Dhoma e Biznesit të Diasporës ka organizuar me sukses Forumin Ekonomik në kuadër të Samitit të Diasporës 2026, duke sjellë në Tiranë biznese të rëndësishme shqiptare në botë dhe kompani të fuqishme ndërkombëtare që janë të interesuara për tregun shqiptar.

Kryetari i Dhomës së Biznesit të Diasporës, Ardian lekaj dha mesazhe të rëndësishme për mbështetjen e investimeve të diasporës dhe rëndësinë që ato mund të japin për ekonominë shqiptare.

Nga ana tjetër, ministrja për Ekonominë dhe Inovacionin, Delina Ibrahimaj premtoi mbështetje për këto biznese, duke sjellë si shembull fondet e programit Start Up, prej të cilave përfitojnë dhe shqiptarët e diasporës, shkruan Scan, transmeton albinfo.ch.

Në një sallë të mbushur plot me biznese të diasporës, sipërmarrës vendas, kompani të huaj dhe përfaqësues të institucioneve shqiptare u fol për projekte dhe sektorë konkretë, ku mund të investohet dhe diaspora të japë një kontribut real.

Shqipëria është vendi i tretë në botë për diasporën më të madhe. Kryesisht në Itali, Greqi, Shtetet e Bashkuara të Amerikës, Gjermani, Kanada, Mbretërinë e Bashkuar e Belgjikë jetojnë e punojnë 2.2 milionë qytetarë. Me organizimin e Dhomës Ekonomike të Diasporës, me në epiqendër fabulën “Përmes rrënjëve lartësohemi”, shqiptarët e suksesshëm nëpër botë u mblodhën në Tiranë, duke garantuar se lidhja me Shqipërinë do të vijojë edhe më e fortë.

Të dhënat tregojnë se pjesa më e madhe e investimeve nga shqiptarë të diasporës, veçanërisht në pesë vitet e fundit, kanë shkuar në projekte në sektorë, si argotizmi, turizmi, bujqësia dhe shërbimet financiare.

Përfitimet ekonomike të Shqipërisë nga diaspora shtrihen në disa drejtime, te kapitali, dija, eksperienca, investimet e huaja, turizmi dhe mbi të gjitha te paratë që sjellin për familjet në vendlindje. Për të kuptuar madhësinë e remitancave, mjafton të kujtojmë se vetëm gjatë vitit të shkuar ato arritën në 1.1 miliardë euro. Sot roli i diasporës bëhet edhe më jetik në rrugën e anëtarësimit në Bashkimin Evropian dhe bizneset e diasporës mund të japin një kontribut të madh në transformimin e biznesit shqiptar për të qenë gati për tregjet evropiane.

Një pallat është përfshirë nga flakët pasditen e kësaj të marte në Tiranë, përballë spitalit “Nënë Tereza”.

Flakët përpinë të gjithë pallatin duke e djegur brenda pak minutash, ndërsa banorët nxituan të evakuoheshin. Në pamjet e siguruara nga gazetari i Top Channel Bledar Korreshi, shiheshin banorët, mes tyre të moshuar që dilnin nga ndërtesa, transmeton albinfo.ch.

Në vendin e ngjarjes ndodhen disa forca zjarrëfikëse, por mbeten ende të paqarta rrethanat sesi ra zjarri që dogji gjithë fasadën e jashtme të banesës. Deri në këto momente janë asfiksuar nga flakët 7 persona, mes tyre dy zjarrfikës.

Ndërkohë raportohet për dëme të konsiderueshme materiale. Në ndihmë të zjarrfikësve janë edhe 2 helikopterë Cougar. Në vendin e ngjarjes ndodhet i ministri i Brendshëm, Besfort Lamallari.

youtube.com/watch?v=oxIfsnCjZ4g&source_ve_path=MjM4NTE&embeds_referring_euri=https%3A%2F%2Ftop-channel.tv%2F

Gjatë Samitit të Diasporës, në panelin “Diaspora mbarëshqiptare: A po bëjmë çfarë duhet bashkërisht?”, Arbër Gashi, deputet në Parlamentin Suedez, deklaroi se angazhimi i diasporës shqiptare duhet të kalojë nga fjalët në vepra konkrete.

