoi se operon “në një treg veçanërisht konkurrues”, ndërsa performanca financiare e muajve të fundit ka qenë nën pritshmëri, pa ndonjë perspektivë reale për rikthim në profitabilitet.

Mbyllja e këtij shërbimi reflekton sfidat me të cilat po përballet sektori i dërgesave të ushqimit dhe produkteve ushqimore në Zvicër, ku rritja e kostove operative, konkurrenca e fortë dhe ndryshimet në sjelljen e konsumatorëve kanë ndikuar ndjeshëm në qëndrueshmërinë financiare të operatorëve.

Autoritetet dhe sindikatat pritet të ndjekin nga afër procesin e largimit nga puna, ndërsa Migros Geneva ka bërë të ditur se do të shqyrtojë mundësi mbështetjeje për punonjësit e prekur, në përputhje me legjislacionin zviceran të punës.

Shkolla Shqipe në Ostermundigen shënon me aktivitete festive Ditën e Pavarësisë së Kosovës

Posted on by Drin Reçica

Në një atmosferë festive dhe plot emocion, në Shkollën Shqipe Ostermundigen Bern u shënua  Pavarësia e Kosovës, në praninë e nxënësve, prindërve dhe mësimdhënësve, shkruan  albinfo.ch.

Programi i organizuar për këtë ditë përfshiu recitime, këngë dhe aktivitete kulturore të përgatitura nga nxënësit, të cilët përmes performancave të tyre sollën mesazhe krenarie dhe dashurie për atdheun.

Organizatorët theksuan rëndësinë e ruajtjes së gjuhës shqipe dhe identitetit kombëtar në diasporë, duke e cilësuar shkollën si një vatër të rëndësishme të edukimit dhe trashëgimisë kulturore.

Edhe pse të lindur dhe rritur në Zvicër, nxënësit e kësaj shkolle vijojnë të mësojnë gjuhën amtare dhe të njihen me historinë e kulturën shqiptare, duke forcuar lidhjen me rrënjët e tyre.

Kremtimi i kësaj date simbolike shërbeu jo vetëm si moment reflektimi për sakrificat dhe rrugëtimin drejt lirisë, por edhe si dëshmi e përkushtimit të komunitetit shqiptar në Zvicër për të ruajtur identitetin kombëtar brez pas brezi./Albinfo.ch.

Lituania hap Konsullatën në Kosovë, thellohet partneriteti dypalësh

Posted on by Drin Reçica

Lituania ka hapur zyrtarisht Konsullatën e saj në Kosovë, një zhvillim që konsiderohet si kapitull i ri në forcimin e marrëdhënieve ndërmjet dy vendeve, përcjell albinfo.ch. 

Në ceremoninë përuruese, ambasadori jorezident i Lituanisë për Kosovën, Eduardas Borisovas, theksoi se hapja e konsullatës përfaqëson një hap konkret drejt intensifikimit të bashkëpunimit institucional, ekonomik dhe kulturor. Ai rikonfirmoi mbështetjen e vazhdueshme të Lituanisë për integrimin evropian të Kosovës dhe për konsolidimin e shtetësisë së saj në arenën ndërkombëtare.

Të pranishmëve iu drejtua edhe nënkryetari i Kuvendi i Kosovës, Ardian Gola, i cili e cilësoi hapjen e konsullatës si dëshmi të besimit të ndërsjellë dhe partneritetit strategjik mes dy shteteve. Ai theksoi se thellimi i marrëdhënieve parlamentare dhe shkëmbimi i përvojave në reformat demokratike mbeten prioritete të përbashkëta.

Ndërkaq, ministri i Punëve të Brendshme, Xhelal Sveçla, vlerësoi rëndësinë e bashkëpunimit në fushën e sigurisë dhe sundimit të ligjit. Sipas tij, prania konsullore do të lehtësojë komunikimin institucional dhe do të forcojë koordinimin në çështje me interes të përbashkët.

Konsulli i nderit, Bashkim Zeqiri, u shpreh i nderuar për besimin e dhënë dhe premtoi angazhim për promovimin e interesave të ndërsjella, duke kontribuar në zgjerimin e bashkëpunimit në ekonomi, arsim, kulturë dhe investime.

