Ka filluar kthimi në Kosovë i regjistrit civil

Është bërë certifikimi i librit të parë të regjistrit civil nga Janjeva e Lipjanit ndërsa mbesin edhe 14 mijë libra tjerë

Në Nish　të Serbisë është mbajtur takimi VI për zbatimin e marrëveshjes për librat e regjistrit civil ndërmjet ekspertëve të Republikës së Kosovës dhe ekspertëve nga Serbia, me ndërmjetësim të EULEX-it.　　

Atje është bërë certifikimi i librit të parë të regjistrit civil nga Janjeva, komuna e Lipjanit.Ndërsa mbesin edhe 14 mijë libra tjerë për t’u certifikuar në të ardhmen, ka njoftuar Qeveria.

Sipas marrëveshjes së arritur në Bruksel, EULEX-i obligohet t’i certifikojë dokumentet e regjistrit civil në prani të të dyja palëve.

“Pas verifikimit faqe për faqe dhe skanimit të librit sipas modelit të Kosovës, Certifikimi i këtyre dokumenteve u realizua nga përfaqësuesi i autorizuar i EULEX-it, ndërsa libri i skanuar dhe i certifikuar korrespondon me bazën e të dhënave, që aktualisht i ka Kosova”, thuhet në komunikatë.

Bazuar në planin e punës për zbatimin e marrëveshjes për kthimin e regjistrit civil, grupi trepalësh për implementim do të takohet në javën e dytë të dhjetorit dhe gjatë këtij takimi pritet që pala serbe të sjellë listën e të gjitha statistikave të librave të regjistrit civil, të marrë nga Kosova gjatë luftës.

Gjithashtu, sipas komunikatës, gjatë këtij takimi u diskutuan edhe modalitetet e implementimit në praktikë si dhe kohëzgjatja e procesit të skanimit.