Ai theksoi se, për herë të parë, shqiptarët në Suedi kanë mundësinë të kontribuojnë aktivisht në politikën e vendit, duke sjellë rezultate konkrete për forcimin e lidhjeve midis Suedisë, Shqipërisë dhe Kosovës, transmeton albinfo.ch.

Gashi përmendi takimet e tij të para si deputet me ambasadat e Shqipërisë dhe Kosovës në Suedi, të cilat, sipas tij, kanë çuar në veprime të koordinuara dhe jo vetëm deklarata.

Ai gjithashtu foli për organizimin e festës së 28 Nëntorit në Parlamentin Suedez dhe ceremoninë e Ditës së Çlirimit të Kosovës në Stokholm, si shenja të angazhimit të diasporës për të ruajtur lidhjet me atdheun.

Prioritet sipas Gashit, është ngritja e mocioneve për anëtarësimin e Kosovës në Këshillin e Evropës dhe për intensifikimin e bashkëpunimit ekonomik mes Suedisë dhe Shqipërisë dhe Kosovës.

Ai apeloi që diaspora shqiptare të angazhohet më shumë në politikën e vendit ku jeton, duke kontribuar aktivisht në partitë politike dhe administratën lokale.

Në lidhje me përfshirjen e diasporës në politikën e vendeve ku jetojnë, Gashi theksoi se është e rëndësishme që të inkurajohen më shumë shqiptarët që të angazhohen në politikën e vendeve ku jetojnë dhe të jenë ambasadorë të vërtetë të kulturës dhe interesave të shqiptarëve.

“Në Suedi, për fat të mirë, nuk jam vetëm. Ne kemi dy deputetë shqiptarë në parlamentin suedez, dhe gjithashtu shqiptarët janë të përfaqësuar në nivele të larta në politikën lokale dhe komunale”, tha deputeti shqiptar Arbër Gashi në parlamentin suedez.

Në Samitin e Diasporës, Kreu i Bashkimit Demokratik për Integrim, Ali Ahmeti, ka adresuar atë që ai e cilëson si një “rrezik real” për gjuhën shqipe në Maqedoninë e Veriut, pas protestës së studentëve të drejtësisë atje për të bërë në gjuhën shqipe provimin e magjistraturës.

Duke u rikthyer në zanafillën e Marrëveshjes së Ohrit, Ahmeti kujton se statusi zyrtar i shqipes nuk është thjesht një akt ligjor i brendshëm, por një garanci ndërkombëtare e vulosur nga SHBA, BE dhe NATO, transmeton albinfo.ch.

Ai u bëri thirrje faktorëve politikë dhe garantëve ndërkombëtarë që të ndalojnë çdo tentativë për “gërryerjen” e kësaj arritjeje historike, duke theksuar se stabiliteti dhe e ardhmja e shtetit fqinj janë të lidhura pazgjidhshmërisht me bashkëjetesën dhe të drejtat e barabarta të shqiptarëve.