Hapja e kësaj konsullate përfaqëson një prani më të fuqishme diplomatike të Lituanisë në Kosovë dhe një sinjal të qartë për përkushtimin e dy vendeve drejt një partneriteti afatgjatë, të bazuar në respekt, solidaritet dhe vizion të përbashkët evropian./Albinfo.ch 

 

Kosova feston 18-vjetorin e Pavarësisë në Hamburg

Posted on by Drin Reçica

Republika e Kosovës shënoi me dinjitet dhe emocione të veçanta 18-vjetorin e shpalljes së pavarësisë në qytetin e Hamburg, në një mbrëmje solemne të organizuar nga Konsullata e Republikës së Kosovës në Hamburg, transmeton albinfo.ch.

Në këtë ngjarje festive morën pjesë përfaqësues të strukturave politike, kulturore dhe shoqërore gjermane, anëtarë të trupit diplomatik, bashkatdhetarë si dhe mysafirë gjermanë. Aktiviteti vuri në pah partneritetin e qëndrueshëm dhe respektin e ndërsjellë ndërmjet Kosova dhe Gjermania, duke theksuar mbështetjen e vazhdueshme të Berlinit zyrtar ndaj shtetndërtimit dhe zhvillimit demokratik të Kosovës.

Mbrëmja u karakterizua nga një program i pasur artistik, ku kultura shqiptare u shndërrua në një urë komunikimi dhe diplomacie. Me interpretimet e tyre brilante, mezzo-sopranoja Flaka Goranci dhe pianistja Elda Laro sollën emocione të veçanta për të pranishmit. Ndërkaq, artistët e Baleti Kombëtar i Kosovës**, Luljeta Ademi dhe Fisnik Smani, dhanë një paraqitje elegante që pasqyroi nivelin profesional të artit skenik kosovar.

Konsulli i Republikës së Kosovës në Hamburg, Mizbah Mustafa, së bashku me stafin e Konsullatës, u vlerësuan për organizimin dinjitoz dhe përkushtimin në realizimin e kësaj mbrëmjeje përkujtimore.

Në mesazhin e saj me rastin e 18-vjetorit, Donika Gërvalla theksoi se sot Kosova përfaqëson më shumë se një histori suksesi të shtetndërtimit — ajo është një aleat i besueshëm në arenën ndërkombëtare dhe një shtet që po ecën me vendosmëri drejt së ardhmes euroatlantike. “Gëzuar ditëlindjen e 18-të, Kosovë – shteti i lirë, i pavarur dhe demokratik, por njëkohësisht shteti më i ri në Evropë”, u shpreh ajo.

Kjo mbrëmje festive në Hamburg dëshmoi edhe një herë lidhjen e fortë të diasporës me atdheun, si dhe rolin e kulturës si një instrument i fuqishëm në forcimin e marrëdhënieve ndërkombëtare.

 

Zvicra do të presë samitin botëror të vitit 2027 mbi inteligjencën artificiale

Posted on by Drin Reçica

Zvicra do të organizojë Samitin e ardhshëm Botëror për Inteligjencën Artificiale në Gjeneva në vitin 2027. Lajmi u bë i ditur të enjten në Nju Delhi, gjatë Samitit të IA 2026, nga presidenti zviceran Guy Parmelin, në prani të kryeministrit të Indisë, Narendra Modi, përcjell albinfo.ch.

“Kam kënaqësinë të njoftoj se Zvicra është e gatshme të presë samitin e ardhshëm në Gjenevë”, deklaroi Presidenti i Konfederatës Zvicerane. Parmelin foli gjatë një sesioni pune ku morën pjesë krerë shtetesh dhe ministra. Përveç Modit, i pranishëm ishte edhe presidenti i Brazilit, Lula.

“Gjeneva është epiqendra e multilateralizmit”, tha Parmelin, duke shtuar se Zvicra mezi pret të organizojë samitin dhe të bashkëpunojë me Emiratet e Bashkuara Arabe, të cilat do të jenë nikoqire të samitit në vitin 2028.

