Falsifikim dokumentesh për të kërkuar azil në Evropë

Bëhet e ditur se janë lëshuar vërtetime të falsifikuara për persona që nuk janë të përfshirë në histori hasmërie apo gjakmarrjeje

Policia shqiptare ka njoftuar se ka dërguar për ndjekje penale në prokurori kreun për pajtimin e gjaqeve në Shqipëri me dyshimin se ka shfrytëzuar pozicionin në shoqatat e pajtimit të gjaqeve duke lëshuar vërtetime të falsifikuara për disa qytetarë me qëllim kërkimin e azilit në shtete të ndryshme të Bashkimit Evropian.

Sipas medieve të Tiranës, Drejtoria kundër krimit financiar dhe ajo kundër krimeve të rënda kanë siguruar informacion të nevojshëm se janë lëshuar prej tyre vërtetime të falsifikuara për persona që nuk figurojnë të jenë të përfshirë në histori hasmërie apo gjakmarrjeje.

Përveq kreut të Komitetit mbarëkombëtar të pajtimit të gjaqeve dyshohet edhe  për një anëtar të Shoqatës së misionarëve të paqes dhe pajtimit të gjaqeve të Shqipërise në Malësinë e Madhe.

Të dy misionarët Pashko Popaj dhe Gjin Marku akuzohen se kanë konsumuar veprën penale të “falsifikimit të dokumentave”.

Kërkesat e shumta për azil në vendet e BE-së e kanë vënë në diskutim kohët e fundit cështjen e liberalizimit të vizave për Shqipërinë.

Muajin e kaluar vetë Brukslei ngriti zërin dhe Komiteti i Jashtëm në Parlamentin Europian mbështeti me shumicë votash propozimin e Komisionit për të ndryshuar rregulloren e vizave.

Edhe Komisioni për çështjet e Sigurisë, Lirisë dhe Drejtesisë në Parlamentin Europian shqyrtoi propozimin e Komisionit për vendosjen e një mekanizimi sigurie për të rikthyer regjimin e vizave në rast se vendet anëtare ankohen për shfrytëzim të procesit liberalizues nga nje vend i tretë, jashtë BE-së.