Ali Ahmeti: Sa i takon gjuhës shqipe në Maqedoni, është një rrezik i vërtetë që mendoj që duhet t’i dalim zot. Gjuha shqipe në Maqedoni të nënshkruar dhe të garantuar nga SHBA, me përfaqësues të dërguarin e George Bush, presidentin e asaj kohe është nënshkrues dhe garantues, po ashtu edhe BE, po ashtu edhe NATO e përfaqësuar nga Robertson, ndaj dhe ne kemi hedhur firmën në marrëveshjen ushtarake, me presidentin Traikovski si UÇK, kemi pranuar marrëveshjen e Ohrit dhe kemi punuar bashkërisht me BE, SHBA dhe NATO-n. Suksesi i kësaj marrëveshje, që nga simbolet kombëtare, arsimi në gjuhën shqipe dhe e folura shqip në administratë dhe përfundimi i ligjit të gjuhës shqipe që është konform me marrëveshjen e Ohrit, gjuhën të cilën e flasin mbi 20% e qytetarëve në Republikën e Maqedonisë së atëhershme, është gjithashtu zyrtare. Çdo koment tjetër, për përmirësimin e ligjin apo për ndryshimin e tij është vetëm për ta gërryer marrëveshjen e Ohrit dhe karakterin e kësaj marrëveshje ndërkombëtare. Përgjegjësinë e kemi të përbashkët, Uashington, Bruksel, NATO, forcat politike shqiptare dhe ato maqedonase. Maqedonia ka ardhmëri në bashkëjetesë, bashkëqeverisje vetëm me shqiptarët. Pa shqiptarët, nuk mund të mbijetojë dhe ditët i ka të numëruara.

Ministri i Jashtëm i Shqipërisë, Ferit Hoxha, theksoi nga Samiti i Diasporës, që po mbahet në Tiranë, se diaspora ka qenë gjithmonë pjesë e pandashme e Shqipërisë.

Në fjalën e tij, ai theksoi se marrëdhënia me diasporën është parë si një rrugë me një drejtim, por tani është një “rrugë me dy kahje”.

Ai theksoi se përgjegjësia është e jona nëse gjuha shqipe dobësohet, ndërkohë që më përpara ajo ka arritur t’i rezistojë shekujve, transmeton albinfo.ch.

Këtu ai përmendi edhe protestën e studentëve shqiptarë në Maqedoninë e Veriut, teksa tha se ata kërkuan një të drejtë legjitime për gjuhën amtare.

“Nëse gjuha jonë i ka rezistuar shekujve, dobësohet sot kur jemi më të ditur e të lidhur, atëherë përgjegjësia është vetëm jona. Kjo është mesazhi i kërkesës legjitime të studentëve të RMV për të ushtruar të drejtën e tyre në gjuhën amtare.

Këtë duhet të keni parasysh edhe për mësuesit, vullnetarët e organizatorët. Ata meritojnë jo vetëm mirënjohje dhe shumë mbështetje konkrete. Forca jonë ka qenë të jemi të hapur, të mësojmë gjuhë të tjera por pa harruar tonën, të ndërtojmë ura me të tjerët por pa shembur themelet tona dhe gjuhën shqipe, ta çojmë në vendin që meriton në familjen e madhe evropiane. Suksesi juaj nuk është vetëm personal por kombëtar. Edhe nga larg, ju keni qene gjithmonë afër”, tha ai.

Fjala e plotë e Ministrit në Samitin e Diasporës:

Sot nuk mblidhemi thjesht për një takim të radhës.

Si çdo herë kur bëhemi bashkë, përfaqësues të një kombi të shtrirë në rajon dhe një shoqërie që jeton në shumë vende, sot në këtë sallë të madhe e të mbushur plot rreh një zemër e madhe.

Një zemër që e bën këtë qytet – sot e përditë – më shumë se kryeqytetin e Shqipërisë: e bën një shtëpi të përbashkët për të gjithë ne.

Samiti i IV-të i Diasporës vjen në një moment kyç, siç e theksoi dhe Presidenti dje.

Ndërsa bota përreth nesh po ndryshon në mënyrë marramendëse, Shqipëria po ecën më shpejt se kurrë drejt të ardhmes evropiane që i ka projektuar vetes. Këtë mund të them me bindje dhe për Kosovën.

Dhe shqiptaria, kudo që ndodhet, është sot më e fortë dhe më e gjallë se kurrë.

Ky realitet na kujton një të vërtetë thelbësore: diaspora nuk është thjesht “jashtë”.

Ajo është pjesë e pandashme e qenies sonë.

Jo një adresë ku drejtohemi kur kemi nevojë, por një dimension plotësues i identitetit tonë kombëtar.

Për shumë vite, marrëdhënia jonë me diasporën është parë si një rrugë me një drejtim. Sot e dimë: është një rrugë me dy kahje.