Përgatitjet janë përmbyllur

Këshilli Federal, organi ekzekutiv i Zvicrës, kishte shprehur interesimin për organizimin e edicionit 2027 edhe para samitit në Indi. Muajin e kaluar, ai njoftoi se financimi ishte siguruar dhe se përgatitjet për organizimin e samitit në Zvicër kishin përfunduar.

Që nga viti 2023, janë mbajtur një sërë samitesh të nivelit të lartë mbi inteligjencën artificiale në vende të ndryshme. Samiti i parë global për IA u mbajt në Mbretëria e Bashkuar, ndërsa më pas u organizuan takime të ngjashme në Koreja e Jugut dhe Franca. Këto samite synojnë të nxisin shkëmbimin e ideve mbi mundësitë dhe rreziqet që inteligjenca artificiale paraqet për shoqërinë, si dhe për fusha kyçe si mjekësia, klima dhe bujqësia.

Fatlume Bunjaku, zëri i ri i kinematografisë kosovare në skenën evropiane

Posted on by Drin Reçica

Aktorja kosovare Fatlume Bunjaku po shënon një nga sukseset më të rëndësishme në karrierën e saj artistike, duke u përzgjedhur si European Shooting Star 2026, një nga dhjetë aktoret dhe aktorët më premtues të Evropës. Ky vlerësim prestigjioz e vendos atë në qendër të vëmendjes së industrisë evropiane të filmit dhe medias ndërkombëtare, transmeton albinfo.ch.

Në kuadër të programit European Shooting Stars, Fatlume Bunjaku do të prezantohet para profesionistëve të filmit, producentëve, regjisorëve dhe kritikëve nga e gjithë bota gjatë edicionit 2026 të Berlinale – Berlin International Film Festival, një nga festivalet më të rëndësishme të filmit në nivel global.

Ajo është vlerësuar veçanërisht për interpretimin e saj të fuqishëm në filmin Hana, me regji të Ujkan Hysaj. Në këtë film, Bunjaku portretizon një aktore që përballet me traumat e luftës përmes terapive artistike, duke sjellë një performancë të thellë emocionalisht dhe të ndërtuar me ndjeshmëri të lartë psikologjike. Kritika ka veçuar praninë e saj të fuqishme në ekran, autenticitetin dhe aftësinë për të trajtuar role komplekse me maturi artistike.

Përzgjedhja e Fatlume Bunjakut si European Shooting Star 2026 përfaqëson një moment kyç jo vetëm për karrierën e saj personale, por edhe për afirmimin e kinematografisë kosovare dhe shqiptare në skenën evropiane. Ky sukses dëshmon rritjen e cilësisë artistike dhe potencialin konkurrues të aktorëve shqiptarë në tregun ndërkombëtar të filmit, transmeton tutje albinfo.ch.

Me talentin, përkushtimin dhe qasjen e saj serioze ndaj artit të aktrimit, Fatlume Bunjaku po konsolidohet si një emër premtues i gjeneratës së re të aktores evropiane, duke hapur rrugë të reja për bashkëpunime ndërkombëtare dhe projekte me ndikim të gjerë kulturor.

Përveç angazhimeve të saj artistike ndërkombëtare, Fatlume Bunjaku ishte e pranishme edhe në shënimin e Festës së Pavarësisë së Kosovës, ku mori pjesë në aktivitetin zyrtar të organizuar me këtë rast, së bashku me Afrim Ajeti. Pjesëmarrja e saj në këtë ngjarje simbolike përfaqëson lidhjen e fortë që ajo ruan me vendin e saj dhe rolin e saj si përfaqësuese e denjë e kulturës dhe artit kosovar në arenën ndërkombëtare. /Albinfo.ch

Mund të jetë një imazh i teksti që thotë "°efp europ shooting S"

Mund të jetë një imazh i teksti që thotë "Berlinale Palast MROTS"

Mund të jetë një imazh i teksti që thotë "european shooting stars 2026 fatlume fatlumebunjaku bunjaku"

Përshkrimi i fotografisë nuk është i disponueshëm.