Historia jonë e përbashkët na ka mësuar se largësia nuk e dobëson lidhjen. Përkundrazi, e forcon atë.

Por kjo lidhje kërkon kujdes, kërkon vëmendje dhe, mbi të gjitha, kërkon dëgjim.

Kemi shumë për të thënë për kulturën, identitetin, inovacionin, turizmin, zhvillimin lokal, talentet dhe të rinjtë, për shërbimet në linjë, përfshirë shërbimin tonë konsullor. Nuk do të ndalem këtu sepse për të gjitha këto e shumë të tjera do të diskutojmë ne detaje gjatë këtyre ditëve.

Por në këto minuta hyrëse, më lejoni të them dy fjalë mbi një aspekt të veçantë e themelor: gjuha shqipe.

Sepse ajo është ADN-ja jonë.

Ajo nuk është thjesht mjet komunikimi — është kujtesë, identitet, është vazhdimësi.

Pa gjuhën, do të na mbetej vetëm trupi; dhe një trup pa shpirt varfërohet e tkurret.

Prandaj, përpjekjet për gjuhën – në Shqipëri, në rajon dhe në diasporë – janë përpjekje për të qenë vetvetja.

Gabimi më i madh do të ishte të ngatërronim të përkohshmen me të përhershmen.

Të sakrifikonim thelbin me lehtësinë e momentit.

Nëse gjuha jonë, e cila u ka rezistuar shekujve në kohë shumë më të vështira, dobësohet sot – kur jemi më të ditur, më të fortë dhe më të lidhur se kurrë – atëherë përgjegjësia është vetëm e jona.

Ky është mesazhi i kërkesës legjitime të studentëve në Maqedoninë e Veriut për të ushtruar të drejtat e tyre në gjuhën amtare.

Këtë duhet ta kemi parasysh edhe për mësuesit, vullnetarët dhe organizatorët në diasporë, që mbajnë gjallë gjuhën tonë çdo fundjavë, në çdo klasë, në çdo aktivitet.

Ata meritojnë jo vetëm mirënjohje; meritojnë më shumë mbështetje konkrete dhe për këtë jemi të angazhuar me gjithë ekipin në Ministrinë e Jashtme.

Forca jonë ka qenë gjithmonë të jemi të hapur, të mësojmë gjuhë të tjera por pa harruar tonën.

Të hapemi ndaj botës, pa humbur veten.

Të ndërtojmë ura me të tjerët, pa shembur themelet tona.

Dhe ne kemi marrë angazhimin që gjuhën shqipe, pjesë e familjes së madhe indo-evropiane, ta çojnë në vendin që meriton, në familjen e madhe evropiane.

Të dashur bashkëatdhetarë,

Historia e diasporës është histori sakrifice, qëndrese dhe përkushtimi. Por çdo ditë e më shumë, ajo është edhe histori suksesi.

Nga brezi i parë që u largua me pak shpresë por me shumë kurajë, tek profesionistët e sotëm që udhëheqin në shkencë, teknologji, biznes e kulturë — ju keni ndërtuar një kapitull të ri të shqiptarisë globale.

Suksesi juaj nuk është vetëm personal — është edhe kombëtar. Sepse çdo arritje e juaja është një dritare më shumë për Shqipërinë në botë.

Shqipëria që transformohet dhe diaspora që afirmohet janë dy anë të së njëjtës medalje.

Dhe kjo medalje ka një emër: shqiptaria në zhvillim dhe forcim.

Edhe nga larg, ju keni qenë gjithmonë afër.

Në kohë të vështira, keni qenë mbështetje.

Sot, në kohë zhvillimi, ju duam partnerë.

Ky samit nuk është një ceremoni.

Është një hapësirë pune. Një laborator idesh.

Një pikë takimi në mënyrë që vizioni i përbashkët të kthehet në bashkëveprim.

Përgjatë këtyre ditëve, do të diskutojmë për sfida dhe mundësi konkrete: për mundësi e oportunitete, projekte e aktivitete, për shkëmbim dijesh dhe për ruajtjen e identitetit.

Do të dëgjojmë edhe kritikat, por edhe propozime e rekomandime.

Nuk do të kemi monolog – sepse duam dialog.

Nuk do të flasim për ju – sepse duam te flasim me ju.

Nuk do të jeni dëgjues apo spektatorë — sepse ju duam aktorë;

Jo me ndjenjën e fajit por me peshën e përgjegjësisë dhe energjinë e mundësisë;

Pikërisht për këtë kemi ndërtuar plot 19 panele bashkëbisedimi, si asnjëherë më parë, me tematika shumë të larmishme, si dhe plot aktivitete anësore specifike që prekin drejtpërdrejt jetën tuaj dhe ndikojnë në të ardhmen tonë të përbashkët.

Sepse kemi shumë për të thënë e për të ndarë, por dhe më shumë për të bërë.

Qëllimi ynë është i thjeshtë dhe ambicioz njëkohësisht: të mësojmë nga njëri-tjetri, të ndërtojmë ura më të forta dhe të krijojmë mekanizma konkretë që e bëjnë këtë lidhje të qëndrueshme, funksionale, efektive.

Sepse Atdheu është kudo ku ka shqiptarë.

Sepse, siç e kemi thënë, përmes rrënjëve lartësohemi dhe përmes dijes forcohemi.

Faleminderit të gjithëve që jeni këtu — si pjesëmarrës, moderatorë, panelistë, kontribuues dhe bashkudhëtare në këtë rrugëtim.

Një gjë është e qartë: e ardhmja e sigurtë dhe e begatë ndërtohet më mirë dhe më shpejt së bashku.

Më këto fjalë, më lejoni tani të ftoj Kryeministrin e Shqipërisë, zotin Edi Rama — njeriun që e ideoi dhe i dha jetë samitit dhe partneritetit me diasporën.

Samiti i Diasporës filloi punimet treditore në Tiranë, duke mbledhur përfaqësues të diasporës shqiptare, institucioneve shtetërore dhe ekspertë nga vende të ndryshme të botës.

Në kuadër të tij, Forumi Ekonomik, i bashkëorganizuar nga Dhoma e Biznesit të Diasporës në bashkëpunim me Ministrinë e Ekonomisë dhe Inovacionit dhe Ministrinë për Evropën dhe Punët e Jashtme, synon krijimin e urave konkrete të bashkëpunimit dhe nxitjen e investimeve të diasporës në Shqipëri.

Anëtari i kryesisë së Dhomës së Biznesit të Diasporës, Erjon Begaj, në një prononcim për mediat, theksoi rolin thelbësor që luan Dhoma në këtë ngjarje të rëndësishme.

“Shqipëria sot në disa sektorë ofron oportunitete në energji, turizëm, ndërtim dhe teknologji. Ka zhvilluar kapacitete dhe tërheq investitorë të huaj. Edhe nga ana e kapitalit human ka zhvillim të lartë, ashtu edhe për shkak të kostos dhe sistemit fiskal që avantazhon. Ajo që kërkohet nga qeveria është stabiliteti. Kjo është gjëja kryesore që kërkon investitori, një stabilitet më i qëndrueshëm i Shqipërisë. Hyrja e Shqipërisë në BE, në strukturat e Bashkimit Evropian, do të rriste stabilitetin dhe seriozitetin dhe do të nxiste më shumë investitorë të huaj apo të diasporës të vijnë të investojnë në Shqipëri”, shprehet Begaj.

Ky objektiv, sipas tij, duhet të realizohet përtej bindjeve politike që kemi, sepse këtu flitet për Shqipërinë, për interesin e Shqipërisë dhe për brezat e ardhshëm, jo për bindje politike apo parti.

Dhoma e Biznesit të Diasporës është bashkëorganizatore e Forumit Ekonomik, një nga shtyllat kryesore të samitit, në partneritet me Ministrinë e Ekonomisë dhe Inovacionit dhe Ministrinë për Evropën dhe Punët e Jashtme.