Rrahmani mungon dy muaj, nuk luan as për Kosovën

Posted on by Drin Reçica

Napoli ka njoftuar se Amir Rrahmani po përballet me një lëndim të ri, përcjell albinfo.ch.

Mbrojtësi kosovar, i cili u zëvendësua gjatë ndeshjes kundër Romës, ka pësuar një këputje të rëndë të bicepsit femoris në kofshën e majtë, siç shpjegohet nga klubi italian.

Rrahmani, lëndimi i tij i katërt muskulor i sezonit, tashmë ka filluar rehabilitimin dhe pritet të jetë jashtë për dy muaj, sipas vlerësimeve fillestare, andaj gjasat që të jetë pjesë e Kosovës për ndeshjet e Marsit, janë shumë të vogla.

Festa Kombëtare e Kosovës u festua në Linz, në Shtëpinë e Kulturës “Neue Heimat”

Posted on by Drin Reçica

Para një publiku solid në sallën e madhe tê Shtëpisë së Kulturës u festua festa 17 Shkurtit. Programi festiv u organzua nga mësuesi Izri Rexha, kurse në organizim morën pjesë koreografja z. Suzana Murati, mësueset z. Albiana Syla, z. Valbona Krasniqi dhe Moderatorja z. Lisa Gashi. Në program morën më shumë se tridhjet nxënës të cilët e emocionuan publikun më recitimet e tyre e veçmas me pesë valle mbresëlënse artistike dhe pesë këngë të kënduar plot melodi, që gjatë interpretimit publiku pa rreshtur duartrokiti, shkruan albinfo.at.

Eventin e bëri edhe më interesant prania e zyrtarëve të Ministrisë së Arsimit nga Kosova zonja Besarta Balaj dhe zotëri Fetah Kosum. Ata e përshëndetën publikut me fjalët e bukura nga Kosova duke potencuar rëndësinë e ruajtjes së gjuhës dhe të kulturës shqiptare në Diasporë. Të pranishëm në sallë ishin Shoqata Dardania dhe Bashkimi, ku treguan se uniteti në festime të tilla është i domosdoshëm.

Pas fjalës përshëndetëse të profesorit Rexha, publiku për pak kohë pa një filmë nga gazetari gjerman Peter Sholl i emërtuar Nato në Ballkan ku përshkruhet eksodi i shqiptarëve dhe intervenimi i Natos.

Ajo që ishte më e rëndësishëm në këtë manifestim qenë emocionet e ndezura të nxënësve dhe të prindërva nga pikat e interpretuara artisikisht në këtë program , qe te ne thotë një fjalë popullore ,, Mos raft me u harrue’‘. Shpresoj që në të ardhmen komuniteti shqiptar jo vetëm në Linz por edhe në të gjitha qytetet e republikave tjera të Austrisë të mbajnë evente të tilla, ashtu do të frymon më gjallë kultura shqiptare në diasporë.

Autor Izri Rexha

Nëna e argjentinases që u vra nga shqiptari: Clara e mori drejtësinë, faleminderit Kosovë

Posted on by Drin Reçica

Magdalena Urdangaray, nëna e Maria Clara Urdangaray, ka thënë se vajza e saj e mori drejtësinë dhe për këtë falënderoi institucionet e drejtësisë së Kosovës, përcjell albinfo.ch.

Gjykata Themelore në Prishtinë e dënoi me 18 vjet burgim E.N për vrasjen e të dashurës argjentinase më 1 gusht 2023 në një hotel në Fushë-Kosovë.

Pas shpalljes së aktgjykimit të enjten, Magdalena u shpreh se gjithmonë kanë besuar në drejtësinë e Kosovës.

“Përkundër të gjitha vështirësive, ka qenë e vështirë nga fillimi për ta rikthyer… por ne gjithmonë kemi besuar në drejtësinë e Kosovës. E vlerësojmë shumë punën e prokurorit që gjithmonë është përpjekur ta zbulojë të vërtetën. Dhe sot e ka dëshmuar me të gjithë provat. Klara e ka marrë drejtësinë. Faleminderit Kosovë, faleminderit gjithë shoqërisë që na mbështetën”, ka thënë ajo në lot dhe duke mbajtur flamurin e Kosovës në duar.

Magdalena deklaroi se asgjë nuk mund t’i ngushëllojë për vdekjen e vajzës.

“Ajo vazhdon të jetë e vdekur, asgjë nuk mund të na ngushëllojë dhe ai vazhdon të jetojë. Vajza jonë mbeti e vdekur në formë më brutale”, përfundoi nëna e Claras.

Dënohet me 18 vjet burgim shqiptari për vrasjen e të dashurës argjentinase

Posted on by Drin Reçica

Gjykata Themelore në Prishtinë, ka shpallur aktgjykim dënues prej 18 vitesh ndaj të akuzuarit E.N, i cili akuzohet për vrasjen e shtetases argjentinase në Fushë Kosovë, përcjell albinfo.ch.

Aktgjykimi u shpall të enjten nga kryetari i trupit gjykues, gjykatësi Gazmend Bahtiri.

“I akuzuari është fajtor për veprën penale vrasje e rëndë, gjykata në bazë të dispozitave të akuzuarin e gjykon me burgim me kohëzgjatje prej 18 viteve”, tha ai.

Sipas aktakuzës së datës 11.02.2025, i pandehuri E.N po akuzohet se më 01.08.2023 në Fushë-Kosovë, në hotel “Sonoma”, pas një mosmarrëveshjeje paraprake me të dashurën e tij, tani të ndjerën M.K.U., paraprakisht e godet në vazhdimësi dhe tenton ta shkelë me veturë te parkingu jashtë hotelit, dhe pasi që hynë në hotelin, dhomën ku ishin duke qëndruar, i pandehuri E.N me dashje që ta privojë nga jeta tani të ndjerën ka vazhduar përleshjen dhe goditjet ndaj të dëmtuarës, duke e dërguar në qoshe të dhomës nga ku nuk ka pasur mundësi të largohet e dëmtuara dhe nga goditjet dhe shtyrjet që i ka bërë tani të ndjerës i pandehuri E.N e ka nxjerrë kornizën e dritares duke e hedhur nga dritarja e dhomës së hotelit nga kati i gjashtë, me ç’rast tani e ndjera M.K.U. ka pësuar lëndime të rënda trupore dhe përkundër trajtimit mjekësor e njëjta ka ndërruar jetë në QKUK.

Andaj për shkak veprimeve të lartpërmendura E.N  nga Prokuroria po akuzohet se ka kryer veprën penale, vrasje e rëndë.

Trumpi mbledh sot Bordin e Paqes, marrin pjesë Osmani e Rama

Posted on by Drin Reçica

Presidenti amerikan, Donald Trump, do të takohet të enjten me përfaqësues të dhjetëra vendeve që i janë bashkuar Bordit të tij të Paqes, si dhe me disa që kanë zgjedhur të mos bashkohen, për një takim inaugurues, që do të përqendrohet në rindërtimin dhe krijimin e një force ndërkombëtare stabilizuese për Gazën e shkatërruar nga lufta, përcjell albinfo.ch.

Presidentja e Kosovës, Vjosa Osmani, ka udhëtuar në shtetet e Bashkuara të Amerikës për të marrë pjesë në takimin inaugurues të Bordit. Kryeministri i Shqipërisë, Edi Rama, po ashtu ka njoftuar se do të marrë pjesë.

Trumpi ka thënë para takimit se anëtarët e bordit kanë premtuar 5 miliardë dollarë për rindërtim, një pjesë e vogël e rreth 70 miliardë dollarëve që vlerësohet se nevojiten për të rindërtuar territorin palestinez të shkatërruar pas dy vjetësh lufte.

Anëtarët pritet të shpallin angazhime për mijëra persona në forcat ndërkombëtare të stabilizimit dhe policisë për territorin.

“Kemi liderët më të mëdhenj në botë që po i bashkohen Bordit të Paqes”, u ka thënë Trumpi gazetarëve më herët këtë javë.