Gjatë Samitit të IV të Diasporës, ministrja e Ekonomisë dhe Inovacionit e Shqipërisë, Delina Ibrahimaj, u ndal te roli i investimeve në zhvillimin ekonomik të vendit, duke theksuar rëndësinë e veçantë që kanë investimet që vijnë nga diaspora shqiptare.

Ajo u shpreh se investimet kanë qenë në rritje dhe kanë nxitur më tej zhvillimin ekonomik, ndërsa theksoi se ky trend ka edhe më shumë vlerë kur vjen nga shqiptarët që jetojnë jashtë vendit dhe zgjedhin të investojnë në Shqipëri, duke sjellë njëkohësisht edhe eksperiencën e tyre të fituar në vende të tjera.

Ibrahimaj vuri në dukje se ekonomia shqiptare është në rritje, me rritje të punësimit dhe ulje të papunësisë, ndërsa sektorë kyç si turizmi dhe energjia po zhvillohen me ritme të qëndrueshme. Sipas saj, Shqipëria po përmirësohet edhe në ofrimin e shërbimeve publike dhe renditet ndër vendet më të avancuara në këtë drejtim në Evropë.

“Investimet janë ato që kanë ardhur në rritje dhe kanë nxitur akoma më shumë investime dhe do nxisin më shumë zhvillim ekonomik. Investimet kanë gjithmonë më shumë vlerë nëse janë nga diaspora, nëse janë nga shqiptarë që duan të vijnë dhe të investojnë në Shqipëri, të vijnë dhe të japin eksperiencën e tyre që kanë marrë jashtë. Vetëm duke pasur një plan pune të dedikuar bashkërisht, në Samitin e V do të kemi më shumë rezultate konkrete. Sot mund të jetë një ditë e shënuar drejt zhvillimit të një marrëdhënieje më të fortë. Shqipëria është në rritje, ekonomia është në rritje, punësimi në rritje, papunësia është në rënie.

Ato sektorët të cilët ne kemi etiketuar si sektorë kyç janë duke u zhvilluar. Tani është momenti që Shqipëria të ketë zhvillim më të gjerë në turizëm. Një sektor tjetër shumë i rëndësishëm është energjia. Energjia është një sektor i cili gjithmonë e më shumë ka tërhequr vëmendjen. Jemi ndër vendet më të avancuar në Evropë për shërbimet publike. Të 8-ët në Evropë për shërbimet publike. Shqipëria evropiane mund të zhvillohet vetëm nëpërmjet rritjes së investimeve dhe eksporteve dhe padyshim rritjes së produktivitetit”, u shpreh ajo.

Kryetari i Kuvendit të Shqipërisë, Niko Peleshi, foli në Samitin e Diasporës për rolin që kanë shqiptarët që jetojnë jashtë vendit.

Ai u ndal te fakti se diaspora sot është e pranishme dhe aktive në shoqëritë ku jeton, duke u bërë pjesë e jetës ekonomike, kulturore dhe politike në shumë vende.

Sipas tij, shqiptarët jashtë vendit nuk janë vetëm mbështetje financiare për familjet e tyre, por edhe një burim i rëndësishëm për zhvillimin e Shqipërisë.

Ai përmendi edhe ndikimin e remitancave dhe kontributin në fusha si arsimi, kultura dhe jeta publike, transmeton albinfo.ch.

Peleshi foli edhe për praninë e shqiptarëve në nivele të larta në vende si Evropa, Kanadaja dhe SHBA, duke i cilësuar si pjesë e elitave në fusha të ndryshme.

Në fund, ai u ndal te nevoja që institucionet dhe shoqëria të bashkëpunojnë më shumë për të përfituar nga ky potencial dhe për ta lidhur më fort diasporën me zhvillimin e vendit.

youtube.com/watch?v=6EgCgeY7cqc&source_ve_path=MjM4NTE&embeds_referring_euri=https%3A%2F%2Fwww.oranews.tv%2F