“Mendoj se ka mundësinë të jetë bordi më me ndikim i krijuar ndonjëherë”, ka shtuar ai.

Bordi është iniciuar si pjesë e planit me 20 pika të Trumpit për t’i dhënë fund konfliktit në Gazë. Por që nga armëpushimi i tetorit, vizioni i Trumpit për bordin ka evoluar dhe ai dëshiron që ai të ketë një mandat edhe më ambicioz, jo vetëm të përmbushë detyrën e vështirë për të arritur paqe të qëndrueshme mes Izraelit dhe Hamasit, por edhe të ndihmojë në zgjidhjen e konflikteve në mbarë botën.

Megjithatë, përpara mbledhjes së parë të bordit, marrëveshja e armëpushimit në Gazë mbetet e brishtë dhe vizioni i zgjeruar i Trumpit ka ngjallur frikë se presidenti amerikan po synon të krijojë një rival të Kombeve të Bashkuara. Trumpi ka thënë më herët këtë javë se shpreson që bordi ta nxisë OKB-në “të veprojë më me energji”.

“Kombet e Bashkuara kanë potencial të madh”, ka thënë ai. “Nuk e kanë përmbushur atë potencial”.

Më shumë se 40 vende dhe Bashkimi Evropian kanë konfirmuar se do të dërgojnë zyrtarë në takimin e së enjtes, sipas një zyrtari të lartë të administratës që nuk ishte i autorizuar të komentonte publikisht.

Gjermania, Italia, Norvegjia dhe Zvicra janë ndër në mesin e shumë venedeve që nuk i janë bashkuar bordit, por pritet të marrin pjesë si vëzhgues, ka thënë zyrtari. 

Këshilli i Sigurimit i OKB-së ka mbajtur një takim të nivelit të lartë të mërkurën mbi marrëveshjen e armëpushimit dhe përpjekjet e Izraelit për të zgjeruar kontrollin në Bregun Perëndimor. 

Seanca e OKB-së në New York ishte planifikuar fillimisht për të enjten, por është zhvendosur për një ditë para, pasi Trumpi njoftoi takimin e bordit për të njëjtën datë dhe u parashikua se kjo do të komplikonte planet e udhëtimit për diplomatët që synonin të merrnin pjesë në të dyja.

Kosova dhe Kroacia drejt thellimit të bashkëpunimit ekonomik

Posted on by Drin Reçica

Në Slavonski Brod janë zhvilluar përgatitjet për Forumin Ekonomik Kosovë–Kroaci, i cili pritet të organizohet së shpejti në Kosovë, me synim thellimin e bashkëpunimit ekonomik dhe krijimin e mundësive të reja për investime ndërmjet dy vendeve, transmeton albinfo.ch.

Takimi u realizua në bashkëpunim me Klubi i Biznesit Kroaci–Kosovë, me pjesëmarrjen e znj. Ermina Lekaj Perlaskaj, këshilltare e Ministrit të Punëve të Jashtme dhe Evropiane të Kroacisë, si dhe përfaqësuesve të Oda Ekonomike Kroate dhe Odës së Zejtarëve. Aktivitetet përgatitore po zhvillohen me mbështetjen e Ambasada e Republikës së Kosovës në Kroaci dhe autoriteteve lokale të qytetit të Slavonski Brodit.

Në këtë bashkëbisedim mori pjesë edhe ushtruesi i detyrës së drejtorit të KIESA, z. Zef Dedaj, i cili prezantoi potencialet investuese të Kosovës, duke vënë theksin te lehtësitë fiskale, pozicioni strategjik dhe sektorët prioritarë për investime, si industria përpunuese, energjia e ripërtëritshme, teknologjia e informacionit dhe bujqësia.

Ndërmarrësit nga rajoni i Sllavonisë shprehën interes të lartë për bashkëpunim konkret me Kosovën, duke theksuar gatishmërinë për të eksploruar partneritete të reja, projekte të përbashkëta dhe zgjerim të aktivitetit në tregun kosovar.

Forumi Ekonomik Kosovë–Kroaci pritet të shërbejë si një platformë kyçe për konkretizimin e këtyre interesave dhe për avancimin e marrëdhënieve ekonomike në një nivel të ri bashkëpunimi strategjik. /Albinfo.ch

Gazeta gjermane promovon Lumin e Shalës si një nga mrekullitë natyrore të Evropës

Posted on by Drin Reçica

Lumi i Shalës po tërheq gjithnjë e më shumë vëmendjen e mediave ndërkombëtare. Së fundmi, agjencia gjermane e udhëtimeve “Reise Reporter” i ka kushtuar një artikull kësaj zone, duke e cilësuar si një nga destinacionet më mbresëlënëse natyrore në Evropë dhe duke e krahasuar me Tajlandën për nga bukuria e saj, transmeton albinfo.ch.

“Ujëra të kristalta që të rrëmbejnë, shkëmbinj të lartë dhe natyrë e paprekur – ajo që ju pret në lumin e Shalës në veri të Shqipërisë konkurron edhe Tajlandën”, shkruan mediumi gjerman, duke e përshkruar këtë zonë si një “perlë të natyrës evropiane”.

Sipas artikullit, lumi gjarpëron përmes një peizazhi spektakolar në Alpet Shqiptare, i rrethuar nga formacione të larta shkëmbore dhe gjelbërim i dendur. Ujërat me ngjyrë smeraldi, plazhet e vogla dhe varkat shumëngjyrëshe krijojnë një panoramë që, sipas autorëve, i ngjan destinacioneve tropikale.

Reise Reporter thekson se Lumi i Shalës është një degë e Liqenit të Komanit, ku derdhet pas rreth 35 kilometrash, duke përshkuar gryka të thella dhe zona të izoluara që tërheqin aventurierë dhe dashamirës të natyrës.

Për ata që dëshirojnë të qëndrojnë më gjatë se një vizitë njëditore, përgjatë brigjeve të lumit funksionojnë shtëpi mysafirësh të vendosura në mes të natyrës. Ato ofrojnë akomodim të thjeshtë gjatë sezonit veror, ndërsa rekomandohet rezervimi paraprak për shkak të interesimit të lartë.

Ndër aktivitetet më të preferuara për vizitorët janë noti në ujërat e kristalta, relaksimi në zonat e improvizuara të plazhit dhe eksplorimi i grykave përmes tureve me kajak apo varkë. Zona ofron gjithashtu mundësi për të zbuluar ujëvara dhe burime natyrore të fshehura mes shkëmbinjve.

Me këtë vlerësim nga media gjermane, Lumi i Shalës konfirmon statusin e tij si një nga destinacionet më tërheqëse turistike në Shqipëri, duke forcuar imazhin e vendit si një pikë referimi për turizmin natyror në rajon. /Albinfo.ch

Rihapet Shkolla Shqipe në Naples, nis mësimi më 20 shkurt

Posted on by Drin Reçica

Pas një periudhe pauze, Shkolla Shqipe në Naples të Floridës do të rihapë dyert për nxënësit, duke rikthyer mësimin e gjuhës dhe kulturës shqiptare për fëmijët e komunitetit, shkruan albinfo.ch.

Rifillimi i aktivitetit vjen pas një angazhimi intensiv nga drejtuesit e shoqatës, në veçanti nga presidenti i AAOSWFL, Toni Guberaj. Mësimi do të nisë të premten, më 20 shkurt, në orën 18:00.

Organizatorët bëjnë të ditur se Distrikti i Collier County ka dhënë konfirmimin zyrtar për zhvillimin e mësimit gjatë këtij semestri, duke hapur kështu rrugën për vazhdimin e aktivitetit arsimor.

Drejtuesit e shkollës kanë falënderuar komunitetin për durimin dhe mbështetjen e vazhdueshme, duke theksuar rëndësinë e ruajtjes së gjuhës shqipe, kulturës dhe traditave ndër breza.

Rihapja e shkollës konsiderohet një hap i rëndësishëm për forcimin e identitetit kulturor dhe lidhjes së fëmijëve me rrënjët e tyre./Albinfo.ch